6
Ñayiu ka kidatniu duʼa nuu xtoʼo‑i,
na koo‑i xañuʼu nuu‑s,
chi io xa koo‑ro xañuʼu nuu xtoʼo‑ro.
Duʼa na kada‑i na kuaʼa maxku kuiʼa jaʼan ñayiu Ianyuux,
ni maxku ku jaʼan‑i xa ɨɨn xaloko xaduʼa ka dakuaʼa‑ro ñayiu.
2 Ñayiu ka kukanu ini Cristu Jesús ka kidatniu duʼa nuu se kukanu ini‑ia,
na jueyuʼu juendetu koio‑i nuu‑s;
ñadu xa ma koo‑i xañuʼu nuu‑s diko ni xaxeʼe xa ka kuu‑s xiʼin‑i se kukanu ini‑ia.
Duʼa na kadatniu ka‑i nuu‑s xaxeʼe xa xemani‑i‑sɨ.
Daxa se kukanu ini Cristu Jesús kuu‑s,
te kueʼe xa niʼi‑s xaxeʼe tniu ka kida‑i.
Xaʼa jaʼan‑n nuu ñayiu te jan doʼo‑n‑yɨ.
Maxku kukajan ini‑ro tvini
3 Se ka dakuaʼa ñayiu,
te kakuneʼe‑s ɨɨn xa ña ndaa hora dakuaʼa‑s‑yɨ,
ña xe ini‑s xa n‑dakuaʼa ñaʼa Jesucristu.
Xa n‑dakuaʼa ñaʼa‑ia jan dakuaʼa roo ñayiu.
Ɨɨn xandaa kuu.
4 Ka kuu iʼni‑s xa ka tuʼa‑s,
ko ñatu ndaa xa ka tuʼa‑s chi tuku ka jaʼan‑s nuu ñayiu.
Ñatu ka dakuaʼa‑s ñayiu xa n‑dakuaʼa ñaʼa Cristu Jesús.
Yo ka tna ini‑s xa jantnaʼa tnuʼu‑s xiʼin ñayiu xaxeʼe ɨɨn xa ña ndandɨʼɨ te duʼa kuu xa io xakuedi ini.
Duʼa kuu xa ña ka kuu ɨnuu‑s.
Dɨuni xaxeʼe xijan kuiʼa ka jaʼan tnaʼa‑s,
te ka dakuido kuechi tnaʼa neñuu‑s.
5 Yo ka jantnaʼa tnuʼu‑s chi mee ni xaloko ka xani ini‑s.
Jandixa‑s ɨɨn xa ña ndaa te dakuaʼa‑s ñayiu diko ni xa niʼi‑s tvini xa na kukuika koio‑s.
6 Kueʼe xa vaʼa kuu ñayiu kida xa juini Ianyuux,
ko nux ñatu jan kuechi‑i xa ñatu tuu nga xnevaʼa‑i xa kaxi xa koʼo‑i xa kundix kudaʼu‑i.
7 Ni ɨɨn xa ña tuu nax neʼe‑ro n‑kixee ñuñayiu yaʼa na n‑kaku‑ro,
te ni ɨɨn ña tuu nax kaneʼe‑ro jɨʼɨn andɨu kɨu na kuu‑ro.
8 Nux io xa kaxi xa koʼo‑ro te nux io xa kundix kudaʼu‑ro,
maxku jan yɨka‑ro.
9 Ñayiu ka juini xa nkotuu kuika‑i,
ña xndedi ini‑i hora dajaʼan ñaʼa Kuiʼna te kida‑i kuechi.
Ñatu ndaku‑i xa kundedi ini‑i nuu xaloko xaduʼa kida‑i.
Yo ka tna ini‑i xa kada‑i xaloko xaduʼa,
te xaxeʼe xijan ndaʼu ka yaʼa‑i.
10 Ñadu ɨɨn xa vaʼa kuu xa kukajan ini‑ro tvini chi ñayiu yo kajan ini tvini,
diko xaʼa diko xijan ka kida‑i xa na niʼi‑i xijan.
Dava ñayiu,
ñatuka ka kukanu ini‑i Cristu Jesús xaxeʼe xa kukajan ini‑i tvini,
te yo kueʼe vida yaʼá‑i xaxeʼe xijan.
Io xa kada Timoteo xa juini Ianyuux
11 Ko ndoʼo,
xa kuu‑n se jaʼan tnuʼu Ianyuux nuu ñayiu,
maxku daa kada‑n.
Jun ini xa kada naʼi‑n xavaʼa.
Kada naʼi xa juini Ianyuux,
te kukanu ini naʼi Cristu Jesús.
Juemani naʼi ñayiu,
te vivii jaʼan nuu‑i.
Jandixa naʼi Ianyuux juini ndaʼu na yaʼa‑n.
12 Xaxeʼe xa kukanu ini‑n Cristu Jesús,
kada xavaʼa na ka kida ñayiu kukanu ini‑ia.
Maxku dakaku‑n xa kutuu‑n xiʼin Ianyuux nɨkava nɨkuita chi xaxeʼe xijan n‑kaxi ñaʼa‑ia te n‑jaʼan mee‑n xa ma dakaku‑n xa kutuu‑n xiʼin‑ia nɨkava nɨkuita nuu n‑ka nataka kueʼe ñayiu.
13-14 Nini Ianyuux,
Ia kida xa ndito ntdaa xa ndito xiʼin Cristu Jesús,
Ia n‑jaʼan ndaa nuu Poncio Pilato na n‑kakuneʼe‑ia Ianyuux,
xa taʼu tniu‑r nuu‑n xaʼa.
Jandixa‑n ntdandituʼu xa taʼu tniu‑r,
te maxku kuxe ini‑n na kuaʼa maxku kanandee ñaʼa‑r.
Kada ntdaa xaʼa,
na kuaʼa kɨu na ndixi Jesucristu jini‑ia xa xaʼa kida‑n.
15 Na xee kɨu n‑xantuu Ianyuux xa ndixi Jesucristu,
kada‑ia xa jini‑ro‑ia.
Ndukaʼnu Ianyuux te taxnuni‑ia nuu ñayiu xiʼin nuu ntdaa se taxnuni.
Dɨuni kunxaʼnu‑ia nuu ntdaa se ka kunxaʼnu.
16 Idii mee‑ia ña xiʼí te ma kɨu ma ñuu kuú‑ia.
Xaxeʼe xa yo ndii‑ia,
ñayo xetuʼa nuu tuu‑ia.
Ñayo xini‑ia chi ñatu kanda ndeʼa‑ro‑ia.
Na najuen tnuʼu‑ro‑ia,
te na jaʼan‑ro xa taxnuni‑ia nɨkava nɨkuita.
Amén.
17 Juñaʼa‑n nuu ñayiu kuika io ñuñayiu yaʼa,
xa maxku ku kuu iʼni‑i xaxeʼe xa kuika‑i,
ni maxku kukanu ini‑i tvini‑i xiʼin xaxii‑i,
chi danaa xee kɨu ndundaʼu‑i.
Ianyuux ndixa na kuitakaa kuitakuu‑i chi mee‑ia kuu Ia tuu nga taxi xa ka ndoñuʼu‑ro xa na kutuu vaʼa‑ro.
18 Taʼu tniu‑n xa na kada koio‑i xavaʼa.
Dɨuni taʼu tniu‑n xa na chindee koio‑i ñayiu ka kundaʼu;
kueʼe xa na juñaʼa‑i‑yɨ.
19 Xandaa xakuiti kutuu kuika‑i andɨu nux duʼa na kada‑i.
Nɨkava nɨkuita kutuu koio‑i nuu tuu Ianyuux.
Ijan kuu nuu kutuu vii kutuu vaʼa koio‑i.
20 Kada naʼi xa n‑taʼu tniu Ianyuux xa kada‑n.
Ñadu xa daa cuentu ña ndandɨʼɨ ka jaʼan dava ñayiu ku jandixa‑n chi ñadu kuenda Ianyuux kuu xijan.
Ka jaʼan‑i xa ka tuʼa vaʼa‑i,
ko diko ni xa ka daka niʼno tnaʼa‑i chi ñadu ɨɨn xa ndaa ka jaʼan‑i.
21 N‑ka dandoo‑i Cristu Jesús.
Ñatu ka kukanu ini‑i‑ia.
Na chindee chituu ñaʼa Ianyuux,
Timoteo.