Nujuiin Cristu nuu Ianyuux xaxeʼe‑ro
2
Daʼya kuechi‑da,
kidavaʼa‑da carta yaʼa nuu‑n,
xa maxku kada koio ka‑n kuechi.
Ko ɨɨn ñayiu,
nux na kada‑i kuechi,
te nujuiin Jesucristu nuu Taa‑ia Ianyuux xaxeʼe‑ro.
Xaxeʼe xa nuncas ña n‑kida Jesucristu ni ɨɨn kuechi,
kuaʼa‑ia xa jaʼan‑ia nuu Ianyuux xaxeʼe mee‑ro.
2 Xaxeʼe Jesucristu,
taxkanu ini ñaʼa Ianyuux kuechi‑ro.
Chi na n‑xiʼí Jesucristu nuu curuxi,
n‑chiyaʼu‑ia kuechi mee‑ro,
te dɨuni n‑chiyaʼu‑ia kuechi ntdaa ñayiu ñuñayiu.
3 Nux kida‑ro xa taʼu tniu Ianyuux,
naʼa‑ro xa kunduu‑ro xiʼin mee‑ia.
4 Ɨɨn ñayiu,
nux jaʼan‑i:
“Joon,
kunduu‑r xiʼin Ianyuux”,
ko ña kida mee‑i xa taʼu tniu‑ia,
jaʼan‑i tnuʼu vete,
te ñatu kidatniu tnuʼu Ianyuux anu‑i.
5 Ko ɨɨn ñayiu,
nux jandixa‑i tnuʼu Ianyuux xiʼin ntdaa anu‑i te duʼa kida‑i,
xandaa kuu xa xemani ñayiu jan Ianyuux.
Duʼa xini‑ro xa kunduu‑ro xiʼin Ianyuux.
6 Ɨɨn ñayiu,
nux jaʼan‑i xa kunduu‑i xiʼin Ianyuux,
io xa kada mee‑i xavaʼa,
ná n‑kida Jesucristu xavaʼa.
Tnuʼu taʼu tniu xee
7 Ñani‑da kuʼa‑da,
ñatu kidavaʼa‑da ɨɨn tnuʼu taʼu tniu xee.
Tnuʼu kidavaʼa‑da vitna,
ɨɨn nuu kuu xiʼin tnuʼu n‑ka tnɨɨ‑n nde kiʼna nuu.
Xá n‑ka teku‑n tnuʼu taʼu tniu yaʼa.
8 Ko dɨuni,
ná kuu ɨɨn tnuʼu taʼu tniu xee,
da kuu tnuʼu kidavaʼa‑da vitna.
Na n‑xo tuu Jesucristu ñuñayiu,
n‑kida‑ia ná jaʼan tnuʼu yaʼa,
te vitna ka kida mee‑n ná jaʼan tnuʼu yaʼa.
Duʼa kuu,
chi xaxeʼe xa vax ndɨʼɨ xanee,
chi xá n‑kixi Jesucristu te dakutnuni mee‑ia ñuñayiu.
9 Nux jaʼan ɨɨn ñayiu xa tuu‑i nuu kanda,
ko xini uʼu‑i ñani‑i kuʼa‑i,
dani tuu‑i nuu nee.
10 Nux xemani ɨɨn ñayiu ñani‑i kuʼa‑i,
tuu‑i nuu kanda Ianyuux,
te ña xe kɨʼɨ‑i kuechi.
11 Nux ña xemani ɨɨn ñayiu ñani‑i kuʼa‑i,
tuu‑i nuu nee,
te xika‑i nuu nee.
Te ña xini‑i ndexu jɨʼɨn‑i,
chi xaxeʼe xanee ña kanda nuu‑i.
12 Daʼya kuechi‑da,
kidavaʼa‑da nuu mee‑n,
chi xaxeʼe Jesucristu,
xá n‑taxkanu ini Ianyuux kuechi‑n.
13 Sexaʼnu,
kidavaʼa‑da nuu mee‑n,
xaxeʼe xa ka xini‑n Jesucristu,
Ia xá daa tuu antecas xa kuaʼa ntdaa xa io.
Sekuechi,
kidavaʼa‑r nuu‑n,
chi ña n‑ka xejoon‑n xa kadatniu kuiʼna anu‑n.
Daʼya kuechi‑da,
n‑kidavaʼa‑da nuu mee‑n,
xaxeʼe xa ka xini‑n Taa‑ro Ianyuux.
14 Sexaʼnu,
n‑kidavaʼa‑da nuu mee‑n,
xaxeʼe xa ka xini‑n Ia xá daa tuu antecas xa kuaʼa ntdaa xa io.
Sekuechi,
n‑kidavaʼa‑r nuu‑n,
xaxeʼe xa ka kundee ini‑n xa jandixa naʼi ka‑n Jesucristu.
N‑ka xejoon‑n xa kadatniu tnuʼu Ianyuux anu‑n,
te xijan kuu xa ñatuka taxnuni kuiʼna anu‑n.
15 Maxku juemani koio‑n ñuñayiu,
maxku juemani koio‑n xa io ñuñayiu.
Nux xemani ɨɨn ñayiu ñuñayiu,
te kuu xa ñatu xemani‑i Taa‑i Ianyuux.
16 Nux xemani ɨɨn ñayiu ñuñayiu,
kukajan ini‑i xa niʼi‑i ntdaa xa juini yɨkɨ kuñu‑i,
kukajan ini‑i xa niʼi‑i ntdaa xa ndeʼa‑i.
Najuen tnuʼu‑i mee‑i,
xaxeʼe ntdaa xa nevaʼa‑i xiʼin ntdaa xa kuu‑i.
Xaʼa kuu xa ña juini Ianyuux xa kada‑ro.
Xaʼa kuu xa kida ñayiu ña ka juini xa kunduu‑i xiʼin Ianyuux.
17 Chi vax ndɨʼɨ ñuñayiu yaʼa,
vax ndɨʼɨ ntdaa xa kukajan ini ñayiu.
Ko ñayiu ka kida xa juini Ianyuux,
kutuu vaʼa‑i xiʼin Ianyuux kuia ma jɨn ndɨʼɨ.
Tnuʼu ndaa xiʼin tnuʼu vete
18 Daʼya kuechi‑da,
xá vax ndɨʼɨ ntdaa xa io.
Xá n‑ka teku‑n xa kixi ɨɨn se dandaʼu ñayiu.
Jaʼan‑s xa kida‑s ná n‑kida Cristu,
ko nɨni duʼa jaʼan‑s,
kidatniu‑s xa danaa‑s ntdaa xa n‑kida Cristu.
Kuu‑s anticristu.
Te vitna duʼa kuu.
Xá n‑ka kixee kueʼe anticristu.
Xijan kuu xa xini‑ro xa n‑xee xa vax ndɨʼɨ ntdaa xa io.
19 Se ka kuu anticristu,
n‑ka dandoo ñaʼa‑s mee‑ro.
Ko ña ndaa xa n‑ka kunduu‑s xiʼin‑ro,
chi nux da n‑kuu,
dani ku kunduu‑s xiʼin‑ro nde vitna n‑kuu.
N‑ka dandoo ñaʼa‑s,
te duʼa n‑ka dandeʼa ñaʼa‑s xa ni ɨɨn‑s ña n‑ka kunduu‑s xiʼin‑ro.
20 Xá n‑taxi Jesucristu Espíritu Ianyuux nuu mee‑n,
xa kutnuni ini koio‑n xa kuu xandaa.
21 Ñadu kidavaʼa‑da xaxeʼe xa ña kutnuni ini‑n xa kuu xandaa,
chi kidavaʼa‑da xaxeʼe xa ka kutnuni ini‑n xa kuu xandaa.
Te ka kutnuni ini‑n xa tnuʼu vete ñatu kuu tnuʼu ndaa.
22 ¿Te jundu kuu se jaʼan tnuʼu vete?
Kuu‑s se jaʼan xa ña ndaa xa Jesús kuu Cristu,
Ia n‑tundaʼa Ianyuux.
Se duʼa jaʼan,
anticristu kuu‑s.
Ñatu jandixa‑s Ianyuux ni Daʼya Yɨɨ Ianyuux.
23 Ɨɨn ñayiu,
nux jaʼan‑i xa ña jandixa‑i Daʼya Yɨɨ Ianyuux,
xini‑ro xa dɨuni ña jandixa‑i Ianyuux.
Ko ɨnka ñayiu,
nux jaʼan‑i xa jandixa‑i Daʼya Yɨɨ Ianyuux,
xini‑ro xa dɨuni jandixa‑i Ianyuux.
24 Nde kiʼna nuu xa n‑ka teku‑n tnuʼu Jesucristu.
Jandixa naʼi koio ka‑n tnuʼu jan.
Nux jandixa naʼi koio ka‑n tnuʼu n‑ka teku‑n kiʼna nuu,
duʼa kunduu naʼi koio‑n xiʼin Daʼya Yɨɨ Ianyuux,
te kunduu naʼi koio‑n xiʼin Taa‑ia Ianyuux.
25 Xá n‑taxi Jesucristu tnuʼu‑ia xa duʼa kutuu vaʼa‑ro xiʼin Ianyuux kuia ma jɨn ndɨʼɨ.
26 Kidavaʼa‑da nuu‑n,
xa kakuneʼe‑da se ka juini xa dandaʼu ñaʼa koio‑s mee‑n.
27 Xá n‑taxi Jesucristu Espíritu Ianyuux nuu‑n,
te kidatniu‑ia anu‑n.
Xijan kuu xa ña ndoñuʼu‑n xa dakuaʼa ñaʼa ni ɨɨn ñayiu.
Dakuaʼa ñaʼa Espíritu Ianyuux ntdaa xa ndoñuʼu‑n.
Meni xandaa kuu xa dakuaʼa ñaʼa‑ia,
ñatu kuu tnuʼu vete.
Xijan kuu xa,
nani dakuaʼa ñaʼa‑ia dani kunduu naʼi koio‑n xiʼin‑ia.