Se ka jaʼan xa se xian tnuʼu tnuʼu Ianyuux nuu ñayiu ka kuu‑s, ko ña ndaa
2
Ko meʼñu ñayiu Israel n‑ka xio ɨnka seyɨɨ tuku.
N‑ka jaʼan‑s xa ka kuu‑s se xian tnuʼu tnuʼu Ianyuux nuu ñayiu,
ko ña ndaa.
Dɨuni meʼñu mee‑n.
Vaxi se ka jaʼan xa dakuaʼa ñaʼa‑s tnuʼu Ianyuux,
ko ña ndaa.
Naʼi ni dakuaʼa ñaʼa‑s tnuʼu ñatu kuu tnuʼu Ianyuux.
Tnuʼu danaa ñaʼa kuu tnuʼu‑s.
Duʼa koo xa ñatuka najini‑s Xtoʼo‑ro,
Ia dakaku ñaʼa.
Duʼa kada koio‑s xa yachi danaa‑ia‑s.
2 Kada koio‑s davaʼa nga xa juini‑s,
te kueʼe ñayiu kunduu xiʼin‑s.
Te xaxeʼe se ijan,
kuiʼa jaʼan ñayiu ichi xandaa.
3 Se ijan,
ka juini‑s xa niʼi‑s xa niʼi ka‑s.
Kuu ná kuu xa diko ñaʼa‑s te xeen ñaʼa‑s.
Xiʼin tnuʼu vete dandaʼu ñaʼa‑s.
Xá n‑kuu kueʼe kuia,
xá n‑jaʼan Ianyuux nax kada‑ia.
Xini‑ia se ijan,
ñatu kidi‑ia.
Ndadandaa‑ia‑s,
te danaa‑ia‑s.
4 Nde ángel,
ia n‑ka xinokuechi nuu Ianyuux du.
Ña n‑ka jandixa‑ia Ianyuux,
te ña n‑taxkanu ini ñaʼa Ianyuux.
N‑tundaʼa Ianyuux ángel jan andea.
N‑chindiʼu ñaʼa‑ia ɨɨn nuu nee.
Ijan nevaʼa‑ia ángel jan xiʼin cadena,
nde kɨu ndadandaa‑ia ntdaa xa io.
5 Dɨuni ñuñayiu kiʼna nuu.
Ña n‑ka jandixa ñayiu ijan Ianyuux,
te ña n‑taxkanu ini Ianyuux ñayiu jan.
Xiʼin dau ndeʼe n‑xaʼni‑ia‑i,
ntdaa‑i.
Diko ni n‑dakaku‑ia se nani Noé,
se xian tnuʼu nuu ñayiu xa io xa kada koio‑i xavaʼa.
N‑dakaku Ianyuux mee‑s xiʼin uxa tnaʼa ñayiu veʼe‑s.
6 Dɨuni ñuu nani Sodoma xiʼin ñuu nani Gomorra.
Ñuu ijan n‑teñuʼu Ianyuux.
Menga yaa n‑nduu.
N‑ndadandaa‑ia ñayiu jan,
te n‑danaa‑ia‑i.
N‑kida‑ia xaʼa,
xa maxku kaneʼe katnɨɨ ñayiu ichi yaʼa,
te maxku kuxee ini ñayiu nuu Ianyuux.
7 Se nani Lot,
se kida xavaʼa,
se ijan n‑dakaku‑ia.
Ña n‑kuaʼa Lot xa kundee ini‑s xa uʼu n‑ka kida ñayiu jan,
ñayiu ña n‑juini xa jandixa‑i Ianyuux.
8 Meʼñu ñayiu jan n‑xo tuu se ijan,
se kida xavaʼa.
Kɨu xiʼin kɨu n‑xini‑s te n‑teku‑s ntdaa xa ka kida ñayiu jan.
Se kida xavaʼa kuu‑s.
Kueʼe vida n‑yaʼa anu‑s xaxeʼe kuechi n‑ka kida ñayiu jan.
Ñayiu juini xa kuxee ini‑i nuu Ianyuux n‑ka kuu‑i.
9 Kuaʼa Ianyuux xa dakaku‑ia ñayiu jandixa mee‑ia hora kueʼe vida ka yaʼa‑i.
Te kuaʼa‑ia xa kunevaʼa‑ia ñayiu ka kida xa uʼu,
xa kada uʼu‑ia‑i na ndadandaa‑ia ntdaa xa io.
10 Xandaa kuu xa ndadandaa Ianyuux ñayiu ka kida davaʼa nga xa juini‑i.
Ka kida‑i ntdaa xa kukajan ini‑i.
Kuiʼa ka xani ini‑i,
kuiʼa ka kida‑i,
kuiʼa ka kuu‑i.
Ñayiu ña ka jandixa ñayiu ni Ianyuux ka kuu‑i.
Yo unu ndeʼe‑i,
niʼi‑i xa juini mee‑i.
Nde ángel,
ia ka xinokuechi nuu Ianyuux,
duʼa ñatu yuʼu ñayiu jan xa kuiʼa jaʼan‑i nuu‑ia.
11 Ko ángel,
ia ka xinokuechi nuu Ianyuux,
duʼa ñatu ka kida mee‑ia.
Juini unu ndaku ka‑ia dada ángel ña n‑ka jandixa Ianyuux,
te kunxaʼnu ka‑ia dada ángel jan,
ko ñatu kuyɨka‑ia xa kada uʼu‑ia ángel jan nuu Ianyuux.
12 Se ijan,
se ka jaʼan xa dakuaʼa ñaʼa‑s tnuʼu Ianyuux,
ko ña ndaa,
ná kuu kɨtɨ ka kuu‑s.
Ñatu ka kutnuni ini‑s,
ná kuu kɨtɨ ñatu xani ini,
da ka kuu‑s.
Ná kuu kɨtɨ diko ni kaku‑tɨ,
xa tnɨɨ ñaʼa ñayiu xa kaʼni‑i‑tɨ,
da ka kuu‑s.
Kuiʼa ka jaʼan‑s nuu xa ña ka kutnuni ini‑s,
te ná xiʼí kɨtɨ da kuú koio‑s.
13 Ná n‑ka kida‑s xa kueʼe vida ka yaʼa ɨnka ñayiu,
dani kueʼe vida yaʼa koio mee‑s tuku.
Ka kida‑s davaʼa nga xa ka kukajan ini‑s xa kudɨ ini‑s.
Meni xa januu ka taxi‑s nɨni ka xax kaʼnu‑s xiʼin‑n,
te dani ka kida‑s davaʼa nga xa uʼu ka juini‑s.
14 Davaʼa nga ñadɨʼɨ ka xini‑s,
ka kukajan ini‑s,
te nuncas ña ka dandoo‑s kuechi ka kida‑s.
Te ka kidajuexa‑s ñayiu ñatu xini vaʼa,
xa duʼa kada koio mee‑i tuku.
Ka niʼi‑s davaʼa nga xa juini‑s,
te ka juini‑s davaʼa nga xa io.
Daʼya andea ka kuu‑s.
15 Xá n‑ka dandoo‑s ichi ndaa.
Yo ka kudoʼo‑s,
ka xika‑s ichi n‑xo xika se n‑xo nani Balaam,
daʼya yɨɨ se n‑xo nani Beor.
N‑kida Balaam kuechi,
xa niʼi‑s tvini n‑kukajan ini‑s.
16 N‑kudeen Ianyuux nuu‑sɨ,
xaxeʼe xa n‑xo kida‑s kuechi.
Ɨɨn burru,
ña kuaʼa‑tɨ xa jaʼan‑tɨ,
ko n‑kida Ianyuux xa tnuʼu seyɨɨ n‑jaʼan ɨɨn burru nuu Balaam.
N‑kida ɨɨn burru xa ma kada ka‑s kuechi.
17 Se ijan,
ka kuu‑s ná kuu ɨɨn doko ña tuu na ndute.
Ná kuu vikó tundaʼa tachi ndeʼe ka kuu‑s.
Xaxeʼe‑s,
io tuʼa ɨɨn nuu nee xa nee,
nuu kutuu koio‑s kuia ma jɨn ndɨʼɨ.
18 Se ijan,
ka najuen tnuʼu‑s mee‑s,
ka jaʼan‑s tnuʼu ñatu xiniñuʼu.
Xiʼin tnuʼu yo vaʼa ka dajaʼan‑s ñayiu,
xa kada koio‑i davaʼa nga xa juini‑i,
davaʼa nga xa kukajan ini‑i.
Te xiʼin tnuʼu jan,
ka dandaʼu‑s ñayiu dijan n‑ka kaku nuu yuku ñayiu ka kida kuechi.
19 Se ijan,
ka xiaʼan‑s tnuʼu‑s xa kutuu libre ñayiu kada ná ka kida mee‑s.
Ko mee‑s ka kuu se xinokuechi nuu xa uʼu ka kida‑s.
Xá n‑ka xejoon‑s xa kidajuexa ñaʼa xa uʼu,
xa kada‑sɨ xa kada ka‑sɨ xa uʼu.
Xtoʼo‑s kuu xa uʼu ka kida‑s.
20 N‑ka kaku‑s nuu xa uʼu io ñuñayiu,
xa kunduu‑s xiʼin Xtoʼo‑ro Jesucristu,
chi Ia dakaku ñaʼa mee‑ro kuu‑ia.
Ko vitna xá n‑ka dandoo‑s Jesucristu,
xa kada ka‑s xa uʼu.
Antecas xa kixeʼe koio‑s xa kunduu‑s xiʼin Cristu,
n‑ka xo kida‑s kuechi,
ko vitna,
ka kida‑s xa ka kida naʼi ka‑s kuechi yo uʼu ka dada kuechi n‑ka xo kida‑s kɨu ijan.
21 Vaʼa ka nux ña n‑ka kɨu‑s ichi nuu ka kida ñayiu xavaʼa n‑kuu.
N‑ka teku vaʼa‑s tnuʼu Ianyuux,
te dada n‑ka daxio‑s tnuʼu taʼu tniu Ianyuux,
tnuʼu ii n‑xiaʼan‑ia.
22 Ná jaʼan ñayiu,
duʼa n‑kuu:
“Ɨɨn ti‑ina,
kuiko‑tɨ xa nakaxi‑tɨ xa n‑kane ini‑tɨ.
Te ɨɨn kuchi,
dijan n‑xichi‑tɨ te jɨʼɨn‑tɨ xa nukava‑tɨ nuu ndeʼyu.”