Ndukaʼnu Ianyuux andɨu
4
Nu n‑yaʼa xa duʼa n‑jaʼan‑ia,
te n‑xini‑da xa nune yeʼe andɨu.
N‑teku ntuku‑da xa n‑jaʼan ná n‑kuu xa ndaʼi strompeta n‑teku‑da vuelta kiʼna nuu.
Duʼa n‑jaʼan xijan:
—Ta ki kaa yaʼa na kachitnuʼu ñaʼa‑r xa yaʼa.
2 Dana ini n‑tu ini‑da xa ndeka ñaʼa‑ia juaʼan,
te n‑xini‑da ɨɨn silla kaʼnu nuu nukoo Ia taxnuni andɨu.
3 Ná kaa yuú nani jaspe xiʼin ná kaa yuú nani cornalina kaa ñɨɨ Ia nukoo nuu silla kaʼnu jan.
Nɨkanduu nuu nukoo silla jan naduku nduu tkoyaʼnde.
Ná kuii yuú nani esmeralda,
kuii tkoyaʼnde jan.
4 Dɨuni n‑xini‑da oko koon ka silla xiʼin oko koon se ka kunxaʼnu xtuu nɨkanduu nuu nukoo silla kaʼnu jan.
Xtuu‑s nuu silla jan te xndeʼa‑s Ia nukoo meʼñu‑s.
Xniʼno‑s daʼma kuixi te xñuʼu corona oro dɨkɨ‑s.
5 Kee taxa nuu nukoo silla kaʼnu jan.
Kana dau te kaʼndɨ.
Ka koko uxa xa xndaa ná xndaa itikava do nuu silla kaʼnu jan.
Uxa xijan ka kuu uxa espíritu Ianyuux.
6 Dɨuni do nuu silla jan io ɨɨn xa kaa ná kaa mar.
Ná kaa vidriu kaa,
te kɨndɨ.
Xnii koon kɨtɨ dana xndaa meʼñu silla kaʼnu ka xiʼin meʼñu sexaʼnu xtuu jan.
N‑ka naduku nduu‑tɨ silla kaʼnu jan.
Kueʼe nduchi nuu‑t xndaxio do nuu‑t,
do yata‑tɨ du.
7 Ɨɨn‑tɨ kaa ná kaa ngaʼa.
Ɨnka‑t kaa ná kaa ncerru.
Ɨnka‑t neʼe nuu ñayiu,
te kɨtɨ kuu koon kaa ná kaa ñau.
Ndava‑tɨ.
8 Io iñu ndixi kɨtɨ dana xndaa jan.
Io nduchi nuu‑t do yata ndixi‑t,
kaʼa ndixi‑tɨ xiʼin diñi ndixi‑tɨ.
Nde nuu ndixi‑tɨ ndenee nduchi nuu‑t.
Nduu xakuaa ka jaʼan‑tɨ:
Ii Ianyuux,
Ia kuu Xtoʼo‑ro.
Ii Ianyuux,
Ia kuu Xtoʼo‑ro.
Ii Ianyuux,
Ia kuu Xtoʼo‑ro.
Taxnuni‑ia nuu ntdandituʼu xa io.
Kuu‑ia Ia xa daa nga io te jɨʼɨn ntuku‑ia ñuñayiu.
Ka kuu‑t.
9-10 Ka ndadakaʼnu nkoon kɨt dana xndaa jan Ia xa daa nga ndito,
te ma kɨu ma ñuu kuú‑ia,
te nukoo‑ia nuu silla kaʼnu xa taxnuni‑ia.
Dɨuni ka najuen tnuʼu ñaʼa‑tɨ,
te ka xiaʼan‑tɨ xa n‑ka kutaʼu‑t nuu‑ia.
Ntnaʼa vuelta duʼa ka kida nkoon kɨt ijan,
ka xe juiin xiti ntdaa sexaʼnu ka kunxaʼnu jan nuu Ia xa daa nga io,
te ma kɨu ma ñuu kuú‑ia,
xa ndadakaʼnu‑s‑ia tuku,
te ka jantuu‑s ntdaa‑s corona‑s nuu‑ia,
te ka xiaʼan‑s:
11 Kuu‑n Xtoʼo‑da,
Taa‑ro Ianyuux.
Io xa ndadakaʼnu ñaʼa‑da.
Io xa najuen tnuʼu ñaʼa koio‑da.
Io xa taxnuni‑n.
Chi ndixi n‑xani ini ntdaa xa io andɨu xiʼin ñuñayiu.
Ntdaa xaʼa io chi daa n‑juini‑n.