2
Xijan kuu xa,
dandoo koio‑n ntdaa xa uʼu,
ntdaa kuechi.
Maxku dandaʼu‑n ɨɨn ñayiu.
Jaʼan koio‑n xandaa,
te kada koio‑n xandaa.
Maxku kukuedi ini‑n nuu ɨnka ñayiu,
maxku kuiʼa jaʼan‑n yata ñayiu.
2 Ná kuu seyɨjɨn dichi yɨjɨn ka kuu‑n,
te ná kuu dɨku vaʼa kuu tnuʼu Ianyuux.
Io xa kojon‑n yichi‑n tnuʼu‑ia,
te duʼa kueʼnu vaʼa‑n.
Te duʼa kutuu vaʼa koio‑n xiʼin Ianyuux kuia ma jɨn ndɨʼɨ.
3 Xá n‑ka xitotnuni‑n Jesucristu,
te ka xini‑n xa yo vaʼa‑ia.
Ia Ndito kuu Jesucristu
4-5 Kuu ná kuu xa kidavaʼa Ianyuux ɨɨn veñuʼu nuu kutuu mee‑ia.
Ná kuu yuú xeʼe veñuʼu ka kuu mee‑n.
Yuú yo vaʼa ka veñuʼu jan kuu Xtoʼo‑ro Jesucristu.
Seyɨɨ,
n‑ka dajane‑s‑ia ɨɨn lado,
ko Ianyuux n‑kaxí mee‑ia.
Naʼa Ianyuux xa vaʼa ka yuú n‑ka dajane‑s dada davaʼa nga yuú io.
Ia Ndito kuu Jesucristu,
te na kuyatni mee‑n mee‑ia,
te kada‑ia xa kundito koio mee‑n tuku.
Xaxeʼe mee‑ia,
ka kuu mee‑n yuú ndito,
te yuú jan kidavaʼa Ianyuux veñuʼu nuu kutuu mee‑ia.
Dɨuni ka kuu‑n dutu veñuʼu jan.
Xá n‑kida dɨɨn ñaʼa Ianyuux mee‑n,
xa ku kuu koio‑n dutu nuu mee‑ia.
N‑kaxí ñaʼa‑ia,
xa juñaʼa koio‑n xa doko‑n nuu‑ia.
Te mee‑n ka kuu xa doko‑n.
Xaxeʼe xa n‑xiʼí Jesucristu xaxeʼe‑n,
te kueka vaʼa Ianyuux xa doko‑n.
6 Jaʼan tnuʼu Ianyuux:
Kundeʼa koio‑n xa n‑kaxí mee‑r ɨɨn seyɨɨ.
Ná kuu ɨɨn yuú yo vaʼa ka kuu‑s,
yuú kiʼna nuu.
Yaʼu ka yuú yaʼa,
dada davaʼa nga ɨnka xa io.
Kajan ndodo‑r yuú yaʼa ñuu Sión.
Ɨɨn ñayiu,
nux jandixa‑i se yaʼa,
nuncas ma kujanuu‑i.
7 Mee‑n,
ka jandixa‑n Xtoʼo‑ro Jesucristu,
ka xini‑n xa yuú vaʼa ka kuu‑ia.
Ko io ñayiu ñatu ka jandixa‑ia.
Ná jaʼan tnuʼu Ianyuux,
dani kuu:
Se kidavaʼa veñuʼu,
n‑ka dajane‑s yuú yaʼa ɨɨn lado.
Ko vitna yuú yaʼa kuu yuú yɨtnɨɨ meʼñu dɨkɨ veñuʼu nuu kutuu Ianyuux.
8 Dɨuni xetnaʼa ná jaʼan tnuʼu Ianyuux:
Yuú yaʼa kida xa jɨn kɨʼɨ ñayiu,
kida xa ndua‑i.
Ndua‑i,
chi xaxeʼe xa kuxee ini‑i,
ña juini‑i xa jandixa‑i tnuʼu Jesucristu.
Te n‑xo naʼa Ianyuux xa duʼa koo,
n‑xo naʼa‑ia xa ma jandixa‑i Cristu.
Kuenda Ianyuux ka kuu‑n
9 Ko mee‑n ka kuu‑n ñayiu n‑kaxí ñaʼa Ianyuux.
Ia kunxaʼnu ka kuu‑ia,
te mee‑n ka kuu dutu nuu‑ia.
N‑kida dɨɨn ñaʼa‑ia,
xa kada koio mee‑n xa juini mee‑ia.
Ñayiu ñuu mee‑ia ka kuu‑n.
Juñaʼa‑n xa n‑kutaʼu‑n nuu‑ia.
Jaʼan‑n nuu ntdaa ñayiu xa Ia kunxaʼnu ka kuu‑ia.
Kuu ná kuu xa n‑ka xo xika‑n nuu nee,
ko n‑jaʼan ñaʼa‑ia,
xa kee koio‑n nuu nee,
xa kunduu koio‑n xiʼin mee‑ia nuu kanda vaʼa xa vaʼa.
10 Chi antecas,
ña n‑ka kuu‑n daʼya Ianyuux,
ko vitna,
ka kuu‑n daʼya‑ia.
Antecas,
ñatu n‑xo kundau ini ñaʼa ni ɨɨn ñayiu,
ko vitna,
kundau ini ñaʼa Ianyuux.
Ñayiu xinokuechi nuu Ianyuux ka kuu‑n
11 Ñani mani‑da,
kuʼa mani‑da,
setoʼo,
ñátoʼo ka kuu‑n ñuñayiu yaʼa.
Andɨu kuu ñuu‑n.
Maxku juejoon‑n xa kadajuexa ñaʼa yɨkɨ kuñu‑n xa kada‑n kuechi.
Kuu ná kuu xa jantnaʼa yɨkɨ kuñu‑n xiʼin anu‑n.
12 Meʼñu ñayiu ña ka jandixa Ianyuux xtuu mee‑n.
Io xa kada koio‑n xavaʼa.
Kuiʼa ka jaʼan ñayiu nuu mee‑n,
ná ka jaʼan‑i nuu ñayiu ka kida xa uʼu.
Ko nɨni duʼa jaʼan‑i,
xndeʼa‑i xa ka kida‑n xavaʼa.
Te duʼa koo xa ndadakaʼnu mee‑i Ianyuux,
na ndadandaa‑ia ntdaa xa io.
13 Ñayiu jandixa Xtoʼo‑ro Jesucristu ka kuu‑n.
Xaxeʼe xaʼa,
io xa jandixa koio‑n se ka taxnuni nuu‑n.
Kada koio‑n nax taʼu tniu se kunxaʼnu ka,
chi se taxnuni nuu‑ro kuu‑s.
14 Jandixa koio‑n se tundaʼa‑s.
Kada uʼu koio‑s ñayiu kida xa uʼu,
ko vaʼa jaʼan‑s nuu ñayiu kida xavaʼa.
15 Chi juini Ianyuux xa kada koio mee‑n xavaʼa,
te duʼa kada‑n xa ma jaʼan ka se xee ini,
se ñatu xini vaʼa.
16 Ñayiu libre ka kuu‑n.
Ko maxku kani ini koio‑n xa kuaʼa xa kada‑n davaʼa nga xa juini‑n.
Maxku kada koio‑n kuechi.
Ku kuu koio‑n ñayiu xinokuechi nuu Ianyuux.
17 Koo koio‑n xañuʼu nuu ntdaa ñayiu.
Juemani koio‑n ñani‑ro kuʼa‑ro.
Yuʼu koio‑n nuu Ianyuux.
Koo koio‑n xañuʼu nuu se kunxaʼnu ka.
Ɨɨn ichi kaneʼe katnɨɨ koio‑n kuu Cristu
18 Vitna jaʼan‑da nuu seyɨɨ ñadɨʼɨ ka xinokuechi nuu ɨnka ñayiu.
Jandixa koio‑n patrón‑n.
Koo‑n xañuʼu nuu‑s.
Nux patrón vaʼa kuu‑s te ndetu kuee‑s nuu‑n,
jandixa‑n‑sɨ.
Ko dɨuni,
nux patrón ndeʼe kuu‑s,
ko dani jandixa‑n‑sɨ.
19 Duʼa kada koio‑n xavaʼa.
Juini kueʼe xa kida ñaʼa patrón,
te kueʼe xa ka yaʼa‑n,
ko kundee ini naʼi koio ka‑n,
xaxeʼe xa ka jandixa‑n Ianyuux.
20 Nux kida‑n xa uʼu,
te vatuka xa kada uʼu ñaʼa patrón‑n.
Maxku jaʼan‑n ni ɨɨn hora janñaʼa‑s.
Ko nux kida‑n xavaʼa te kueʼe vida yaʼa‑n,
te juejoon‑n nuu Ianyuux te kundee ini‑n.
Te duʼa tna ini Ianyuux.
21 Xaxeʼe xaʼa n‑jaʼa ñaʼa Ianyuux.
Kueʼe vida n‑yaʼa Cristu xaxeʼe‑ro.
N‑kuu‑ia ɨɨn ichi kaneʼe katnɨɨ‑ro,
xa kada koio mee‑ro ná n‑kida mee‑ia.
22 Nuncas ña n‑kida‑ia ni ɨɨn kuechi,
nuncas ña n‑dandaʼu‑ia ni ɨɨn ñayiu.
23 Juini kuiʼa n‑ka jaʼan ñayiu,
ko nuncas ña kuiʼa n‑jaʼan mee‑ia nuu mee‑i.
Juini n‑ka kida ñayiu xa kueʼe xa kueʼe vida n‑yaʼa‑ia,
ko nuncas ña n‑ndundeʼe‑ia.
Naʼa‑ia xa Taa‑ia kuu Ia ndadandaa vaʼa ntdaa xa io,
te n‑xejoon‑ia nuu Taa‑ia.
24 Xaxeʼe kuechi mee‑ro n‑xiʼí Cristu nuu curuxi.
Xiʼin yɨkɨ kuñu‑ia n‑chiyaʼu‑ia kuechi‑ro.
N‑xiʼí‑ia,
xa dandoo‑ro kuechi‑ro,
xa kada‑ro xa juini Ianyuux.
N‑tnukueʼe Jesucristu,
xa ndadavaʼa ñaʼa‑ia mee‑ro.
25 Ná doʼo tkachi,
da n‑ka xo kudoʼo mee‑n.
Ko vitna ka kunduu‑n xiʼin Cristu.
Ná ñunuu ɨɨn se ñunuu tkachi,
da ñunuu ñaʼa Cristu mee‑n.
Te ná taxnuni ɨɨn sexaʼnu nuu ñayiu veñuʼu,
da taxnuni Cristu nuu mee‑n.