Janda dakuaʼa Tito ñayiu ka kukanu ini Jesucristu
2
Ko ndoʼo,
Tito,
na nakaxtnaʼa xa dakuaʼa‑n ñayiu dian xiʼin xa dakuaʼa mee‑r ñayiu vaxi.
Ɨɨn xandaa kuu.
2 Juñaʼa‑n nuu sexaʼnu xa maxku koʼo‑s xa nde xini‑s,
te na kada‑s xavaʼa na kuaʼa na koo ñayiu xañuʼu nuu‑s,
te na ku kunxaʼnu‑s.
Juñaʼa‑n nuu‑s xa na jandixa koio‑s xa dakuaʼa‑ro ñayiu vaxi.
Ɨɨn xandaa kuu xijan.
Juñaʼa‑n nuu‑s xa na juemani‑s ñayiu.
Dɨuni juñaʼa‑n nuu‑s xa na kukanu ini ka‑s Ianyuux.
3 Dɨuni juñaʼa‑n nuu ñaxaʼnu xa na kada‑ña xavaʼa te na ku kuu ñukax ini‑ña.
Maxku jan tnuʼu‑ña ñayiu,
ni maxku koʼo‑ña xa nde xini‑ña.
Juñaʼa‑n nuu‑ña xa na kada koio‑ña xavaʼa na kuaʼa na kada koio dava ka ñayiu xavaʼa tuku.
4 Na juñaʼa‑ña nuu ñá ka kukuechi xa na juemani‑ña yɨɨ‑ña xiʼin daʼya‑ña.
5 Dɨuni na juñaʼa‑ña nuu ñá ka kukuechi ya xa na ku kunxaʼnu‑ña te maxku chitnaʼa‑ña xiʼin ɨnka seyɨɨ.
Na juñaʼa‑ña nuu‑ña xa na kada‑ña tniu io nukee nuveʼe‑ña te na jueyuʼu juendetu‑ña nuu yɨɨ‑ña na kuaʼa maxku kuiʼa jaʼan ñayiu Ianyuux.
6 Dɨuni juñaʼa‑n nuu se ka kukuechi xa na ku kunxaʼnu‑s.
7 Te ndoʼo,
Tito,
kada xavaʼa na kuaʼa na kada koio dava ka ñayiu xavaʼa tuku.
Nux dani na kada‑n xavaʼa,
koo‑i xañuʼu nuu‑n.
Hora na dakuaʼa‑n ñayiu,
jaʼan ndaa‑n nuu‑i;
ñadu xa tuku xa ku jaʼan‑n.
8 Jaʼan‑n mee ni xandaa nuu‑i na kuaʼa maxku kine tnuʼu ñaʼa ñayiu dakuaʼa‑n xiʼin xa na kujanuu ñayiu ka dadaʼan xa dakuaʼa‑n‑yɨ,
te ma jan tnuʼu ñaʼa ka‑i roo,
chi ñavada kineʼe ka‑i cuentu.
9 Juñaʼa‑n nuu ñayiu ka kidatniu duʼa nuu xtoʼo‑i xa na jueyuʼu na juendetu koio‑i nuu‑s te na kada koio‑i xa juini‑s xa na tna ini ñaʼa‑s.
Maxku dadavatnaʼa‑i xiʼin‑s.
10 Juñaʼa‑n nuu‑i xa maxku duʼu‑i xaxii xtoʼo‑i.
Na kava nxaʼnu mudu‑i na kuaʼa na kukanu ini ñaʼa xtoʼo‑i.
Nux na kava nxaʼnu mudu‑i,
jini xtoʼo‑i xa ka kukanu ini‑i Cristu Jesús xiʼin xa ka kaʼu‑i tnuʼu Ianyuux yodotnuni,
te najuentnuʼu‑s Ianyuux,
Ia dananitaʼu ñaʼa.
Ntdaa xijan juñaʼa‑n nuu ñayiu dian.
11 N‑ka teku‑ro xiʼin dava ka ñayiu xa n‑jaʼan Ianyuux nax io xa kada koio ñayiu ñuñayiu xa na nanitaʼu koio‑ro xiʼin‑i.
12 Dɨuni n‑ka teku‑ro xiʼin‑i xa io xa dandoo‑ro xiʼin‑i xaloko xaduʼa ka kida‑ro xiʼin xa maxku kani ini ka‑ro xiʼin‑i xa kada‑ro xiʼin‑i xane xayichi.
Dɨuni n‑ka teku‑ro xa io xa ku kunxaʼnu koio‑ro xiʼin xa io xa jandixa koio‑ro xa taʼu tniu Ianyuux xiʼin xa io xa kada koio‑ro xiʼin‑i xa juini‑ia.
Roo,
ñayiu n‑ka kukanu ini Cristu Jesús,
Ia dananitaʼu ñaʼa n‑ka kida‑ro xaloko xaduʼa ná ka kida ñayiu ñatu ka kukanu ini‑ia.
13 Na kada koio‑ro xiʼin ntdaa ñayiu n‑ka kukanu ini Cristu Jesús xa taʼu tniu Ianyuux nɨni xndetu‑ro xa ndixi Cristu Jesús,
Ia n‑kida xa nanitaʼu‑ro,
Ia kandeka ñaʼa nuʼu andɨu.
Kɨu ijan kixi Ianyuux,
te jini ñayiu xa ndukaʼnu‑ia.
Xndetu‑ro xa na xee kɨu ijan,
te yo ka kudɨ ini‑ro.
14 N‑xiʼí Cristu Jesús xa n‑chiyaʼu‑ia ntdaa kuechi‑ro te ñatuka xndido xtau‑ro kuechi‑ro;
kuenda kɨu ña tuu na kuechi n‑ka kida‑ro.
N‑kida‑ia xa n‑ka nduu‑ro daʼya‑ia,
te yo ka kuu anu‑ro xa kada‑ro xa taʼu tniu‑ia vitna.
15 Ntdaa xa n‑kakuneʼe‑r ya,
juñaʼa‑n nuu ñayiu xa na kada koio‑i.
Te nux ndeda‑i ña juini kada xa kakuneʼe‑r,
kanandee‑n‑yɨ.
Nux na kuekundee ñaʼa ñayiu kanandee‑n‑yɨ tuku;
maxku juejoon‑n xa kuekundee ñaʼa‑i.