N‑chidotnuni Sua nax koo
N‑datuu Jesucristo xa yaʼa nuu Sua
1
Xaʼa kuu xa n‑datuu Ianyuux nuu Jesucristu xa datuu‑ia nuu ñayiu ka xinokuechi nuu‑ia.
N‑datuu‑ia nuu nax yaʼa,
te ma kukuee xa yaʼa xaʼa.
N‑datuu Jesucristu xaʼa nuu ángel,
ia xinokuechi nuu‑ia,
te ángel jan n‑datuu xaʼa nuu daña,
Sua,
se xinokuechi nuu Jesucristu.
2 N‑chidotnuni‑da xa n‑jaʼan Ianyuux xiʼin xa n‑datuu Jesucristu nuu‑da.
Xiʼin nuu mee‑da n‑xini‑da xaʼa te n‑teku‑da.
3 N‑chidotnuni‑da nax yaʼa xiʼin nax io xa kada ñayiu.
Naka taʼu kuu ñayiu kaʼu tnuʼu yaʼa xiʼin ñayiu kunini xa yodotnuni.
Taʼu kuu‑i nux na kada‑i na yodotnuni yaʼa chi vax kuyatni xa yaʼa ntdaa xa yodotnuni libru yaʼa.
N‑taʼu tniu Jesucristo xa kadavaʼa Sua carta jɨʼɨn nuu ñayiu ka kukanu ini‑ia xndaxio Asia
4-5 Daña,
Sua tundaʼa tutu yodotnuni tnuʼu yaʼa juan xee nuu mee‑n,
ñayiu ka kukanu ini Jesucristu xndaxio uxa ñuu xndatuu Asia.
Na chindee chituu ñaʼa Ianyuux,
Ia daa nga io,
Ia kixi.
Na chindee chituu ñaʼa uxa espíritu xtuu nuu nukoo‑ia.
Te dɨuni na chindee chituu ñaʼa Jesucristu,
Ia kuu testiu jaʼan ndaa jaʼan kuiti.
N‑nandoto‑ia xa n‑kuu‑ia ndɨyɨ na kuaʼa na kandijun nandoto ntdaa ñayiu ka xiʼí.
Taxnuni‑ia nuu ntdaa se ka kunxaʼnu.
Na kada‑ia xa kutuu vii kutuu vaʼa koio‑n.
Xemani ñaʼa‑ia te n‑dakaku ñaʼa‑ia na n‑xatu nɨñɨ‑ia xa xeʼe kuechi ka kida‑ro.
6 N‑kida‑ia xa ka kuu‑ro ná kuu dutu ka xinokuechi nuu Ianyuux,
Ia kuu Taa‑ia.
Dɨuni n‑kida‑ia xa jandixa‑ro xa taxnuni‑ia nuu‑ro.
Juan kɨu juan ñuu io xa ndadakaʼnu‑ro‑ia,
te na jaʼan‑ro xa taxnuni‑ia.
Nɨkava nɨkuita na kada‑ro xijan.
Amén.
7 Kunaʼa koio‑n xa ndixi‑ia nuu vikó.
Ntdaa‑ro xiʼin ntdaa ka ñayiu ñuñayiu kundeʼa koio‑ia.
Nde ñayiu n‑tuu ñaʼa espada na n‑xiʼí‑ia kundeʼa‑ia.
Ntdaa ñayiu ñuñayiu ndaʼi xaxeʼe xa tnau ini‑i.
Daa yaʼa.
Amén.
8 N‑jaʼan Jesus nuu‑da:
—Ruʼu kuu Ia daa nga io,
te kutuu‑r nɨkava nɨkuita.
Kuenda kɨu letra A xiʼin letra Z kuu‑r.
Xaʼa jaʼan‑r xa kuu‑r Ianyuux,
Ia daa nga io,
Ia xee ñuñayiu,
Ia yo taxnuni du —kuu‑ia,
n‑jaʼan‑ia nuu‑da.
N‑kida Ianyuux xa n‑xini Sua Cristo
9 Ñani‑ro ka kuu tnaʼa xaxeʼe xa ka jandixa‑ro Jesucristu.
Ndaʼu ka yaʼa‑ro xa kuu‑ro ñayiu ka jandixa xa taxnuni Ianyuux nuu‑ro.
Kida‑ia xa kundee ini‑ro hora ndaʼu ka yaʼa‑ro.
Nani kundee ini ndixi,
ɨɨn ɨɨn‑n,
dani kundee ini daña.
Tuu‑da nuu ñuʼu kaa niʼno nuu mar nani Patmos ya xaxeʼe xa n‑jaʼan‑da tnuʼu Ianyuux nuu ñayiu xiʼin xa n‑kakuneʼe‑da Jesucristu.
10 Kɨu kiʼna nuu semana,
kɨu najaʼan‑ro xa n‑nandoto Jesucristu,
daa n‑tuu‑da xa ndatnuʼu anu‑da xiʼin Espíritu‑ia.
Daa n‑teku‑da do ichi yata‑da xa xee n‑jaʼan ɨɨn xa n‑jaʼan.
Ná kuu xa ndaʼi strompeta n‑kuu.
11 Xaʼa n‑jaʼan:
—Chidotnuni xa kundeʼa‑n te tundaʼa‑n na jɨʼɨn nuu ñayiu ka kukanu ini ñaʼa xndaxio uxa ñuu xndatuu Asia.
Tundaʼa‑n na jɨʼɨn Éfeso,
Esmirna,
Pérgamo,
Tiatira,
Sardis,
Filadelfia,
Laodicea du.
12 N‑ngonenuu‑da xa kundeʼa‑da jundu jaʼan te n‑xini‑da uxa candrelu oro.
13 Meʼñu uxa candrelu jan n‑xini‑da ɨɨn se kaa ná kaa Ia n‑kuu ñayiu.
Niʼno‑ia ɨɨn dijun kani.
Nde yata xeʼe‑ia xino dijun jan.
Duku ɨɨn cinturón oro pechu‑ia.
14 Kuixi idi dɨkɨ‑ia ná kuixi idi tkachi ndundoo,
ná kuixi yuʼa.
Koko nduchi nuu‑ia ná koko yañuʼu.
15 Ná kaa kaa bronce nakoko nuu nuʼu kaa xeʼe‑ia.
Xee n‑jaʼan‑ia.
Ná kuu xa junkoio ndute kaʼnu ɨɨn nuu dujun kuu.
16 Neʼe ndaʼa kuaʼa‑ia uxa chudini te kee ɨɨn espada deen io uu nuu yuʼu‑ia.
Koko nuu‑ia ná koko ngandii hora ndeʼe ndii.
17 Nu n‑xini‑da‑ia n‑ndua‑da nuu nujuiin‑ia xa kuenda kɨu n‑xiʼí‑da.
Ijan n‑xajan ndodo ñaʼa‑ia ndaʼa kuaʼa‑ia,
te n‑jaʼan‑ia nuu‑da:
—Maxku yuʼu‑n.
Ruʼu kuu Ia daa nga io te kutuu‑r nɨkava nɨkuita.
18 N‑xiʼí‑r,
ko n‑nandoto‑r,
te ndito‑r vitna.
Kunaʼa‑n xa nɨkava nɨkuita kutuu‑r.
Neʼe‑r ndakaa yeʼe nuu xeʼen ñayiu ka xiʼí.
Dɨuni neʼe‑r ndakaa yeʼe andea.
19 Chidotnuni xa ndeʼa‑n.
Chidotnuni xa yaʼa vitna xiʼin xa kuu tiempo jɨʼɨn‑ro.
20 Uxa chudini neʼe ndaʼa kuaʼa‑r kuu uxa ángel xndeka ñayiu ka kukanu ini ñaʼa xndaxio uxa ñuu xndatuu Asia,
te uxa candrelu oro kuu ñayiu Asia jan.