Ñayiu ka jandixa Jesucristu ka kuu‑n
5
Vitna jaʼan‑da nuu ntdaa sexaʼnu ka taxnuni nuu mee‑n ka jandixa Cristu.
Mee‑da tuku,
kuu‑da ɨɨn sexaʼnu taxnuni nuu ñayiu ka jandixa Cristu.
Xiʼin nuu mee‑da n‑xini‑da Cristu,
hora kueʼe vida n‑yaʼa‑ia.
Te mee‑da tuku,
kutuu‑da xiʼin‑ia,
hora dandeʼa‑ia ñayiu xa taxnuni‑ia nuu‑i.
2 Ná kuu se ñunuu tkachi ka kuu‑n,
te ná kuu tkachi kuu ñayiu ka jandixa Cristu.
N‑taxi Ianyuux ñayiu‑ia,
xa kundeka vaʼa‑n‑yɨ.
Kuvete koio‑n xa duʼa kuu.
Maxku kada koio‑n xa io xa kadajuexa ñaʼa Ianyuux xa kundeka‑n‑yɨ.
Te maxku kundeka‑n‑yɨ xa niʼi koio‑n tvini.
Kuvete koio‑n,
xa duʼa ka xinokuechi‑n nuu Ianyuux.
3 Maxku ku kuu‑n ná kuu se kundeʼe nuu tkachi,
ku kuu‑n ɨɨn ichi kaneʼe katnɨɨ tkachi‑n.
4 Na ndixi Jesucristu,
te taxi‑ia premiu‑n.
Ia ñunuu vaʼa ntdaa tkachi‑ia kuu‑ia.
Ia taxnuni nuu ntdaa se ñunuu tkachi‑ia kuu‑ia.
Ná kuu corona juʼun koio‑n kuu premiu tnɨɨ koio‑n.
Ɨɨn xadiñu,
ɨɨn xa ma jɨn ndɨʼɨ.
Kutuu koio mee‑n xiʼin mee‑ia kuia ma jɨn ndɨʼɨ,
te taxnuni koio mee‑n xiʼin mee‑ia.
5 Se ka kuu solteru,
jandixa koio nuu sexaʼnu ka taxnuni nuu‑n.
Ntdaa ñayiu ka jandixa Jesucristu,
jandixa tnaʼa koio‑n,
ɨɨn‑n nuu ɨnka‑n.
Maxku kuxee ini nuu tnaʼa koio‑n.
Chi jaʼan tnuʼu Ianyuux:
Jantnaʼa Ianyuux xiʼin ñayiu kuxee ini.
Ko ñayiu kutnuni ini xa ndoñuʼu‑i xa chindee‑ia‑i,
xiaʼan‑ia xamani‑ia nuu‑i.
6 Xijan kuu xa,
maxku kuxee ini‑n nuu‑ia.
Ia kunxaʼnu ka kuu‑ia.
Kada koio‑n xa juini mee‑ia.
Te duʼa,
kɨu vaʼa,
kada‑ia xa taxnuni koio‑n xiʼin‑ia.
7 Maxku kɨ ini koio‑n.
Juejoon koio‑n nuu Ianyuux,
chi kundeka ñaʼa‑ia mee‑n.
8 Kaxi kani ini koio‑n.
Kundito koio‑n te koo koio‑n cuedado.
Chi ná kuu ngaʼa ndeʼe kuu kuiʼna.
Xini uʼu ñaʼa‑i mee‑n.
Xikonuu‑i te kana xiin‑i.
Nduku‑i jundu kaxi‑i.
9 Jantnaʼa naʼi koio ka‑n xiʼin‑i,
maxku juejoon koio‑n xa kadajuexa ñaʼa‑i xa kada‑n kuechi,
jandixa naʼi koio ka‑n Ianyuux.
Xnaʼa‑n xa ñani‑ro kuʼa‑ro nituʼu ñuñayiu,
kueʼe vida ka yaʼa mee‑i,
ná kueʼe vida ka yaʼa mee‑n.
10 Taxi Ianyuux ntdaa xamani‑ia.
N‑jaʼan ñaʼa‑ia mee‑n,
xa kutuu koio‑n xiʼin‑ia nuu taxnuni‑ia,
kuia ma jɨn ndɨʼɨ.
Ijan kutuu koio mee‑n xiʼin Jesucristu.
Io xa kueʼe vida yaʼa koio‑n vitna,
ko xaku nga,
te kutuu vaʼa koio‑n.
Kada tuʼa ñaʼa‑ia,
kada‑ia xa kundee ini koio ka‑n.
Kada ndaku ñaʼa‑ia,
te kada‑ia xa jandixa naʼi koio ka‑n.
11 Na juñaʼa‑ro xa n‑kutaʼu‑ro nuu Ianyuux nɨkava nɨkuita.
Te na taxnuni‑ia nuu‑ro nɨkava nɨkuita.
Duʼa na koo.
Xanyuux nuu‑n
12 N‑chidotnuni Silvano carta yaʼa.
Ɨɨn se jandixa Cristu kuu‑s,
te io‑da confianza nuu‑s.
Itaʼu ni kuu xa n‑kidavaʼa‑da nuu‑n,
xa taxi‑da tnuʼu kanu ini nuu‑n.
Xá n‑jaʼan ndaa‑da xaxeʼe xamani Ianyuux.
Xandaa kuu xa xemani ñaʼa‑ia mee‑n.
Kundee ini naʼi koio ka‑n.
13 Ka ndajan tnuʼu ñaʼa ñani‑ro kuʼa‑ro xtuu ñuu nani Babilonia.
Ná n‑kaxí ñaʼa Ianyuux mee‑n,
da n‑kaxí‑ia mee‑i tuku.
Ndajan tnuʼu ñaʼa Smarku.
Ná kuu daʼya mee‑da kuu‑s.
14 Nutnaʼa koio‑n,
xaxeʼe xa xemani tnaʼa‑n.
Ñayiu ka kunduu xiʼin Jesucristu ka kuu‑n.
Na kutuu vaʼa koio‑n.
Duʼa na koo.