Nax io xa kada koio ñayiu ka kukanu ini Jesucristu
3
Dɨuni juñaʼa‑n nuu ñayiu de xa na jueyuʼu na juendetu‑i nuu juxtixia ñuu‑i xiʼin nuu dava ka se ka taxnuni nuu‑i.
Na jandixa koio‑i‑sɨ.
Na koo anu‑i xa kada‑i xavaʼa.
2 Dɨuni juñaʼa‑n nuu‑i xa maxku kuiʼa jaʼan‑i ɨnka ñayiu,
ni maxku jan kuiʼa‑i‑yɨ.
Maxku jantnaʼa koio‑i.
Na kutuu mani‑i xiʼin dava ka ñayiu du.
Ndaʼu kee na kutuu koio‑i na kuaʼa na kundeʼa dava ka ñayiu.
3 Na ta kukanu ini koio ka‑ro Jesucristu,
n‑ka xo kuloko n‑ka xo kuduʼa ni‑ro,
te ñatu n‑ka xo jandixa‑ro ley Ianyuux chi tuku n‑ka dakuaʼa ñaʼa ñayiu.
Ntdantuʼu xaloko xaduʼa n‑kuu anu‑ro xa kada‑ro n‑ka kida‑ro,
ñatu n‑ka xo ndedi ini‑ro.
N‑xo xiaʼan‑ro justu anu‑ro.
Mee ni xane xayichi n‑ñuʼu anu‑ro.
N‑ka xo kukuedi ini‑ro hora n‑ka xo teku‑ro xa xe kotuu vaʼa ɨnka ñayiu juaʼan.
Dɨuni n‑xo xini uʼu‑ro dava ka ñayiu,
te n‑xo xini uʼu tnaʼa‑ro xiʼin ñayiu ka xinitnaʼa xiʼin‑ro.
4 Daa n‑ka xo kida‑ro,
ko n‑ka teku‑ro nax n‑kida Ianyuux,
Ia dananitaʼu ñaʼa xa nanitaʼu‑ro xiʼin nax io xa kada‑ro na kuaʼa daa dananitaʼu ñaʼa‑ia.
Dɨuni n‑ka teku‑ro xa xemani ñaʼa‑ia.
5 Ñadu xaxeʼe xa n‑ka kida‑ro ɨɨn xavaʼa dananitaʼu ñaʼa‑ia chi dananitaʼu ñaʼa‑ia xaxeʼe xa n‑kundaʼu ini ñaʼa‑ia.
N‑kida Espíritu‑ia xa n‑ka nduu‑ro ɨnka ñayiu;
ñatuka ka kuu‑ro ná n‑ka xo kuu‑ro.
6 N‑kida Ianyuux xa n‑kee ñaʼa Espíritu‑ia xaxeʼe xa n‑chiyaʼu Jesucristu kuechi‑ro.
Yo kidatniu Espíritu‑ia anu‑ro.
7 N‑kida‑ia xa ñatuka xndido xtau‑ro kuechi n‑ka kida‑ro xaxeʼe xa n‑kundaʼu ini ñaʼa‑ia xiʼin xaxeʼe xa xemani ñaʼa‑ia.
Te xñu ini‑ro xa niʼi‑ro taʼu‑ro.
Taʼu‑ro kuu xa kutuu‑ro nuu tuu Ianyuux nɨkava nɨkuita.
8 Ɨɨn xandaa kuu xa kakuneʼe‑r,
ñadu ɨɨn xavete.
Taʼu tniu‑r nuu‑n xa dakuaʼa‑n ñayiu xa kakuneʼe‑r ya na kuaʼa daa na kada ñayiu ka kukanu ini Ianyuux xavaʼa.
Daa na jun ini koio‑i.
Nux na jandixa koio‑i xa kakuneʼe‑r ya,
kueʼe xavaʼa kuu‑i ntdaa‑i.
9 Maxku danuu‑n cuentu ña ndandɨʼɨ.
Ni maxku yo nduku tnuʼu‑n jundu n‑ka xo kuu tadɨʼɨ xixitna ñayiu dian,
ni maxku yo nduku tnuʼu‑n nuu ndexu vaxi koio‑i.
Ni maxku jantnaʼa tnuʼu‑n xiʼin dava ka ñayiu xaxeʼe ley n‑chidotnuni Moisés chi ña tuu nax kineʼe‑n.
10 Se na kada xa kaʼnde tnaʼa ñayiu ka kukanu ini Jesucristu,
kanandee‑n‑sɨ uu a uni vuelta.
Te nux ña n‑jandixa ñaʼa‑s maxku kandeka tnaʼa ka‑n xiʼin‑s.
Kuijun‑n‑sɨ
11 chi kunaʼa‑n xa se daa kida,
seloko kuu‑s;
mee ni xaloko xani ini‑s.
Dakuita‑s mee‑s chi kueʼe xa kida‑s.
N‑jaʼan Spalu xa kada Tito xamani juini‑s
12 Ñu ini‑r xa tundaʼa‑r Artemas o Tíquico xee Creta de.
Kɨu na xino ndeda ɨɨn‑s,
xee‑n Nicópolis.
Ijan nanitnaʼa‑ro chi ñu ini‑r xa ijan kutuu‑r yoo vixi.
Kundu ini‑n kixi‑n.
13 Juñaʼa‑n ntdaa xa ka ndoñuʼu se kuu abogado nani Zenas xiʼin Apolo hora na njunu ichi‑s na kuaʼa maxku ñaʼa ndoñuʼu xa ndoñuʼu koio‑s ichi jɨʼɨn‑s.
Juñaʼa ndendaa xe kandita‑n.
14 Na kada koio ñayiu ka kukanu ini xiʼin‑ro Jesucristu xavaʼa.
Na juñaʼa‑i xa ka ndoñuʼu ɨnka ñayiu kukanu ini‑ia.
Na dakuaʼa‑i chindee tnaʼa‑i.
15 Ntdaa se xtuu xiʼin‑r yaʼa ka ndajan tnuʼu ñaʼa,
Tito.
Juñaʼa nuu ntdaa ñayiu xemani ñaʼa xndaxio dian xa yo ndajan tnuʼu‑r‑yɨ.
Na chindee chituu ñaʼa Ianyuux ntdaa‑n.