N‑ka nduu‑n daʼya Ianyuux
3
Jira,
¡naka vaʼa xemani ñaʼa Ianyuux mee‑ro!
N‑danani ñaʼa‑ia daʼya‑ia,
te ndaa xa vitna kuu‑ro daʼya‑ia.
Xijan kuu xa,
nani ña n‑ka xini ñayiu ñuñayiu mee‑ia,
dani ñatu ka xini ñaʼa‑i mee‑ro tuku.
2 Ñani mani‑da,
kuʼa mani‑da,
vitna kuu‑ro daʼya Ianyuux,
te ta dandeʼa ka‑ia ñayiu ñuñayiu ntdaa xa ku kuu‑ro.
Hora na ndixi Jesucristu,
te ku kuu mee‑ro ná kuu mee‑ia.
Hora ijan,
jini vaʼa‑ro‑ia.
3 Xndetu‑ro xa ndixi Jesucristu,
te xejoon‑ro xa taxnuni‑ia anu‑ro.
Meni xavaʼa kida mee‑ia,
te ɨɨn ɨɨn ñayiu xndetu mee‑ia,
juini‑i xa kada mee‑i ná kida mee‑ia.
4 Ɨɨn ñayiu,
nux kida naʼi‑i kuechi,
ñayiu xee ini kuu‑i.
Ñatu jandixa‑i tnuʼu Ianyuux,
te xiʼin tnuʼu‑ia tekuechi‑ia‑i.
5 Vaʼa xnaʼa‑n xa n‑kixi Jesucristu ñuñayiu xa dita‑ia kuechi ñayiu.
Nuncas ña n‑kida mee‑ia ni ɨɨn kuechi.
6 Ɨɨn ñayiu,
nux kunduu naʼi‑i xiʼin Jesucristu,
duʼa ña kida naʼi‑i kuechi.
Ɨɨn ñayiu,
nux kida naʼi‑i kuechi,
ta jini ka‑i Jesucristu,
te ta kutnuni ini ka‑i nax n‑kida‑ia xaxeʼe‑i.
7 Daʼya kuechi‑da,
maxku juejoon koio‑n xa dandaʼu ñaʼa ni ɨɨn ñayiu.
Nux kida ɨɨn ñayiu xavaʼa,
kida‑i ná kida Jesucristu.
Te ná kuu mee‑ia,
da kuu ñayiu jan.
8 Nux dani kida ɨɨn ñayiu kuechi,
kuu‑i daʼya kuiʼna.
Nde kiʼna nuu n‑kida kuiʼna kuechi,
te dani kida naʼi‑i nde vitna.
Xijan kuu xa n‑kixi Daʼya Yɨɨ Ianyuux ñuñayiu,
xa danaa‑ia ntdaa xa n‑kida kuiʼna.
9 Ɨɨn ñayiu,
nux kuu‑i daʼya Ianyuux,
ma kada naʼi‑i kuechi,
chi kuu‑i daʼya Ianyuux.
Ña kuaʼa‑i xa kada ka‑i kuechi,
ña juini‑i xa kada‑i kuechi,
chi daʼya Ianyuux kuu‑i.
10 Duʼa xini‑ro jundu kuu daʼya Ianyuux te jundu kuu daʼya kuiʼna.
Nux ña kida ɨɨn ñayiu xavaʼa,
ñatu kuu‑i daʼya Ianyuux.
Nux ña xemani‑i ñani‑i kuʼa‑i,
ñatu kuu‑i daʼya Ianyuux.
Na juemani tnaʼa‑ro
11 Xaʼa kuu tnuʼu xá n‑ka teku‑n nde kiʼna nuu.
Xá n‑ka teku‑n xa io xa juemani tnaʼa‑ro.
12 Maxku ku kuu mee‑ro ná n‑kuu taxaʼnu tnetnu‑ro,
se n‑xo nani Caín.
Daʼya kuiʼna n‑kuu Caín,
te n‑xaʼni‑s ñani‑s.
Te,
¿nakuenda n‑xaʼni‑s ñani‑s?
Chi xaxeʼe xa n‑xo kida ñani‑s xavaʼa,
te n‑xo kida mee‑s xa uʼu.
13 Ñani‑da kuʼa‑da,
ñayiu ñuñayiu ma juemani ñaʼa koio‑i mee‑n.
14 Antecas xa jandixa‑ro Jesucristu,
n‑kuu‑ro ná kuu ndɨyɨ.
Vitna,
ndaa xa ndito‑ro.
Xini‑ro xa duʼa kuu,
chi xemani‑ro ñani‑ro kuʼa‑ro.
Ɨɨn ñayiu,
nux ñatu xemani‑i ñani‑i kuʼa‑i,
dani kuu‑i ndɨyɨ.
15 Ɨɨn ñayiu,
nux ña xemani‑i ñani‑i kuʼa‑i,
kuu‑i ná kuu ɨɨn ñayiu xaʼni ndɨyɨ.
Te xnaʼa‑n xa ɨɨn ñayiu xaʼni ndɨyɨ,
ñatu tuu vaʼa‑i xiʼin Ianyuux.
16 N‑dandeʼa ñaʼa Ianyuux xa xemani ñaʼa‑ia mee‑ro,
hora n‑xiʼí Jesucristu xaxeʼe‑ro.
Te io xa kuú mee‑ro tuku xaxeʼe ñani‑ro kuʼa‑ro,
nux ndoñuʼu xa duʼa koo.
17 Ɨɨn ñayiu,
nux tuu vaʼa‑i ñuñayiu,
te xini‑i xa ndoñuʼu ñani‑i kuʼa‑i,
ko ña kundau ini‑i‑yɨ te ña xiaʼan‑i xa ndoñuʼu‑i,
te,
¿nanda kuu xa jaʼan‑i xa xemani‑i ñani‑i kuʼa‑i?
Nux duʼa kida‑i,
te ña ndaa xa xemani‑i Ianyuux.
18 Daʼya kuechi‑da,
na dandeʼa‑ro ñani‑ro kuʼa‑ro xa ndaa xa xemani‑ro‑i.
Vaʼa na jaʼan‑ro nuu‑i,
ko dɨuni na chindee‑ro‑i.
Duʼa dandeʼa‑ro‑i xa ndaa xa xemani‑ro‑i.
Xaxeʼe Jesucristu, ña ndoñuʼu xa yuʼu‑ro nuu Ianyuux
19 Nux duʼa kida‑ro,
xini‑ro xa ndaa xa kunduu‑ro xiʼin Jesucristu,
te ña ndoñuʼu xa yuʼu‑ro nuu Ianyuux.
20 Naʼa Ianyuux ntdaa.
Nux tekuechi ñaʼa anu‑ro,
ko ma yuʼu‑ro,
chi xá n‑jaʼan Ianyuux xa nux xemani‑ro ñani‑ro kuʼa‑ro,
duʼa kunduu‑ro xiʼin mee‑ia.
21 Ñani mani‑da,
kuʼa mani‑da,
nux ña tekuechi ñaʼa anu‑ro,
ña ndoñuʼu xa yuʼu‑ro nuu Ianyuux.
22 Ntdaa xa xijan‑ro,
te taxi‑ia,
chi jandixa‑ro tnuʼu taʼu tniu‑ia,
te kida‑ro xa tna ini‑ia.
23 Te xaʼa kuu xa n‑taʼu tniu ñaʼa‑ia.
Io xa jandixa‑ro Daʼya Yɨɨ‑ia,
Jesucristu,
te io xa juemani tnaʼa‑ro,
ɨɨn‑ro xiʼin ɨnka‑ro.
Duʼa n‑taʼu tniu ñaʼa‑ia.
24 Ɨɨn ñayiu,
nux kida‑i xa taʼu tniu Ianyuux,
kunduu‑i xiʼin Ianyuux te kunduu Ianyuux xiʼin mee‑i.
Xá n‑taxi Ianyuux Espíritu Ii,
te kida Espíritu Ii xa naʼa‑ro xa kunduu Ianyuux xiʼin‑ro.