Carta kuu uni n‑kidavaʼa Sua
Xá n‑teku‑r xa kida‑n xa kuu xavaʼa
1
Mee‑r,
sexaʼnu,
kidavaʼa‑r carta yaʼa nuu Gayo,
se mani xiʼin‑r.
Xandaa kuu xa xemani ñaʼa‑r.
2 Ñani mani‑r,
xijan taʼu‑r nuu Ianyuux xa taxi‑ia ntdaa xa ndoñuʼu‑n.
Xaxeʼe xa kunduu‑n xiʼin xa kuu xandaa,
te naʼa‑r xa tuu vaʼa anu‑n.
Xijan taʼu‑r xa kutuu vaʼa yɨkɨ kuñu‑n tuku.
3 Yo n‑kuvete‑r hora n‑ka kixi ñani‑ro.
N‑ka jaʼan mee‑s xa jandixa‑n xa kuu xandaa,
te kunduu‑n xiʼin xa kuu xandaa.
4 Kuvete‑r xa kuvete ka‑r,
hora teku‑r xa ka kunduu naʼi ka daʼya kuechi‑r xiʼin xa kuu xandaa.
Ña tuu ɨnka xa duʼa kada xa duʼa kuvete‑r xa kuvete ka‑r.
5 Ñani mani‑r,
teku‑r xa vaʼa chindee‑n ñani‑ro kuʼa‑ro,
hora xee‑s ñuu‑n.
Teku‑r xa juini setoʼo ka kuu‑s,
ko vaʼa xitondee‑n‑sɨ.
6 Nuu ñayiu ka jandixa Jesucristu,
n‑ka jaʼan‑s xa xemani‑n‑sɨ te chindee‑n‑sɨ.
Se n‑tundaʼa Ianyuux ka kuu‑s.
Kada ka xamani xa chindee naʼi‑n‑sɨ ichi jɨʼɨn‑s,
xa juñaʼa‑n‑sɨ ntdaa xa ndoñuʼu‑s.
7 Xaxeʼe Jesucristu ka xeʼen‑s,
te ña juini‑s xa kundeka ñaʼa ñayiu ña kunduu xiʼin Jesucristu.
8 Xijan kuu xa io xa kueka vaʼa mee‑ro mee‑s,
xa kadatniu‑ro xiʼin‑s hora xian tnuʼu‑s xa kuu xandaa nuu ñayiu.
Kida Diótrefes xa uʼu
9 Xá n‑kidavaʼa‑r nuu ntdaa ñayiu ka jandixa Cristu ñuu‑n,
ko ña n‑xeka vaʼa se nani Diótrefes tnuʼu‑r.
Kukajan ini Diótrefes xa ku kuu mee‑s se kunxaʼnu nuu‑n.
10 Xijan kuu xa nux naxee‑r ñuu‑n,
te dandeʼa‑r ntdaa ñayiu xa jan tnuʼu ñaʼa‑s te jaʼan‑s tnuʼu vete.
Ña xeka vaʼa‑s ñani‑ro kuʼa‑ro.
Te nux juini ɨɨn ñayiu xa kueka vaʼa‑i‑yɨ,
ma juejoon‑s xa duʼa kada‑i.
Jaʼan‑s xa ñayiu xeka vaʼa ñani‑ro kuʼa‑ro,
ma kuaʼa‑i xa nataka ka‑i xiʼin ñayiu ka jandixa Cristu.
11 Ñani mani‑r,
maxku kada mee‑n ná kida Diótrefes.
Kada naʼi ka xavaʼa.
Nux kida ɨɨn ñayiu xavaʼa,
duʼa kunduu‑i xiʼin Ianyuux.
Ko nux kida ɨɨn ñayiu xa uʼu,
ta jini ka‑i Ianyuux.
Ɨɨn ichi kaneʼe katnɨɨ ñayiu kuu Demetrio
12 Jaʼan ndaa ntdaa ñayiu xa kida se nani Demetrio xavaʼa.
Xandaa kuu xa duʼa kida‑s.
Dɨuni ka jaʼan ndaa mee‑r xaxeʼe‑s,
te xnaʼa mee‑n xa ka jaʼan‑r xa kuu xandaa.
Idinga tnuʼu
13 Io kueʼe ka tnuʼu juini‑r xa jaʼan‑r,
ko ña juini‑r xa kadavaʼa‑r tnuʼu jan.
14 Ndetu‑r xa yachi jini ñaʼa‑r.
Nanitnaʼa nuu‑ro,
te hora ijan jaʼan ka‑ro.
15 Na kada Ianyuux xa kutuu vaʼa‑n.
Se mani xiʼin‑ro yaʼa,
ka tundaʼa‑s xanyuux nuu‑n.
Kada favor,
xa juñaʼa‑n xanyuux mee‑r nuu ɨɨn ɨɨn se mani xiʼin‑r ijan.