Carta n‑tundaʼa Sua juaʼan Éfeso
2
Ijan dada n‑jaʼan ka‑ia nuu‑da:
—Chidotnuni xa jaʼan‑r te tundaʼa‑n na jɨʼɨn nuu ángel,
ia xinokuechi nuu‑r,
Éfeso xa kaʼu ndodo‑ia xijan nuu ñayiu ka kukanu ini ñaʼa xndaxio ijan:
Duʼa chidotnuni:
“Ruʼu kuu Ia neʼe uxa chudini te xikonuu‑r meʼñu uxa candrelu oro.
Ndaʼa kuaʼa‑r neʼe‑tɨ.
Na jaʼan‑r nuu‑n:
2 Xá naʼa‑r xa ka kida‑n xa vaʼa.
Xá naʼa‑r xa yo vichi ka kida‑n tniu‑r.
Xá naʼa‑r xa ka kiti ini‑n xaxeʼe xa ka kida dava ka ñayiu xyɨtnaʼa nuu‑n xaloko.
Dɨuni xini‑r xa ka xitotnuni‑n se ka jaʼan xa n‑tundaʼa‑r‑sɨ xa dakuaʼa‑s ñayiu,
te n‑ka xini‑n xa unu vete‑s.
Ñatu ka jaʼan ndaa‑s.
3 Ka kundee ini‑n hora kida uʼu ñaʼa ñayiu.
Yo ndaʼu ka yaʼa‑n xaxeʼe‑r te ka jandixa ñaʼa naʼi‑n.
4 Juini duʼa ka yaʼa‑n xaxeʼe‑r,
ko io ɨɨn xa ñatu tna ini‑r xa ka kida‑n.
Ñatu tna ini‑r xa ña ka xemani ñaʼa‑n ná n‑ka xo xemani ñaʼa‑n xa kiʼna.
5 Natu ini koio xa n‑ka kida‑n kuechi jan,
te kada naʼi koio xa n‑ka xo kida‑n xa kiʼna.
Nux ñaʼa,
xee‑r te dita‑r candrelu‑n nuu tuu‑i,
te ma taxi ka‑r tniu.
Duʼa kada‑r nux ma natu ini koio‑n xa n‑ka kida‑n kuechi.
Najaʼan koio nax n‑ka kida‑n,
nax n‑ka kukajan ini‑n xa kada‑n xa kiʼna.
6 Juini daa n‑ka kida‑n,
ko vaʼa ka kida‑n xa ña ka tna ini‑n xa ka kida ñayiu ka kuu Nicolaítas.
Dani mee‑r,
ña tna ini‑r xa kida ñayiu ijan.
7 Ñayiu xnini xa jaʼan Espíritu‑r,
na kunini vaʼa koio‑i xa jaʼan‑ia nuu‑i xiʼin nuu dava ka ñayiu ka kukanu ini ñaʼa xndaxio Asia de.
Ñayiu na ndaku nuu Kuiʼna,
io taʼu‑i.
Taʼu‑i kuu xavidi juun ɨɨn yutnu nukoo Paraíso Ianyuux.
Kaxi‑i xavidi ijan te kundito‑i nɨkava nɨkuita.”
Xaʼa na kaʼu ndodo ángel jan nuu ñayiu Éfeso —kuu‑ia,
n‑jaʼan‑ia nuu‑da.
Carta n‑tundaʼa Sua juaʼan Esmirna
8 N‑jaʼan ka‑ia nuu‑da:
—Dɨuni chidotnuni xa na jaʼan ka‑r te tundaʼa‑n na jɨʼɨn nuu ángel,
ia xinokuechi nuu‑r,
Esmirna xa na kaʼu ndodo‑ia xijan nuu ñayiu ka kukanu ini ñaʼa xndaxio ijan.
Xaʼa chidotnuni:
“Ruʼu xa kuu‑r Ia daa nga io,
te kutuu‑r nɨkava nɨkuita.
N‑xiʼí‑r te n‑nandoto‑r.
Na jaʼan‑r nuu‑n
9 xa naʼa‑r xa ndaʼu ka yaʼa‑n.
Xá naʼa‑r xa ka kundaʼu‑n,
ko xaxeʼe xa ndeka tnaʼa‑ro kuenda kɨu ñayiu kuika ka kuu‑n.
Xa naʼa‑r xa kuiʼa ka jaʼan ñaʼa ñayiu ka jaʼan xa ka jandixa‑i ná jandixa ñayiu Israel,
ko ña ndaa xa daa ka jandixa‑i chi ndeka ñaʼa Kuiʼna,
te veñuʼu Kuiʼna ka xeʼen‑i.
10 Ndaʼu yaʼa koio‑n nuu xaku kɨu,
ko maxku yuʼu koio‑n.
Kunaʼa koio‑n xa xee Kuiʼna dian,
te chindiʼu ñaʼa‑i dava‑n xa kototnuni ñaʼa‑i nu dani jandixa ñaʼa‑n a ñaʼa.
Uxi kɨu ndaʼu yaʼa koio‑n.
Kukanu ini ñaʼa naʼi;
maxku nujani‑n xa kukanu ini ñaʼa‑n,
te kundito‑n nɨkava nɨkuita.
Kuenda kɨu ñayiu ka dadɨʼɨ te ndaku‑i,
te niʼi‑i corona‑i ka kuu‑n.
11 Ñayiu xnini xa jaʼan Espíritu‑r,
na kunini vaʼa koio‑i xa jaʼan‑ia nuu‑i xiʼin nuu dava ka ñayiu ka kukanu ini ñaʼa xndaxio Asia de.
Ñayiu ndaku nuu Kuiʼna,
ma kuú‑i ɨnka vuelta.”
Xaʼa na kaʼu ndodo ángel jan nuu ñayiu Esmirna —kuu‑ia,
n‑jaʼan‑ia nuu‑da.
Carta n‑tundaʼa Sua juaʼan Pérgamo
12 N‑jaʼan ka‑ia nuu‑da:
—Chidotnuni ntuku xa na jaʼan‑r te tundaʼa‑n jɨʼɨn nuu ángel,
ia xinokuechi nuu‑r,
Pérgamo xa kaʼu ndodo‑ia xijan nuu ñayiu ka kukanu ini ñaʼa xndaxio ijan.
Xaʼa chidotnuni:
“Ruʼu kuu Ia nevaʼa espada uu nuu.
Na jaʼan‑r nuu‑n xa
13 xá naʼa‑r nax yaʼa ñuu io‑n.
Taxnuni Kuiʼna ñuu dian.
Juini daa kuu,
ko ka jaʼan naʼi‑n xa kukanu ini ñaʼa‑n juini ka xini‑n xa n‑xiʼí Antipas xaxeʼe xa n‑kakuneʼe ñaʼa‑s.
Ñatu n‑nujani‑s xa n‑kakuneʼe ñaʼa‑s nuu ñayiu ñuu‑n,
te n‑xaʼni ñaʼa‑i dian nuu tuu Kuiʼna.
14 Ko ñatu tna ini‑r dava xa ka kida dava‑n chi kuechi kuu.
Dava‑n ka kida xa n‑daneʼe se n‑xo nani Balaam Balac.
Balac n‑dajaʼan ñayiu Israel xa kaxi koio‑i kuñu n‑ka doko‑i nuu ianyuux‑yɨ.
Dɨuni n‑dajaʼan‑s ñayiu xa kava‑i xiʼin ñayiu ña n‑tnundaʼa xiʼin‑i.
15 Ɨnka ntuku xa ka kida‑n kuu xa dava‑n ka jandixa naʼi xa ka jaʼan ñayiu ka kuu Nicolaítas.
16 Ñayiu daa ka kida,
io xa natu ini‑i xa n‑ka kida‑i kuechi.
Nux ñaʼa,
ma kukuee xa xee‑r te ndadandaa‑r kuechi‑i.
Xiʼin espada kee yuʼu‑r kaʼni‑r ñayiu kida kuechi.
17 Ñayiu xnini xa jaʼan Espíritu‑r,
na kunini vaʼa koio‑i xa jaʼan‑ia nuu‑i xiʼin nuu dava ka ñayiu ka kukanu ini ñaʼa xndaxio Asia de.
Ñayiu na ndaku nuu Kuiʼna,
taʼu‑i kuu ɨɨn xa yɨvaʼa nani maná.
Dɨuni juñaʼa‑r‑yɨ yuú kuixi nuu ndenee dɨu xee‑i ɨɨn ɨɨn‑i.
Diko ni ñayiu kutaʼu yuú jan jini dɨu‑i ndenee jan.”
Xaʼa na kaʼu ndodo ángel jan nuu ñayiu Pérgamo —kuu‑ia,
n‑jaʼan‑ia nuu‑da.
Carta n‑tundaʼa Sua juaʼan Tiatira
Ijan dada n‑jaʼan ka‑ia:
18 —Chidotnuni ntuku xa na jaʼan‑r te tundaʼa‑n na jɨʼɨn nuu ángel,
ia xinokuechi nuu‑r,
Tiatira xa kaʼu ndodo‑ia xijan nuu ñayiu ka kukanu ini ñaʼa xndaxio ijan.
Xaʼa chidotnuni:
“Ruʼu kuu Daʼya Yɨɨ Ianyuux.
Ná kaa yañuʼu kaa nduchi nuu‑r.
Ná kaa kaa bronce nakoko nuu nuʼu kaa xeʼe‑r.
Na jaʼan‑r xa
19 xá naʼa‑r xa ka kida‑n xa vaʼa.
Xá xini‑r xa mani ini‑n.
Xá naʼa‑r xa vaʼa kukanu ini ñaʼa‑n.
Xá naʼa‑r xa ka xinokuechi‑n nuu Ianyuux.
Xá naʼa‑r xa kunde ini‑n hora ka kida uʼu ñaʼa ñayiu.
Xá naʼa‑r xa ka kida‑n xa vaʼa te vaʼa ka ka kida‑n vitna dada na n‑ka kixeʼe‑n xa kukanu ini ñaʼa‑n.
20 Juini daa ka kida‑n,
ko io ɨɨn xa ñatu kuu xa vaʼa ka kida‑n.
Xa ña vaʼa ka kida‑n kuu xa ka xejoon‑n xa dakuaʼa Jezabel ñayiu dian.
Dajaʼan‑ña ñayiu ka xinokuechi nuu‑r xa kava koio‑i xiʼin ñayiu ñatu n‑tnundaʼa xiʼi‑i.
Dɨuni dajaʼan‑ña‑i xa kaxi‑i kuñu n‑ka chidoyuku‑i nuu ianyuux‑yɨ.
Dandaʼu‑ña ñayiu dian chi jaʼan‑ña xa kuu‑ña ñayiu jaʼan tnuʼu Ianyuux nuu ñayiu,
ko ña ndaa.
21 N‑xo ndetu kuee‑r xa natu ini‑ña xa n‑kida‑ña kuechi,
ko ña natu ini‑ña xa n‑kida‑ña.
Ña n‑nujani‑ña xa xkaa‑ña xiʼin se ña n‑tnundaʼa xiʼin‑ña;
ñatu xande ini‑ña xijan.
22 Kunaʼa koio xa kada‑r xa kane kueʼe‑ña te nkava‑ña.
Kada‑r xa yo ndaʼu yaʼa koio se ka xkaa xiʼin‑ña,
nux ma natu ini‑s xa n‑ka kida‑s kuechi xaxeʼe‑ña.
23 Kaʼni‑r ñayiu ka jandixa xa jaʼan‑ña,
te jini ntdaa ñayiu ka kukanu ini ñaʼa xndaxio uxa ñuu xndatuu Asia de xa ruʼu xini janda kuu anu‑n ɨɨn ɨɨn‑n,
te dɨuni xini‑r nax ka xani ini‑n.
Ndeʼe ka kada uʼu ñaʼa Ianyuux nux dani na kada ka‑n xaloko.
24-25 (Dava ñayiu dian ka jaʼan xa ka xini‑i tnuʼu ndichi Kuiʼna.)
Ko ndoʼo,
ñayiu xndaxio Tiatira,
te ña ka chinuu‑n xa jaʼan Jezabel xa kada‑n,
ni ña ka xini‑n tnuʼu ndichi Kuiʼna,
jandixa naʼi koio‑n tnuʼu Ianyuux n‑ka teku‑n,
te maxku nujani‑n xa jandixa‑n.
Ma taʼu tniu ka‑r xa jandixa koio‑n ɨnka xa jandixa‑n.
26 Ñayiu na ndaku nuu Kuiʼna te kada naʼi‑i xa n‑taʼu tniu‑r:
Kada‑r xa taxnuni‑i nuu ñayiu ñuñayiu.
27 Te ndeʼe kundeka‑i‑yɨ.
Ná kidakuechi ɨɨn ñayiu kɨdɨ ñuʼu,
kada‑i dava ñayiu kundeka‑i jan.
28 Ná n‑kida Taa‑r xa taxnuni‑r,
kada‑r xa taxnuni‑n,
te taxi‑r tkɨun xino datne datne.
29 Ñayiu xnini xa jaʼan Espíritu‑r,
na kunini vaʼa koio‑i xa jaʼan‑ia nuu‑i xiʼin nuu dava ka ñayiu ka kukanu ini ñaʼa xndaxio Asia de.”
Xaʼa na kaʼu ndodo ángel jan nuu ñayiu Tiatira jan —kuu‑ia,
n‑jaʼan‑ia nuu‑da.