Ndaku ka mee‑ro dada xa io ñuñayiu
5
Ɨɨn ñayiu,
nux jandixa‑i xa Jesús kuu Cristu,
kuu‑i daʼya Ianyuux te xemani‑i Taa‑i Ianyuux.
Te nux xemani‑i Ianyuux,
dɨuni xemani‑i daʼya Ianyuux.
2 Nux xemani‑ro Ianyuux te jandixa‑ro tnuʼu taʼu tniu‑ia,
naʼa‑ro xa xemani‑ro daʼya‑ia tuku.
3 Nux xemani‑ro Ianyuux,
io xa jandixa‑ro tnuʼu taʼu tniu‑ia.
Te ñatu vee xa kada‑ro xa juini mee‑ia,
chi taxnuni mee‑ia anu‑ro.
4 Ɨɨn ñayiu,
nux kuu‑i daʼya Ianyuux,
duʼa ndaku ka mee‑i dada xa io ñuñayiu.
Jandixa‑ro xa Jesús kuu Cristu.
Xaxeʼe xaʼa,
ndaku ka mee‑ro dada xa io ñuñayiu.
5 Ñayiu jandixa xa Jesús kuu Daʼya Yɨɨ Ianyuux,
mee‑i ndaku ka dada davaʼa nga xa io ñuñayiu.
Xa jaʼan ndaa xaxeʼe Daʼya Yɨɨ Ianyuux
6 Na n‑kixi Jesucristu ñuñayiu,
n‑yaʼa‑ia nuu ndute te n‑yaʼa‑ia nuu nɨñɨ.
Kuu ná kuu xa n‑kixi‑ia xiʼin ndute xiʼin nɨñɨ.
N‑yaʼa‑ia nuu ndute hora n‑dajuendute ñaʼa Sua,
te n‑xatu nɨñɨ hora n‑xiʼí‑ia xaxeʼe‑ro.
Jaʼan ndaa Espíritu Ianyuux xa duʼa n‑kuu,
chi xandaa kuu Espíritu Ianyuux.
7 Andɨu io uni xa jaʼan ndaa xaxeʼe Jesucristu:
Taa‑ro Ianyuux,
xiʼin Ia nani Tnuʼu Ianyuux,
xiʼin Espíritu Ianyuux.
Te idini Ianyuux kuu‑ia,
ndruni‑ia.
8 Te ñuñayiu yaʼa io uni xa jaʼan ndaa xaxeʼe Jesucristu:
Espíritu Ianyuux,
xiʼin ndute nuu n‑yaʼa Jesucristu,
xiʼin nɨñɨ Jesucristu n‑xatu.
Te ɨɨn nuu ka jaʼan ndaa ndruni xaʼa.
9 Nux ɨɨn nuu ka jaʼan ndaa uu seyɨɨ,
te io xa jandixa‑ro xa ka jaʼan‑s.
Ko yo yaʼu ka xa jaʼan ndaa Ianyuux,
chi jaʼan ndaa Ianyuux xaxeʼe Daʼya Yɨɨ‑ia.
10 Ɨɨn ñayiu,
nux jandixa‑i Daʼya Yɨɨ Ianyuux,
te jaʼan ndaa Espíritu Ianyuux anu‑i xaxeʼe xaʼa.
Te ɨɨn ñayiu,
nux ñatu jandixa‑i xa jaʼan Ianyuux,
duʼa jaʼan‑i xa jaʼan Ianyuux tnuʼu vete,
chi ña jandixa‑i xa n‑jaʼan ndaa Ianyuux xaxeʼe Daʼya Yɨɨ‑ia.
11 N‑jaʼan ndaa Ianyuux xa n‑kida Jesucristu xa kutuu vaʼa mee‑ro xiʼin mee‑ia kuia ma jɨn ndɨʼɨ.
N‑jaʼan ndaa‑ia xa duʼa koo xaxeʼe xa n‑xiʼí Daʼya Yɨɨ‑ia xaxeʼe‑ro.
12 Nux jandixa ɨɨn ñayiu Daʼya Yɨɨ Ianyuux,
tuu vaʼa‑i xiʼin Ianyuux,
vitna xiʼin nde kuia ma jɨn ndɨʼɨ.
Ko nux ña jandixa ɨɨn ñayiu Daʼya Yɨɨ Ianyuux,
ma kutuu vaʼa‑i xiʼin Ianyuux.
Ɨnka io xa jan doʼo ñaʼa‑da
13 Kidavaʼa‑da carta yaʼa nuu mee‑n ka kuu ñayiu ka jandixa Daʼya Yɨɨ Ianyuux.
Kidavaʼa‑da nuu‑n,
xa kutnuni ini koio‑n xa kutuu vaʼa koio‑n xiʼin Ianyuux kuia ma jɨn ndɨʼɨ.
14 Kuaʼa‑ro xa koo‑ro confianza nuu Ianyuux.
Nux kajan‑ro ɨɨn xa ndoñuʼu‑ro xa kada‑ro xa juini mee‑ia,
naʼa‑ro xa nini ñaʼa‑ia.
15 Te nux naʼa‑ro xa nini ñaʼa‑ia,
davaʼa nga xa xijan‑ro nuu‑ia,
dɨuni naʼa‑ro xa xá n‑taxi‑ia xa n‑xijan‑ro.
16 Nux xini ɨɨn ñayiu xa kida ñani‑i kuʼa‑i kuechi,
io xa kajan taʼu‑i xaxeʼe ñani‑i kuʼa‑i.
Io ɨɨn kuechi,
xa nux na kada‑ro kuechi jan,
te io xa kuú‑ro xiʼin kuechi‑ro.
Ñatu jaʼan‑da xa io xa kajan taʼu‑n xaxeʼe ñani‑n kuʼa‑n kida kuechi yaʼa.
Ko io nga kuechi,
xa nux na kada‑ro kuechi jan,
te ma kuú‑ro xiʼin kuechi‑ro.
Nux duʼa kida ñani‑n kuʼa‑n,
te io xa kajan taʼu koio‑n xaxeʼe‑i,
te kada Ianyuux xa kutuu vaʼa‑i xiʼin‑ia.
17 Ntdaa xa ña kuu xavaʼa kuu kuechi.
Ko io kuechi ma kada xa kuú‑ro nux kida‑ro kuechi jan.
18 Naʼa‑ro xa ɨɨn ñayiu,
nux kuu‑i daʼya Ianyuux,
ma koo xa dani kada ka‑i kuechi.
Chi nevaʼa Daʼya Yɨɨ Ianyuux mee‑i,
te duʼa ma kuaʼa kuiʼna xa kadajuexa ñaʼa‑i xa kada ñayiu jan kuechi.
19 Naʼa‑ro xa n‑ka nduu‑ro daʼya Ianyuux.
Te naʼa‑ro xa xejoon ñayiu ñuñayiu xa taxnuni kuiʼna anu‑i.
20 Naʼa‑ro xa n‑kixi Daʼya Yɨɨ Ianyuux ñuñayiu.
Naʼa‑ro xa n‑kida‑ia xa kutnuni ini‑ro jundu kuu‑ia,
n‑kida‑ia xa jini‑ro Ianyuux Ndaa.
Kunduu‑ro xiʼin Ianyuux Ndaa,
chi kunduu‑ro xiʼin Daʼya Yɨɨ‑ia,
Jesucristu.
Ianyuux Ndaa kuu‑ia,
te kida‑ia xa kutuu vaʼa mee‑ro,
xiʼin mee‑ia kuia ma jɨn ndɨʼɨ.
21 Daʼya kuechi‑da,
koo koio‑n cuedado.
Maxku jandixa‑n santu kidavaʼa ndaʼa se ñuñayiu.
Kunduu naʼi koio ka‑n xiʼin Jesucristu,
Daʼya Yɨɨ Ianyuux Ndito.
Duʼa na koo.