Xá n‑taxi Espíritu Ii xamani‑ia nuu‑n, ɨɨn ɨɨn‑n
4
Ná kuu yɨkɨ kuñu mee‑ro,
da n‑kuu yɨkɨ kuñu Cristu.
Te kueʼe xa kueʼe vida n‑yaʼa‑ia.
Io xa kani ini koio mee‑n ná n‑xani ini mee‑ia.
Nux ndoñuʼu xa kueʼe vida yaʼa koio‑n,
ko vatuka.
Chi ɨɨn ñayiu,
nux kueʼe vida n‑yaʼa‑i,
xa n‑dandoo‑i kuechi‑i.
2 Ñayiu jan,
nɨni kutuu ka‑i ñuñayiu,
kada‑i xa juini Ianyuux,
te ma kada ka‑i xa ka kukajan ini ñayiu ñuñayiu.
3 Kueʼe kuia xá n‑ka kida‑n ná ka kida ñayiu ñatu jandixa Ianyuux,
ko vitna ñaʼa ka.
N‑ka xo kida‑n davaʼa nga xa n‑ka xo kukajan ini‑n.
Seyɨɨ ka kidi xiʼin ñadɨʼɨ ɨnka seyɨɨ n‑ka kuu‑n,
ñadɨʼɨ ka kidi xiʼin yɨɨ ɨnka ñadɨʼɨ n‑ka kuu‑n.
Sexini,
ñáxini n‑ka kuu‑n.
N‑ka xo kida‑n viko ka kudɨ ini‑n,
ndeʼe n‑ka xaxi‑n,
ndeʼe n‑ka xtaxeʼe‑n,
ndeʼe n‑ka xiʼi‑n.
N‑ka xo ndadakaʼnu‑n santu ña kuu Ianyuux Ndito.
4 Ñatu kutnuni ini ñayiu nakuenda ñatuka kida mee‑n ná ka kida mee‑i,
te kuiʼa ka jaʼan‑i nuu‑n.
Dani ka kida‑i xa uʼu xiʼin xa uʼu,
te ka juini‑i xa duʼa kada koio mee‑n tuku.
5 Ko ndajan kuenda Ianyuux nuu‑i.
Io tuʼa‑ia xa ndadandaa‑ia ntdaa ñayiu,
ñayiu ndito xiʼin ñayiu n‑xiʼí tuku.
6 Xijan kuu xa n‑ka xian tnuʼu‑da tnuʼu vaʼa Jesucristu nuu ñayiu.
Juini xá n‑ka xiʼí‑i,
ko antecas xa kuú‑i,
n‑ka teku‑i tnuʼu vaʼa‑ia.
N‑ka xiʼí‑i,
ná io xa kuú koio ntdaa ñayiu,
ko tuu vaʼa anu‑i,
ná tuu vaʼa Ianyuux.
7 Vitna xá vax ndɨʼɨ ntdaa xa io.
Kaxi kani ini koio‑n,
kada koio‑n xavaʼa,
te kajan taʼu koio‑n nuu Ianyuux.
8 Juemani tnaʼa koio‑n.
Yo yaʼu ka xa xemani tnaʼa‑n,
dada davaʼa nga ɨnka xa ka kida‑n.
Chi nux juemani tnaʼa‑n,
duʼa taxkanu ini tnaʼa‑n kuechi‑n.
9 Maxku kuiʼa jaʼan‑n,
hora juña tnaʼa‑n xa kaxi‑n xiʼin nuu ndoo‑n.
10 Xá n‑taxi Ianyuux xamani‑ia nuu‑n,
ɨɨn ɨɨn‑n.
Xá n‑taxi‑ia ɨɨn nuu ɨɨn‑n,
te ɨnka nuu ɨnka‑n,
te juini nuu dɨɨn xa n‑ka niʼi‑n,
ko ntdaa kuu xavaʼa.
Juetniu‑n xamani‑ia,
xa chindee tnaʼa‑n.
Vaʼa juetniu koio‑n,
ɨɨn ɨɨn‑n,
xa n‑taxi‑ia.
11 Nux jaʼan ɨɨn ñayiu,
na jaʼan‑i meni tnuʼu Ianyuux.
Nux chindee ɨɨn ñayiu ñani‑ro kuʼa‑ro,
na kundetu kuee‑i nuu Ianyuux,
xa kada ndaku‑ia‑i.
Xaxeʼe xa ka jandixa‑n Jesucristu,
ntdaa xa kada koio‑n,
kada‑n xa ndadakaʼnu koio‑n Ianyuux.
Na juñaʼa‑ro xa n‑kutaʼu‑ro nuu‑ia nɨkava nɨkuita.
Te na taxnuni‑ia nuu‑ro nɨkava nɨkuita.
Duʼa na koo.
Kuvete koio‑n, nux kueʼe vida ka yaʼa‑n xaxeʼe xa ka jandixa‑n Cristu
12 Ñani mani‑da,
kuʼa mani‑da,
xini‑da xa kueʼe vida ka yaʼa‑n,
xini‑da xa kuu ná kuu xa ka yaʼa‑n yunuʼu koko xa koko.
Ko maxku yuʼu koio‑n,
maxku jaʼan koio‑n:
“¿Nakuenda,
Ianyuux?
¿Nakuenda duʼa kuu?”
13 ¡Kuvete koio‑n!
Kuvete koio‑n xaxeʼe xa kuaʼa xa yaʼa koio mee‑n kueʼe vida,
ná n‑yaʼa Cristu.
Nux duʼa ka kida‑n vitna,
te yo kueʼe ka kuvete koio‑n,
hora na ndixi‑ia xa dandeʼa ñaʼa‑ia xa taxnuni‑ia nuu ntdaa xa io.
14 Nux kuiʼa ka jaʼan ñaʼa ñayiu,
xaxeʼe xa ka kunduu‑n xiʼin Cristu,
kuvete koio‑n.
Chi duʼa xnaʼa‑n xa ndetatu Espíritu Ianyuux nuu‑n,
te taxnuni mee‑ia nuu ntdaa xa io.
Mee‑i,
kuiʼa ka jaʼan‑i Cristu,
ko mee‑n,
ndadakaʼnu‑n‑ia.
15 Ɨɨn ñani‑ro,
ɨɨn kuʼa‑ro,
nux io xa kueʼe vida yaʼa‑i,
maxku duʼa koo xaxeʼe xa n‑xaʼni‑i ndɨyɨ.
Maxku duʼa koo xaxeʼe xa kuu‑i ñaduʼu,
a kida‑i xa uʼu,
a kɨutnaʼa‑i nuu ka kida ɨnka ñayiu nax ka kida‑i.
16 Ko nux kueʼe vida ka yaʼa‑n xaxeʼe xa kunduu‑n xiʼin Cristu,
maxku kujanuu koio‑n.
Kunduu naʼi koio ka‑n xiʼin Cristu,
te juñaʼa‑n xa n‑kutaʼu‑n nuu‑ia.
17 Chi n‑xee kɨu xa kixeʼe Ianyuux xa ndadandaa‑ia daʼya‑ia.
Te nux kiʼna nuu ndadandaa ñaʼa‑ia mee‑ro,
te,
¿nax koo hora ndadandaa‑ia ñayiu ñatu ka jandixa tnuʼu‑ia?
18 Nux yo uʼu xa nanitaʼu ñayiu ka jandixa Ianyuux,
te,
¿nanda nanitaʼu ñayiu ñatu jandixa‑ia,
xiʼin ñayiu ka kida kuechi?
19 Xijan kuu xa,
hora juejoon Ianyuux xa kueʼe vida yaʼa koio‑n,
maxku yuʼu‑n.
Kunduu naʼi koio ka‑n xiʼin Ianyuux.
N‑kidavaʼa‑ia ntdaa xa io,
te meni xavaʼa kida‑ia.
Juejoon koio‑n nuu‑ia,
te kada naʼi koio ka‑n xavaʼa.