Espíritu Ianyuux xiʼin se kuu anticristu
4
Ñani mani‑da,
kuʼa mani‑da,
maxku jandixa koio‑n davaʼa nga ñayiu jaʼan xa kachitnuʼu‑i tnuʼu Ianyuux.
Kototnuni‑n‑yɨ,
nux ndaa xa jaʼan‑i tnuʼu Ianyuux,
a nux jaʼan‑i tnuʼu kuiʼna.
Chi ñuñayiu,
io kueʼe ñayiu ka jaʼan xa xian tnuʼu‑i tnuʼu Ianyuux nuu ñayiu,
ko ña ndaa.
2 Ɨɨn ñayiu,
nux jandixa‑i xa Jesús kuu Cristu,
Ia kuu Daʼya Yɨɨ Ianyuux,
te dɨuni jandixa‑i xa kuu‑ia Se kuu ñani tnaʼa xiʼin ñayiu,
te xandaa kuu xa ka kachitnuʼu‑i tnuʼu Ianyuux.
Duʼa kutnuni ini‑n xa n‑tundaʼa Espíritu Ianyuux mee‑i.
3 Ɨɨn ñayiu,
nux ñatu jandixa‑i xa Jesús kuu Daʼya Yɨɨ Ianyuux te dɨuni kuu‑ia Se kuu ñani tnaʼa xiʼin ñayiu,
kutnuni ini‑n xa ñatu kachitnuʼu‑i tnuʼu Ianyuux,
kutnuni ini‑n xa jaʼan‑i tnuʼu se kuu anticristu.
Xá n‑ka teku‑n xa kixi se kuu anticristu,
te vitna tuu‑s ñuñayiu.
4 Daʼya kuechi‑da,
mee‑n ka kuu daʼya Ianyuux,
te xijan kuu xa ndaku ka mee‑n dada se ijan.
Taxnuni Ianyuux anu mee‑n,
te taxnuni kuiʼna anu mee‑s.
Ko kueʼe kunxaʼnu ka Ianyuux dada kuiʼna.
Xijan kuu xa unu ndaku ka mee‑n dada mee‑s.
5 Se ijan,
ka kuu‑s se ñuñayiu.
Xijan kuu xa,
tnuʼu ka jaʼan‑s kuu tnuʼu ka jandixa ñayiu ñuñayiu,
te ka xeka vaʼa ñayiu ñuñayiu tnuʼu‑s.
6 Ko mee‑ro,
ka kuu‑ro daʼya Ianyuux.
Ñayiu xini Ianyuux,
ka xeka vaʼa‑i tnuʼu‑ro.
Ñayiu ña ka kuu daʼya Ianyuux,
ña chinuu‑i tnuʼu‑ro.
Nux xeka vaʼa ɨɨn ñayiu tnuʼu‑ro,
te xini‑ro xa taxnuni Espíritu Ianyuux anu‑i.
Nux ñatu chinuu ɨɨn ñayiu tnuʼu‑ro,
te xini‑ro xa taxnuni se kuu anticristu anu‑i.
Ɨɨn kuu xandaa,
ko ɨnka kuu xa ña ndaa.
Ianyuux kuu Ia xemani ntdaa ñayiu
7 Ñani mani‑da,
kuʼa mani‑da,
na juemani tnaʼa‑ro,
chi nux xemani tnaʼa‑ro,
kutnuni ini‑ro xa taxnuni Ianyuux anu‑ro.
Nux xemani ɨɨn ñayiu ñani‑ro kuʼa‑ro,
kuu‑i daʼya Ianyuux te xini‑i Ianyuux.
8 Nux ñatu xemani ɨɨn ñayiu ɨnka ñayiu,
ta jini ka‑i Ianyuux,
chi Ianyuux kuu Ia xemani ntdaa ñayiu.
9 Hora n‑tundaʼa Ianyuux Daʼya Yɨɨ‑ia ñuñayiu,
n‑dandeʼa ñaʼa‑ia mee‑ro xa xemani ñaʼa‑ia.
Idini Daʼya Yɨɨ Ianyuux io.
10 Xaxeʼe xa jandixa‑ro mee‑ia,
xtuu vaʼa‑ro xiʼin Ianyuux.
Xaxeʼe Daʼya Yɨɨ‑ia,
xemani Ianyuux ñayiu.
Juini ña n‑ka xemani mee‑ro mee‑ia,
ko n‑xemani ñaʼa mee‑ia mee‑ro.
N‑tundaʼa‑ia Daʼya Yɨɨ‑ia ñuñayiu,
xa chiyaʼu‑ia kuechi‑ro,
na n‑xiʼí‑ia nuu curuxi.
11 Ñani mani‑da,
kuʼa mani‑da,
nux duʼa n‑xemani ñaʼa Ianyuux mee‑ro,
dɨuni io xa juemani tnaʼa mee‑ro.
12 Nuncas ña n‑xini ni ɨɨn ñayiu xiʼin nuu‑i Ianyuux.
Ko nux xemani tnaʼa‑ro,
duʼa xini‑ro xa tuu Ianyuux xiʼin‑ro te kida‑ia xa xemani‑ro mee‑ia xiʼin ñayiu.
13 Duʼa kutnuni ini‑ro xa kunduu mee‑ro xiʼin mee‑ia te kunduu mee‑ia xiʼin mee‑ro,
chi xá n‑taxi‑ia Espíritu mee‑ia.
14 Xiʼin nuu mee‑da,
n‑ka xini‑da Daʼya Yɨɨ Ianyuux.
Ka jaʼan ndaa‑da xa n‑tundaʼa Ianyuux Daʼya Yɨɨ‑ia ñuñayiu,
xa dakaku‑ia ñayiu ñuñayiu,
xa ma kuú koio‑i xiʼin kuechi‑i.
15 Ɨɨn ñayiu,
nux jandixa‑i xa Jesús kuu Daʼya Yɨɨ Ianyuux,
duʼa kunduu Ianyuux xiʼin mee‑i,
te kunduu mee‑i xiʼin Ianyuux.
16 Duʼa kutnuni ini‑ro xa xemani ñaʼa Ianyuux mee‑ro.
Te duʼa jandixa‑ro xa xemani ñaʼa‑ia mee‑ro.
Ianyuux kuu Ia xemani ñayiu.
Nux xemani ɨɨn ñayiu Ianyuux xiʼin ñayiu,
kunduu mee‑i xiʼin Ianyuux,
te kunduu Ianyuux xiʼin mee‑i.
17 Duʼa kida Ianyuux xa xemani‑ro mee‑ia.
Te ma yuʼu‑ro nuu Jesucristu,
na ndixi‑ia xa ndadandaa‑ia ntdaa xa io.
Chi juini dani tuu‑ro ñuñayiu,
ko ná kuu mee‑ia da ka kuu mee‑ro tuku.
18 Ñatu yuʼu‑ro nuu Ianyuux,
chi kutnuni ini‑ro xa xemani ñaʼa‑ia mee‑ro.
Nux yuʼu ɨɨn ñayiu nuu Ianyuux,
kuu xa ndetu‑i xa kada uʼu ñaʼa Ianyuux mee‑i.
Nux yuʼu‑i nuu Ianyuux,
kuu xaxeʼe xa ta kutnuni ini ka‑i xa xemani Ianyuux mee‑i,
te ta xee ka‑i xa juemani mee‑i Ianyuux.
19 Xemani‑ro Ianyuux,
xaxeʼe xa n‑xemani ñaʼa Ianyuux mee‑ro kiʼna nuu.
20 Ɨɨn ñayiu,
nux jaʼan‑i xa xemani‑i Ianyuux,
ko xini uʼu‑i ñani‑i kuʼa‑i,
kuu‑i ɨɨn ñayiu jaʼan tnuʼu vete.
Nux ndeʼa‑i ñani‑i kuʼa‑i,
te ñatu xemani‑i‑yɨ,
¿janda kuaʼa‑i xa juemani‑i Ianyuux,
Ia ña ndeʼa‑i?
21 Te xaʼa kuu tnuʼu n‑taʼu tniu Ianyuux.
Nux xemani ɨɨn ñayiu Ianyuux,
io xa juemani‑i ñani‑i kuʼa‑i tuku.