Nanda io xa kutuu ñayiu n‑tnundaʼa
3
Te vitna jaʼan‑da nuu ñadɨʼɨ.
Jandixa koio‑n yɨɨ‑n.
Juini ta jandixa ka‑s tnuʼu Ianyuux,
ko ndeʼa‑s ntdaa xa kida mee‑n.
Ña ndoñuʼu xa juñaʼa‑n tnuʼu Ianyuux nuu‑s.
Diko ni jandixa‑n‑sɨ.
Te duʼa chindee‑n‑sɨ xa dani jandixa mee‑s Cristu tuku.
2 Jini‑s xa jandixa‑n Ianyuux te jandixa‑n mee‑s,
te kundeʼa‑s xa meni xavaʼa kida‑n.
3-4 Yaʼu ka xa kida‑n xavaʼa dada xa vaʼa kaa‑n.
Vax ndɨʼɨ idi dɨkɨ vili kaa‑n.
Vax ndɨʼɨ xedoʼo‑n,
dɨkɨ‑n,
deʼe‑n.
Vax ndɨʼɨ daʼma vaʼa‑n.
Ntdaa xaʼa kida xa vili kaa yɨkɨ kuñu‑n,
ko yo yaʼu ka xa ku kuu‑n ñadɨʼɨ vaʼa.
Ná kuu ɨɨn xa yo yɨvaʼa kuu anu‑n,
ko kutuu anu‑n kuia ma jɨn ndɨʼɨ.
Kuu ná kuu xa kida‑n xa vili kaa anu‑n.
Maxku kuxee ini koio‑n,
io xa ku kuu vii anu‑n.
Nux duʼa na kada koio‑n,
te yo tna ini Ianyuux.
5 Duʼa n‑ka xo kida ñadɨʼɨ nde xá kuia.
N‑kida dɨɨn Ianyuux mee‑ña,
xa kada koio‑ña xa juini‑ia.
N‑ka xo ndetu‑ña ntdaa xa kada Ianyuux,
te n‑ka jandixa‑ña yɨɨ‑ña.
Ñadɨʼɨ vaʼa n‑ka kuu‑ña,
vii n‑ka kuu anu‑ña.
6 Duʼa n‑kida ñadɨʼɨ nani Sara.
N‑jandixa‑ña yɨɨ‑ña,
Abraham.
N‑jaʼan‑ña:
“Jefe veʼe kuu‑te.”
Te mee‑n ka kuu daʼya Sara,
nux ka kida‑n xavaʼa te ñatu ka yuʼu‑n.
7 Seyɨɨ,
mee‑n du.
Io xa kutuu mani koio‑n xiʼin ñadɨʼɨ‑n.
Xnaʼa‑n xa ña ka ndaku mee‑ña ná unu ndaku mee‑n.
Ñadɨʼɨ ka kuu‑ña.
Koo koio‑n xañuʼu nuu‑ña,
chi mee‑n xiʼin mee‑ña,
nduu‑n ka kuu daʼya Ianyuux.
Xamani‑ia n‑jaʼan ñaʼa Ianyuux mee‑n,
xa kutuu vaʼa‑n,
nduu‑n xiʼin mee‑ña,
xiʼin Ianyuux kuia ma jɨn ndɨʼɨ.
Kutuu mani koio‑n xiʼin ñadɨʼɨ‑n,
xa kunini Ianyuux ntdaa xa kajan taʼu‑n.
Vatuka nux kueʼe vida yaʼa‑n xaxeʼe xa kida‑n xavaʼa
8 Vitna jaʼan‑da nuu ntdaa‑n.
Ɨɨn nuu kani ini koio‑n.
Kundau ini tnaʼa‑n,
te chindee tnaʼa‑n.
Juemani tnaʼa‑n,
ɨɨn‑n xiʼin ɨnka‑n,
taxkanu ini tnaʼa‑n.
Ku kuu‑n ñayiu ka kida xavaʼa.
9 Nux kida ñaʼa ɨɨn ñayiu xa uʼu,
te maxku dandenaa‑n.
Nux kuiʼa jaʼan ɨɨn ñayiu nuu‑n,
te maxku kuiʼa jaʼan mee‑n nuu mee‑i.
Kajan taʼu‑n xaxeʼe‑i,
chi n‑jaʼan ñaʼa Ianyuux mee‑n,
xa tnɨɨ koio‑n xamani‑ia.
10 Chi jaʼan tnuʼu Ianyuux:
Ɨɨn ñayiu,
nux juini‑i xa kutuu vaʼa‑i te kuvete‑i,
io xa dajɨn tnɨɨ‑i tnuʼu jaʼan‑i,
te maxku jaʼan‑i tnuʼu vete.
11 Na dandoo‑i xa uʼu,
na kada‑i xavaʼa.
Na kutuu mani‑i xiʼin ntdaa ñayiu,
na kajan niʼno‑i xa na koo xamani te maxku koo pletu.
12 Chi xini Ianyuux ñayiu ka kida xavaʼa,
te nini‑ia hora ka xijan taʼu‑i nuu‑ia.
Ko kiti ini Ianyuux nuu ñayiu ka kida xa uʼu.
Ña tna ini‑ia,
jantnaʼa‑ia xiʼin‑i.
13 Xijan kuu xa,
¿jundu kuaʼa xa kada ñaʼa‑i xa uʼu,
nux meni xavaʼa kada koio‑n?
14 Te nux kueʼe vida yaʼa koio‑n xaxeʼe xa ka kida‑n xavaʼa,
ko vatuka.
Kada Ianyuux xa kuvete koio‑n.
Ko maxku yuʼu koio‑n nuu ñayiu ka kida xa kueʼe vida yaʼa‑n,
maxku kɨ ini‑n nuu‑i.
15 Xiʼin ntdaa anu‑n,
jandixa naʼi koio ka‑n Xtoʼo‑ro Jesucristu.
Ia ii kuu‑ia.
Juejoon koio‑n xa taxnuni‑ia nuu‑n.
Nux duʼa na kada koio‑n,
te duʼa koo tuʼa koio‑n xa jaʼan ndaa‑n xaxeʼe‑ia.
Juñaʼa‑n xa n‑kida‑ia xa kutuu vaʼa‑n xiʼin‑ia kuia ma jɨn ndɨʼɨ,
nux jundu xijan tnuʼu ñaʼa nakuenda jandixa‑n‑ia.
16 Ko kada vii kada vaʼa‑n,
koo koio‑n xañuʼu nuu Ianyuux,
te koo koio‑n xañuʼu nuu ñayiu jan.
Ntdaa xa kada koio‑n,
maxku kada‑n xa dakuido datau‑n anu‑n.
Nux duʼa kada koio‑n,
juini kuiʼa jaʼan ñayiu nuu‑n,
ko dani kujanuu‑i xaxeʼe tnuʼu ka jaʼan‑i,
chi xini‑i xa ka jandixa‑n Cristu te ka kida‑n xavaʼa.
17 Nux juini Ianyuux xa kueʼe vida yaʼa koio‑n xaxeʼe xa ka kida‑n xavaʼa,
ko vaʼa ka xaʼa dada xa kueʼe vida yaʼa koio‑n xaxeʼe xa ka kida‑n xa uʼu.
18 Idini vuelta n‑xiʼí Cristu xaxeʼe kuechi ka kida ñayiu,
n‑kenaa vitna.
Meni xavaʼa n‑kida Cristu.
N‑xiʼí‑ia xaxeʼe ñayiu ka kida xa uʼu,
n‑xiʼí‑ia xa kandeka ñaʼa‑ia mee‑ro jɨʼɨn nuu tuu Ianyuux,
xa kutuu vaʼa‑ro xiʼin‑ia.
N‑ka xaʼni ñayiu yɨkɨ kuñu Cristu,
ko n‑kida Ianyuux xa n‑xo tuu naʼi anu Cristu.
19 N‑xeʼen anu‑ia nuu ndɨyɨ,
xa juña tnuʼu‑ia nuu anu xyɨndiʼu ijan.
20 Anu jan,
na n‑ka xo tuu‑i ñuñayiu,
ña n‑ka juini‑i xa jandixa‑i Ianyuux.
Kuee kuee n‑xo ndetu Ianyuux xa jandixa‑i‑ia,
ko ña n‑ka juini‑i.
Kɨu ijan n‑xo kidavaʼa se nani Noé barcu,
nani n‑taʼu tniu Ianyuux.
Una ni ñayiu n‑ka kɨu barcu jan.
Meni mee‑i n‑dakaku ñaʼa Ianyuux nuu ndute kaʼnu,
nu n‑juun dau ndeʼe.
21 Te nani n‑dakaku Ianyuux ñayiu n‑ka jandixa‑ia kɨu ijan,
dani dakaku ñaʼa‑ia mee‑ro vitna.
Ná kuu ndute jan kuu xa xendute‑ro.
(Ko ndute xendute‑ro ñatu dakaku ñaʼa kuechi‑ro.
Diko ni kuu ná kuu xa xiaʼan‑ro nuu Ianyuux xa jandixa‑ro‑ia te juini‑ro xa kada‑ro xa juini mee‑ia.)
Xaxeʼe xa n‑nandoto Jesucristu,
te dakaku ñaʼa Ianyuux.
22 Tuu Jesucristu andɨu.
Nukoo‑ia ndaʼa kuaʼa Ianyuux.
Taxnuni‑ia nuu ángel,
ia ka xinokuechi nuu Ianyuux,
te taxnuni‑ia nuu ntdaa ɨnka xa io.