Carta kuu uu n‑kidavaʼa Sua
Xa kuu xandaa. Io xa juemani tnaʼa‑ro
1
Sexaʼnu kuu‑da.
Kidavaʼa‑da nuu mee‑n,
ñadɨʼɨ n‑jaʼan ñaʼa Ianyuux xa kunduu‑n xiʼin mee‑ia.
Kidavaʼa‑da nuu ntdaa daʼya‑n tuku.
Ndaa xa xemani ñaʼa‑da.
Ná xemani ñaʼa mee‑da,
da xemani ñaʼa ntdaa ñayiu n‑ka xeka vaʼa xa kuu xandaa.
2 Duʼa kuu xaxeʼe xa kunduu xa kuu xandaa xiʼin‑ro vitna,
te kunduu naʼi xa kuu xandaa xiʼin‑ro kuia ma jɨn ndɨʼɨ.
3 Na taxi ka Taa‑ro Ianyuux xamani‑ia nuu‑n.
Xiʼin Xtoʼo‑ro Jesucristu,
Daʼya Yɨɨ‑ia,
na taxi‑ia xamani‑ia nuu‑n,
te na kundau ini ñaʼa‑ia mee‑n,
te kada‑ia xa kutuu vaʼa‑n.
Duʼa koo xaxeʼe xa kunduu‑n xiʼin xa kuu xandaa,
te xaxeʼe xa xemani‑n Ianyuux xiʼin ñayiu.
4 Yo n‑kuvete‑da hora n‑nanitnaʼa‑da xiʼin daʼya‑n.
Dava‑i,
xá n‑ka xeka vaʼa‑i xa kuu xandaa.
Ná n‑taʼu tniu ñaʼa Taa‑ro Ianyuux mee‑ro,
duʼa ka kida‑i.
5 Ñadɨʼɨ vaʼa,
ñatu kidavaʼa‑da ɨɨn tnuʼu xee.
Kidavaʼa‑da tnuʼu taʼu tniu n‑tnɨɨ‑ro,
hora n‑ka kixeʼe‑ro xa kunduu‑ro xiʼin Cristu.
Xijan‑da xa juemani tnaʼa‑ro.
6 Nux jaʼan‑ro xa xemani‑ro Ianyuux,
io xa jandixa‑ro tnuʼu taʼu tniu‑ia.
Te xaʼa kuu xa n‑taʼu tniu ñaʼa‑ia.
Ná n‑ka teku‑n kiʼna nuu,
dani kuu.
Io xa juemani tnaʼa‑ro.
Se dandaʼu ñayiu ka kuu‑s
7 Ñuñayiu xndaxio kueʼe se dandaʼu ñayiu.
Ñatu ka jandixa‑s xa Jesús kuu Cristu,
Ia kuu Daʼya Yɨɨ Ianyuux,
te dɨuni kuu‑ia Se kuu ñani tnaʼa xiʼin ñayiu.
Se ijan,
ka dandaʼu‑s ñayiu.
Ka kidatniu‑s xa danaa‑s ntdaa xa n‑kida Cristu.
Anticristu ka kuu‑s.
8 Koo koio‑n cuedado.
Maxku dakuita koio‑n xa n‑kida‑n.
Kadatniu koio ka‑n,
xa tnɨɨ koio‑n ntdaa xa taxi Ianyuux.
9 Ɨɨn ñayiu,
nux kueka vaʼa‑i xa dakuaʼa ñaʼa se ijan,
duʼa dandoo‑i tnuʼu n‑dakuaʼa ñaʼa Cristu.
Nux duʼa kuu,
kuu xa n‑dandoo‑i Ianyuux.
Nux nevaʼa ɨɨn ñayiu tnuʼu Cristu xa jandixa naʼi‑i‑ia,
duʼa kunduu‑i xiʼin Taa‑ro Ianyuux,
te kunduu‑i xiʼin Daʼya Yɨɨ‑ia tuku.
10 Nux xee ɨɨn seyɨɨ veʼe‑n,
xa dakuaʼa ñaʼa‑s ɨnka tnuʼu,
tnuʼu ña kuu tnuʼu Cristu,
te maxku kueka vaʼa‑n‑sɨ,
maxku jaʼan‑n xanyuux nuu‑s.
11 Nux jaʼan‑n xanyuux nuu‑s,
kuu ná kuu xa kunduu mee‑n xiʼin mee‑s,
kuu xa chindee‑n‑sɨ xa kada ka‑s kuechi nuu ñayiu.
Idinga tnuʼu
12 Io kueʼe ka tnuʼu juini‑da xa jaʼan‑da,
ko ña juini‑da xa kadavaʼa‑da tnuʼu jan.
Juini‑da xa kotoniʼni ñaʼa‑da,
xa nanitnaʼa nuu‑ro.
Duʼa kuvete ka‑ro,
ntdaa‑ro.
13 Xá n‑jaʼan Ianyuux kuʼu‑n,
xa mee‑ña tuku kunduu‑ña xiʼin‑ia.
Ka tundaʼa daʼya‑ña xanyuux nuu‑n.
Duʼa na koo.