3 Ñani mani‑da,

kuʼa mani‑da,

yo kueʼe n‑juini‑da xa kadavaʼa‑da ntdaa xa n‑kida Ianyuux xaxeʼe‑ro,

xa n‑dakaku ñaʼa‑ia xa ma kuú‑ro xiʼin kuechi‑ro.

Ko danaa n‑ndoñuʼu xa kadavaʼa‑da nuu‑n xa io xa dadaʼan koio mee‑n tnuʼu vaʼa n‑tnɨɨ‑ro.

Ñayiu n‑kida dɨɨn Ianyuux ka kuu‑ro.

Idini vuelta n‑taxi‑ia tnuʼu vaʼa jandixa‑ro,

te ma dama‑ia tnuʼu jan.

Xijan‑da nuu‑n xa jandixa‑n xa jandixa koio ka‑n tnuʼu jan.

4 Xá n‑ka kɨu ñayiu meʼñu mee‑n ka dandaʼu ñaʼa‑i.

Xá n‑kuu kuia,

yodotnuni xa kada uʼu Ianyuux ñayiu yaʼa.

Ñayiu ka kuxee ini nuu Ianyuux ka kuu‑i.

Ka jaʼan‑i xa xaxeʼe xa n‑taxkanu ini Ianyuux kuechi‑i,

te kuaʼa‑i xa kada‑i davaʼa nga xa ka juini‑i.

Ka jaʼan‑i xa ka jandixa‑i Ianyuux taxnuni nuu ntdaa xa io,

ko ña ndaa.

Xiʼin xa ka kida‑i,

kuu xa ñatu ka jandixa‑i Xtoʼo‑ro Jesucristu.

5 Xá xnaʼa mee‑n ntdaa xa jaʼan‑da vitna,

ko juini‑da xa nadajaʼan ñaʼa‑da xa n‑kida Xtoʼo‑ro Ianyuux.

N‑dakaku Ianyuux ñayiu Israel xa kee‑i,

ntdaa‑i,

Egipto,

ko dada n‑xaʼni‑ia ntdaa ñayiu ña n‑ka jandixa ka n‑ka xo tnaʼa meʼñu ñayiu jan.

6 Ángel,

ia n‑ka xinokuechi nuu Ianyuux,

du.

Juini n‑ka taxnuni‑ia nuu taxnuni Ianyuux,

ko n‑ka dandoo‑ia nuu taxnuni‑ia.

Nevaʼa Ianyuux mee‑i,

nde kɨu kaʼnu ndadandaa‑ia ntdaa xa io.

Nuu nee xyɨndiʼu‑i,

xiʼin cadena nuncas ma taʼnde.

7 Ñuu nani Sodoma xiʼin ñuu nani Gomorra,

xiʼin ntdaa ɨnka ñuu xndatuu ijan.

N‑ka kida ñayiu ntdaa xa n‑ka kukajan ini‑i.

N‑ka kidi xiʼin davaʼa nga ñayiu n‑ka juini‑i,

te kueʼe xa kueʼe xa kuiʼa kaa n‑ka kida‑i.

Ɨɨn ichi maxku kaneʼe katnɨɨ mee‑ro ka kuu‑i.

N‑kida uʼu Ianyuux ñayiu jan yañuʼu nuncas ma ndaʼva.

8 Te xijan ka kida ñayiu ka dandaʼu ñaʼa mee‑n.

Ná jaʼan xene ka jaʼan‑i.

Ka kida‑i davaʼa nga xa kukajan ini‑i.

Xa kuiʼa kaa ka kida‑i nuu yɨkɨ kuñu mee‑i.

Ka kuxee ini‑i nuu davaʼa nga xa taxnuni nuu‑i.

Kuiʼa ka jaʼan‑i ntdaa xa io andɨu.

9 Ko nde ángel Miguel,

ia kunxaʼnu ka xinokuechi nuu Ianyuux,

ña kuiʼa n‑jaʼan‑ia nuu kuiʼna.

Na jantnaʼa niʼna‑ia xiʼin‑i jundu niʼi yɨkɨ kuñu ndi Moisés,

ña n‑kida uʼu‑ia‑i.

Diko ni n‑jaʼan‑ia:

“Na ndadandaa ñaʼa Xtoʼo‑ro Ianyuux.”

10 Ñayiu ka dandaʼu ñaʼa mee‑n,

kuiʼa ka jaʼan‑i nuu xa ñatu ka kutnuni ini.

Te xa ka kutnuni ini‑i,

ná ka kutnuni ini kɨtɨ,

ka xetniu‑i xa danaa koio‑i mee‑i.

11 Na kada uʼu Ianyuux ñayiu jan.

Ná n‑kida Caín,

da n‑ka kida mee‑i.

Xaxeʼe xa ka juini‑i tvini,

n‑ka kida‑i xa uʼu,

ná n‑kida Balaam.

Ná n‑xiʼí Coré xaxeʼe xa n‑kuxee ini‑s,

da kuú koio mee‑i tuku.

12 Xa kuiʼa kaa ka kuu ñayiu jan hora ka xaxi‑i xiʼin‑n.

Ka xaxi kaʼnu mee‑n,

xaxeʼe xa ka xemani tnaʼa‑n.

Ko mee‑i,

ndeʼe ka xaxi ka xiʼi‑i,

te ñatu ka kune ini‑i.

Ná kuu vikó ñatu dajuun dau,

juaʼan vaxi ndeka ñaʼa tachi,

da ka kuu‑i.

Ná kuu yutnu ñatu juun xavidi,

te n‑kane‑tnu xiʼin nde yoʼo‑tnu,

da ka kuu‑i.

13 Ná kuu ndute mar,

hora ndeʼe tuxndee ndute,

ka kuu‑i.

Ná kuu t‑iñu ndute jan,

kuu xa ka kida‑i xa januu.

Ná kuu chudini juaʼan duʼa duʼa,

ka kuu‑i.

Nevaʼa Ianyuux ɨɨn nuu nee xa nee xaxeʼe‑i,

nuu kutuu koio‑i nɨkava nɨkuita.

14 Duʼa n‑jaʼan Enoc tuku.

Se kuu uxa,

raza Adán n‑kuu‑s.

Se xian tnuʼu tnuʼu Ianyuux nuu ñayiu n‑kuu‑s.

N‑kakuneʼe‑s xa yaʼa ñayiu jan,

na n‑jaʼan‑s:

“Kundeʼa koio‑n.

Vaxi Xtoʼo‑ro xiʼin ia ka xinokuechi nuu‑ia.

Kueʼe xa kueʼe xa kueʼe‑ia vaxi xiʼin‑ia.

15 Ndadandaa Xtoʼo‑ro ntdaa ñayiu.

Kada uʼu‑ia ntdaa ñayiu ña n‑ka jandixa‑ia.

Kada uʼu‑ia ñayiu jan,

xaxeʼe xa n‑ka kida‑i ntdaa xa ka kida ñayiu ña ka jandixa‑ia.

Kada uʼu‑ia‑i,

xaxeʼe xa duʼa n‑ka kida‑i,

xaxeʼe xa ña n‑ka jandixa‑i mee‑ia.

Kada uʼu‑ia‑i,

xaxeʼe ntdaa tnuʼu ndeʼe n‑ka jaʼan‑i nuu‑ia,

xaxeʼe xa ñayiu ka kida kuechi ka kuu‑i,

ñayiu ña ka jandixa mee‑ia.”

16 Ka jan kuechi‑i te ka jan tnuʼu‑i.

Ka kida‑i ntdaa xa kukajan ini‑i xa kada‑i.

Ka najuen tnuʼu‑i mee‑i,

te vaʼa ka jaʼan‑i nuu ɨnka ñayiu,

xa niʼi koio‑i xa juini mee‑i.

17 Ko mee‑n,

ñani mani‑da,

kuʼa mani‑da,

najaʼan koio mee‑n nax n‑ka jaʼan se n‑tundaʼa ñaʼa Xtoʼo‑ro Jesucristu.

18 N‑ka jaʼan‑s:

“Kɨu jɨn ndɨʼɨ ntdaa xa io,

kɨu ijan,

koo koio ñayiu kuxee ini,

ñayiu ña ka jandixa Ianyuux,

ñayiu ka kida davaʼa nga xa juini mee‑i.”

19 Ka xaʼnde tnaʼa‑i,

te ka kida dɨɨn ñaʼa‑i mee‑n.

Ka xani ini‑i meni xa xani ini ñayiu ñuñayiu,

te ñatu kidatniu Espíritu Ii anu‑i.

20 Ko mee‑n,

ñani mani‑da,

kuʼa mani‑da,

jandixa naʼi koio ka‑n Ianyuux.

Jandixa naʼi koio ka‑n tnuʼu vaʼa xa n‑tnɨɨ‑ro.

Xa ii kuu,

xa n‑taxi Ianyuux kuu.

Na juejoon koio‑n xa kadatniu Espíritu Ii anu‑n,

xa kajan taʼu koio ka‑n nuu Ianyuux.

21 Kada koio ka‑n xa juini Ianyuux,

xa juemani ñaʼa‑ia.

Te kundetu koio ka‑n,

xa kundau ini ñaʼa Xtoʼo‑ro Jesucristu,

xa kada‑ia xa kutuu vaʼa koio‑n xiʼin‑ia kuia ma jɨn ndɨʼɨ.

22 Ñayiu ñatu ka jandixa vaʼa,

chindee koio‑n‑yɨ xa jandixa vaʼa koio‑i.

23 Ɨnka ñayiu,

xaxeʼe kuechi ka kida‑i,

te kuu ná kuu xa dakaku‑n‑yɨ nuu yañuʼu koko.

Te ɨnka ñayiu,

kundau ini koio‑n‑yɨ.

Ko dɨuni yuʼu koio‑n.

Jini uʼu koio‑n nde daʼma‑i,

chi kuiʼa kaa xa n‑ka kida‑i.

Koo koio‑n cuedado,

xa maxku kada koio mee‑n ná n‑ka kida mee‑i.

24 Kuaʼa Ianyuux xa kunevaʼa ñaʼa‑ia,

xa ma kada koio‑n kuechi.

Ia kunxaʼnu ka kuu‑ia.

Taxnuni‑ia nuu ntdaa xa io.

Kuaʼa‑ia xa kada‑ia xa kunujuiin koio mee‑n nuu mee‑ia,

te ma tekuechi ñaʼa ni ɨɨn,

te kuvete koio‑n xa kuvete koio‑n.

25 Idini Ianyuux kuu‑ia.

Kutnuni ini‑ia ntdaa xa io.

Ia dakaku ñaʼa mee‑ro kuu‑ia,

kida‑ia xa ma kuú‑ro xiʼin kuechi‑ro.

Xaxeʼe Xtoʼo‑ro Jesucristu,

na juñaʼa‑ro xa n‑kutaʼu‑ro nuu‑ia.

Ia kunxaʼnu ka kuu‑ia.

Taxnuni‑ia nuu ntdaa xa io.

Kida‑ia ntdaa xa juini‑ia.

Duʼa n‑kuu‑ia,

antecas xa kadavaʼa‑ia ntdaa xa io.

Duʼa kuu‑ia vitna.

Duʼa ku kuu‑ia,

kuia ma jɨn ndɨʼɨ.

Duʼa na koo.