Rollo tutu yodotnuni nundaʼa tkolelu
5
Ijan dada n‑xini‑da xa nundaʼa Ia nukoo nuu silla kaʼnu jan ɨɨn rollo tutu xndenee uxa sellu ñua xndedi yuʼu‑i.
Ndaʼa kuaʼa‑ia neʼe tutu jan.
N‑kuaʼa nuu n‑kuaʼa yata tutu jan.
2 Dɨuni n‑xini‑da ɨɨn ángel.
Kaa‑ia xa yo ndaku‑ia.
Xee kana‑ia:
—¿Ndeda ñayiu n‑kida mee ni xa vaʼa na kuaʼa ndata‑i sellu xndenee rollo tutu nundaʼa Ia nukoo nuu silla kaʼnu te ndaxniʼno‑i?
—kuu‑ia,
n‑xijan tnuʼu‑ia.
3 Ñayo n‑kida mee ni xavaʼa xa na kuaʼa ndata‑i nuu ndenee sellu te ndaxniʼno‑i.
Ni andɨu,
ni ñuñayiu,
ni nuu xyɨnduxi ndɨyɨ ñavada io ñayiu kuaʼa ndata nuu ndenee sellu jan.
Ni ñayo ndaku xa jini‑i nax yodotnuni.
4 Yo n‑ndaʼi‑da chi ñayo n‑kida xa vaʼa xa ndaxniʼno‑i tutu tuniʼno jan,
ni xa jini‑i nax yodotnuni.
5 Ijan dada n‑jaʼan ɨɨn sexaʼnu kunxaʼnu nukoo ijan nuu‑da:
—Maxku ndaʼi‑n.
Kunaʼa xa Ia kuu daʼya dana Judá,
Ia kuu daʼya dana David,
n‑ndaku‑ia nuu Kuiʼna.
Ndaku‑ia xa ndata‑ia nuu xndenee uxa sellu tutu tuniʼno ya,
te ndaxniʼno‑ia.
(Nani‑ia Ngaʼa Judá.)
6 Ijan dada n‑xini‑da ɨɨn tkolelu.
Kaa‑tɨ xa yuchi n‑xiʼí‑tɨ te n‑nandoto‑tɨ.
Iin ndodo‑tɨ dava dava dɨkɨ silla kaʼnu ka jan.
N‑ka naduku nduu ñaʼa nkoon kɨt dana xndaa jan xiʼin oko koon sexaʼnu ka kunxaʼnu jan.
Uxa ndɨkɨ tkolelu jan io,
te io uxa nduchi nuu‑t.
Uxa ndɨkɨ‑t xiʼin uxa nduchi nuu‑t kuu uxa espíritu Ianyuux kixi nituʼu ñuu ñuñayiu.
7 N‑tnɨɨ‑tɨ tutu neʼe ndaʼa kuaʼa Ia nukoo nuu silla kaʼnu jan,
8 te n‑ka xe juiin xiti nkoon kɨt dana xndaa xiʼin oko koon sexaʼnu ka kunxaʼnu jan nuu‑tɨ.
Ntdaa‑s xneʼe arpa xiʼin koʼo oro chitu duxa.
Hora kayu duxa jan te juan ndaa ñuʼa jan andɨu,
najaʼan Ianyuux xa ka xijan taʼu ñayiu n‑kida‑ia xa nduu‑i ñayiu ii.
9 Ka xita sexaʼnu jan ɨɨn ndudu xee nuu tkolelu kuu Jesús jan.
Duʼa ka xita‑s:
Mee‑n,
io xa tnɨɨ‑n tutu tuniʼno de,
te ndata‑n nuu xndenee sellu de.
Chi n‑xiʼí‑n yuchi,
nandɨkaa ñayiu ñuñayiu jɨʼɨn andɨu n‑chiyaʼu‑n kuechi‑i.
N‑xatu nɨñɨ‑n xa ku kuu‑i ntdaa‑i daʼya Ianyuux.
10 Mee‑n n‑kida xa ku kuu‑da ñayiu taxnuni nuu ñayiu ñuñayiu.
Dɨuni n‑kida‑n xa ku kuu‑da dutu,
te junukuechi koio‑da nuu Taa‑ro Ianyuux.
Ka kuu sexaʼnu,
ka xiaʼan‑s.
11 Ijan dada n‑teku‑da xa kueʼe ángel,
ia ka xinokuechi nuu Ianyuux,
ka jaʼan.
Kueʼe xa kueʼe millón ángel jan n‑xini‑da.
N‑ka naduku nduu‑ia silla kaʼnu jan xiʼin nuu xtuu kɨtɨ dana xndaa jan xiʼin sexaʼnu ka kunxaʼnu jan.
12 Xee ka kana‑ia:
Io xa taxnuni tkolelu,
Ia kuu kɨtɨ n‑xiʼí yuchi,
te n‑nandoto‑ia.
Io xa kɨndaʼa‑ia ntdaa xa io,
te ku kuu xaxii‑ia xijan.
Na najuen tnuʼu‑ro‑ia.
Na ndadakaʼnu‑ro‑ia.
Na nakuetu‑ro nuu‑ia du,
chi xini‑ia ntdandituʼu xa yaʼa ñuñayiu xiʼin xa yaʼa andɨu.
Na ɨɨn xa ma kada‑ia.
Ka kuu‑ia.
13 Ijan dada n‑teku‑da xa n‑ka jaʼan ntdaa xa n‑kidavaʼa Ianyuux xndaxio andɨu,
ñuñayiu xiʼin ntdaa xa xndaxio kaʼa ñuʼu,
xa xndaxio nuu mar du.
Ka xiaʼan tnaʼa koio xijan:
Na nakuetu‑ro nuu tkolelu xiʼin nuu Ia nukoo nuu silla kaʼnu.
Na najuen tnuʼu‑ro‑ia.
Na ndadakaʼnu‑ro‑ia.
Na nakuetu‑ro nuu‑ia.
Taxnuni‑ia nuu‑ro ntdaa‑ro.
Nɨkava nɨkuita duʼa na ku kuu.
14 Ijan te jaʼan nkoon kɨt dana xndaa jan:
—Daa na koo.
N‑ka xe juiin xiti oko koon sexaʼnu ka kunxaʼnu jan te n‑ka ndadakaʼnu‑s Ianyuux.