Carta n‑tundaʼa Sua juaʼan Sardis
3
N‑jaʼan ka‑ia nuu‑da:
—Chidotnuni xa na jaʼan ntuku‑r te tundaʼa‑n nuu ángel,
ia xinokuechi nuu‑r,
Sardis xa kaʼu ndodo‑ia xijan nuu ñayiu ka kukanu ini ñaʼa xndaxio ijan.
Xaʼa chidotnuni:
“Ruʼu kuu Ia io uxa espíritu te nevaʼa‑r uxa chudini jan.
Na jaʼan‑r xa xá naʼa‑r xa ka kida‑n.
Xá xini‑r xa ka jaʼan‑n xa kundito‑n nɨkava nɨkuita,
ko kuenda kɨu ñayiu n‑ka xiʼí ka kuu‑n xa ña najaʼan ñaʼa‑n.
2 Chinuu koio nax ka kida‑n.
Kidayɨka‑i xa jandixa ñaʼa ka‑n chi ñatuka ka jandixa ñaʼa vaʼa‑n.
Ñatu ka kida ndɨʼɨ‑n xa juini Ianyuux.
3 Najaʼan koio nax n‑ka xo teku‑n hora n‑ka xo dakuaʼa ñaʼa ñayiu.
Dɨuni najaʼan koio xa n‑ka xo jandixa‑n,
te jandixa naʼi koio xijan.
Natu ini koio xa n‑ka kida‑n kuechi.
Koo tuʼa koio‑n chi ma kachitnuʼu ñaʼa‑r na hora xee ntuku‑r.
Ná xee ɨɨn ñaduʼu xee ntuku‑r dian.
4 Juini n‑ka dateʼa dava‑n daʼma‑n xa ña n‑ka jandixa ñaʼa‑n,
ko dava‑n,
ñatu n‑ka dateʼa‑n daʼma‑n.
Ñayiu ñatu n‑ka dateʼa daʼma‑i,
dandukutu‑r‑yɨ daʼma kuixi,
te kutuu kaʼnu‑r xiʼin‑i chi xijan kuu taʼu‑i.
5 Ñayiu na ndaku nuu Kuiʼna,
kuiʼno‑i daʼma kuixi,
te ma ndada ndoo‑r dɨu‑i nuu tutu yodotnuni dɨu ñayiu kundito nɨkava nɨkuita.
Jaʼan‑r xa xini tnaʼa‑r xiʼin‑i nuu Taa‑r xiʼin nuu ángel,
ia ka xinokuechi nuu‑ia.
6 Ñayiu xnini xa jaʼan Espíritu‑r,
na kunini vaʼa koio‑i xa jaʼan‑ia nuu‑i xiʼin nuu dava ka ñayiu ka kukanu ini ñaʼa xndaxio Asia de.”
Xaʼa na kaʼu ndodo ángel jan nuu ñayiu Sardes jan —kuu‑ia,
n‑jaʼan‑ia nuu‑da.
Carta n‑tundaʼa Sua juaʼan Filadelfia
7 Ijan dada n‑jaʼan ka ntuku‑ia:
—Chidotnuni ntuku xa na jaʼan‑r te tundaʼa‑n nuu ángel,
ia xinokuechi nuu‑r,
Filadelfia xa na kaʼu ndodo‑ia xijan nuu ñayiu ka kukanu ini ñaʼa xndaxio ijan.
Xaʼa chidotnuni:
“Ruʼu jaʼan ndaa jaʼan kuiti;
ñatu vete‑r te ii‑r.
Taxnuni‑r nuu n‑xo taxnuni David,
te neʼe‑r ndakaa n‑xo neʼe‑s.
Nux xejoon‑r xa kɨkɨu ñayiu nuu tuu‑r,
mayo dadaʼan.
Nux ña xejoon‑r xa kɨkɨu‑i,
mayo taʼu tniu nuu‑r xa na juejoon‑r.
Na jaʼan‑r xa
8 xá naʼa‑r xa ka kida‑n te janda xtuu‑n.
Juini xaku‑n ka kukanu ini ñaʼa,
ka jandixa naʼi‑n xa n‑jaʼan‑r.
Ka jaʼan naʼi‑n xa ndeka tnaʼa‑ro.
N‑kida‑r xa kunini dava ka ñayiu ñuu‑n xa n‑jaʼan‑r,
te mayo ndaku xa dadaʼan‑i xa kunini ñayiu dian.
9 Dava ñayiu ñuu‑n ka xeʼen veñuʼu Kuiʼna,
te ka jaʼan‑i xa ka jandixa ñaʼa‑i ná ka jandixa ñaʼa ñayiu Israel,
ko ñatu ndaa.
Jini koio‑i xa xemani ñaʼa‑r chi mee‑r kada xa xee koio‑i nuu‑n,
te njuiin xiti koio‑i.
10 Ka kida‑n xa n‑taʼu tniu‑r,
te juini ndaʼu ka yaʼa‑n,
ka kundee ini‑n.
Xaxeʼe xijan chindee ñaʼa‑r hora na dajaʼan ñaʼa Kuiʼna xa kada koio‑n kuechi.
Vax kuyatni kɨu xee ntuku‑i te dajaʼan‑i ntdaa ñayiu ñuñayiu xa kada‑i kuechi.
11 Nu xaku kɨu xee‑i.
Kunevaʼa vaʼa xa xnevaʼa‑n na kuaʼa maxku yo ñayiu dadaʼan xa tnɨɨ‑n ɨɨn ɨɨn‑n corona kuu taʼu‑n.
12 Ñayiu na ndaku nuu Kuiʼna,
jɨʼɨn‑i andɨu,
te kada‑r xa kuenda kɨu columna yɨtnɨɨ ɨɨn veʼe ku kuu koio‑i xa ma kee‑i veñuʼu‑ia io andɨu.
Tenee‑r dɨu taa‑r xiʼin dɨu ñuu‑ia columna jan.
Ñuu ijan kuu Jerusalén xee.
Nde andɨu tundaʼa Ianyuux ñuu ijan.
13 Ñayiu xnini xa jaʼan Espíritu‑r,
na kunini vaʼa koio‑i xa jaʼan‑ia nuu‑i xiʼin nuu dava ka ñayiu ka kukanu ini ñaʼa xndaxio Asia de.”
Xaʼa na kaʼu ndodo ángel jan nuu ñayiu Filadelfia jan —kuu‑ia,
n‑jaʼan‑ia nuu‑da.
Carta n‑tundaʼa Sua juaʼan Laodicea
Dɨuni n‑jaʼan ka‑ia:
14 —Chidotnuni xa na jaʼan‑r te tundaʼa‑n nuu ángel,
ia xinokuechi nuu‑r,
Laodicea xa na kaʼu ndodo‑ia nuu ñayiu ka kukanu ini ñaʼa xndaxio ijan.
Xaʼa na juñaʼa‑ia:
“Ruʼu kuu testiu jaʼan ndaa jaʼan kuiti.
Dɨuni kuu‑r Ia n‑kidavaʼa ntdaa xa io.
Xa n‑xini‑r xiʼin nuu‑r kachitnuʼu ñaʼa‑r.
Na jaʼan‑r xa
15 xá xini‑r janda xtuu‑n te xini‑r xa ka kida‑n.
Kuenda kɨu ɨɨn xa n‑chiʼi‑ro yuʼu‑ro xa kaxi‑ro te xa io‑ro xa ndeyuʼu‑ro xaxeʼe xa ñatu tna ini vaʼa‑ro ka kuu‑n.
16 Xaxeʼe xa kuenda kɨu xijan ka kuu‑n,
kuu anu‑r xa dandoo ñaʼa‑r.
17 Kueʼe xaxii‑r io te kuika‑r.
Ña tuu nax ndoñuʼu‑r,
ka kuu‑n.
Ñatu ka xini‑n xa kuenda kɨu ñayiu ña tuu nax nevaʼa te ka kundaʼu ka kukee‑i te ka kundaʼu ini ñaʼa dava ka ñayiu ka kuu‑n.
Kuenda kɨu ñayiu kuaa xiʼin ñayiu ña tuu na daʼma‑i io ka kuu‑n.
18 Jueen koio oro n‑ndee nini nuu nuʼu koko nuu‑r xa na kukuika‑n.
Jueen koio daʼma kuixi nuu‑r xa kuiʼno‑n xa maxku yaʼa ka‑n xa januu chi kuenda kɨu ñayiu io vichi ka kuu‑n.
Jueen koio tatna nuu‑r xa kutatna nduchi nuu‑n xa na nukondeʼa‑n chi kuenda kɨu ñayiu kuaa ka kuu‑n.
19 Ñayiu xemani‑r,
jan doʼo‑r‑yɨ te xanu ichi‑r‑yɨ ichi vaʼa.
Xijan kuu xa chinuu koio janda ka kuu‑n,
te natu ini koio xa n‑ka kida‑n kuechi.
20 Kunaʼa koio xa nuu xndaxio‑n io‑r te xko dakande‑r yeʼe‑n.
Nux ɨɨn ñayiu na teku xa kana‑r te nux na najaan‑i yeʼe‑i,
kɨu‑r veʼe‑i xa kutuu‑r xiʼin‑i te ku kaxi kaʼnu‑r xiʼin‑i.
21 Ñayiu na ndaku nuu Kuiʼna ná n‑ndaku mee‑r nuu‑i,
tetutniu‑r‑yɨ xa taxnuni‑r xiʼin‑i ná n‑tetutniu ñaʼa Taa‑r xa taxnuni‑r xiʼin‑ia.
Ná nukoo kaʼnu‑r xiʼin taa‑r,
daa kunukoo kaʼnu‑r xiʼin‑i.
22 Ñayiu ka teku tnuʼu Espíritu‑r,
io xa kunini vaʼa koio‑i xa jaʼan‑ia nuu‑i xa ka kuu‑i ñayiu ka kukanu ini ñaʼa xndaxio uxa ñuu xndatuu Asia de.”
Xaʼa na kaʼu ndodo ángel jan nuu ñayiu Laodicea jan —kuu‑ia,
n‑jaʼan‑ia nuu‑da.