Ndixi Xtoʼo‑ro Jesucristu
3
Ñani mani‑da,
kuʼa mani‑da,
carta yaʼa kuu carta kuu uu kidavaʼa‑da nuu‑n.
Nduu carta n‑kidavaʼa‑da xa kada‑da xa kani ini vaʼa koio‑n.
Juini‑da xa najaʼan vaʼa koio‑n nax n‑ka teku‑n.
2 Xá n‑kuu kueʼe kuia,
se xian tnuʼu tnuʼu Ianyuux nuu ñayiu,
n‑ka jaʼan‑s tnuʼu Ianyuux nuu ñayiu n‑xo tuu kɨu ijan.
N‑kida dɨɨn Ianyuux se ijan,
xa kada koio‑s xa juini mee‑ia.
Juini‑ia xa najaʼan koio‑n nax n‑ka jaʼan‑s.
Dɨuni juini‑ia xa najaʼan koio‑n tnuʼu taʼu tniu n‑ka jaʼan se n‑tundaʼa Jesucristu nuu‑n.
Xtoʼo‑ro kuu Jesucristu,
Ia dakaku ñaʼa mee‑ro kuu‑ia.
3 Ditna ka,
io xa kutnuni ini koio‑n nax koo,
hora jɨn ndɨʼɨ ntdaa xa io.
Kɨu ijan,
kixee koio se ñatu jandixa Ianyuux,
se kada bula Ianyuux.
Te kada koio‑s davaʼa nga xa kukajan ini mee‑s.
4 Jaʼan koio‑s:
“¿N‑taxi‑ia tnuʼu‑ia xa ndixi‑ia u?
Nux duʼa kuu,
¿nax kuu xa ña n‑kida‑ia ná n‑jaʼan‑ia?
Nde kɨu n‑ka xiʼí taxaʼnu tnetnu‑ro xiʼin nde vitna,
ta ndixi ka‑ia.
Nani n‑kuu,
nde na n‑kuaʼa ntdaa xa io,
dani kuu nde vitna.”
5 Ko se ijan,
ña ka juini‑s xa chinuu koio‑s nax n‑kuu xá n‑kuu kueʼe xa kueʼe kuia.
Xiʼin tnuʼu‑ia,
n‑kidavaʼa Ianyuux andɨu.
Xiʼin tnuʼu‑ia,
n‑kidavaʼa‑ia ñuʼu nuu n‑xio ndute,
te xaxeʼe ndute n‑xio ñuʼu.
6 Te dada,
xiʼin tnuʼu‑ia,
n‑danaa‑ia ntdaa xa n‑xio ñuñayiu kiʼna nuu.
N‑tundaʼa‑ia dau ndeʼe,
te xiʼin ndute jan,
n‑danaa‑ia ntdaa xa n‑xio.
7 Te xiʼin tnuʼu‑ia,
nevaʼa‑ia ñuñayiu xiʼin andɨu io vitna,
nde kɨu ndadandaa‑ia ntdaa xa io.
Kɨu ijan,
nuu ñuʼu koko danaa‑ia ñayiu ña n‑ka juini xa jandixa‑i‑ia.
8 Ñani mani‑da,
kuʼa mani‑da,
io xa kutnuni ini koio‑n xaʼa.
Nuu Ianyuux,
idini kɨu kuu ná kuu ɨɨn mil kuia.
Te ɨɨn mil kuia kuu ná kuu idini kɨu.
9 Xá n‑taxi Xtoʼo‑ro tnuʼu‑ia,
te duʼa kada‑ia.
Ka jaʼan ñayiu xa yo kukuee‑ia,
ko ña ndaa.
Diko ni ndetu kuee ñaʼa‑ia mee‑ro.
Ña juini‑ia xa ni ɨɨn ñayiu maxku kuú‑i xiʼin kuechi‑i.
Juini‑ia xa natu ini koio ntdaa ñayiu kuechi‑i,
xa dandoo‑i kuechi‑i,
xa kunduu koio‑i xiʼin mee‑ia.
10 Nani kɨu ɨɨn ñaduʼu ɨɨn veʼe,
dani kuu xa ndixi Xtoʼo‑ro Jesucristu.
Kayu nɨʼɨ andɨu,
hora na jɨn ndɨʼɨ andɨu.
Ɨɨn xa iʼni ka danaa ngandii xiʼin yoo xiʼin chudini.
Nuu ñuʼu koko kayu ñuñayiu xiʼin ntdaa xa io ñuñayiu.
11 Duʼa kada Ianyuux,
xa danaa‑ia ntdaa xa io.
Xaxeʼe xa ka xini‑n xaʼa,
io xa kada koio‑n xa juini Ianyuux,
io xa kunduu koio ka‑n xiʼin‑ia.
12 Kundetu naʼi koio ka‑n kɨu ndadandaa Ianyuux ntdaa xa io.
Kadatniu naʼi koio ka‑n xa yachi ndixi Jesucristu.
Kɨu ijan,
teñuʼu Ianyuux andɨu,
te nandute ntdaa andɨu.
Xiʼin xa iʼni ka danaa‑ia ngandii,
yoo,
chudini.
13 Ko xndetu mee‑ro andɨu xee xiʼin ñuñayiu xee.
Xá n‑taxi Ianyuux tnuʼu‑ia xa duʼa koo.
Ijan kutuu‑ro,
te kada‑ro xavaʼa.
Kida Ianyuux meni xavaʼa,
te ijan kada mee‑ro meni xavaʼa.
14 Ñani mani‑da,
kuʼa mani‑da,
xijan kuu xa,
nɨni kundetu koio‑n xaʼa,
kada koio‑n xa juini Ianyuux,
xa maxku yuʼu‑n nuu‑ia na ndixi Jesucristu.
Kada koio‑n xavaʼa,
xa ni ɨɨn xa maxku tekuechi ñaʼa.
Kutuu mani koio‑n xiʼin Ianyuux xiʼin ñayiu.
15 Io xa kutnuni ini koio‑n xa kukuee Xtoʼo‑ro Jesucristu,
xa dakaku‑ia kueʼe ka ñayiu.
Dɨuni n‑kakuneʼe Spalu xaʼa,
na n‑kidavaʼa‑s nuu‑n.
Ñani mani‑ro kuu Spalu.
N‑kida Ianyuux xa kutnuni ini vaʼa‑s ntdaa xaʼa.
16 Ntdaa carta n‑kidavaʼa Spalu n‑kakuneʼe‑s tnuʼu yaʼa.
Uʼu kuu xa kutnuni ini‑ro ntdaa tnuʼu n‑jaʼan‑s.
Ñayiu ñatu tuʼa vaʼa xiʼin ñayiu ña kunduu vaʼa xiʼin Ianyuux,
nadama‑i tnuʼu n‑kidavaʼa‑s.
Duʼa kada‑i xa nadama‑i ntdaa tnuʼu Ianyuux,
te duʼa kuú koio‑i xiʼin kuechi‑i.
17 Ñani mani‑da,
kuʼa mani‑da,
xijan kuu xa koo koio‑n cuedado.
Antecas xa koo xaʼa,
te xnaʼa mee‑n xa duʼa koo.
Xá n‑jaʼan‑da xa se ijan ka juini‑s xa dandaʼu ñaʼa‑s mee‑n.
Ka kida‑s davaʼa nga xa juini mee‑s.
Ñatu ka jandixa‑s Cristu.
Maxku kunini koio‑n tnuʼu‑s,
maxku juejoon‑n xa dandaʼu ñaʼa‑s.
Maxku ndua‑n.
Vitna kunduu‑n xiʼin Cristu.
Io xa kunduu naʼi koio ka‑n xiʼin‑ia.
18 Io xa jini vaʼa koio ka‑n Xtoʼo‑ro Jesucristu.
Ia dakaku ñaʼa mee‑ro kuu‑ia.
Io xa kueka vaʼa‑n xa kueka vaʼa koio ka‑n xamani taxi‑ia.
Na juñaʼa‑ro xa n‑kutaʼu‑ro nuu mee‑ia,
vitna xiʼin nde kuia ma jɨn ndɨʼɨ.
Duʼa na koo.