Nax io xa kada ñá n‑xiʼí yɨɨ, sexaʼnu, ñayiu ka kidatniu duʼa du
5
Maxku kanandee‑n ɨɨn sexaʼnu hora jan doʼo‑n‑sɨ.
Kada‑n kuenda xa taa‑n jan doʼo‑n.
Vivii jaʼan‑n nuu ntaka solteru hora jan doʼo‑n‑sɨ.
Kada‑n kuenda xa ñani‑n ka kuu‑s.
2 Vivii jaʼan‑n nuu ntaka ñaxaʼnu hora jan doʼo‑n‑ña.
Kada‑n kuenda xa dɨʼɨ‑n ka kuu‑ña.
Dani hora jan doʼo‑n ntaka soltera,
vivii jaʼan‑n nuu‑i.
Kada‑n kuenda xa kuʼa‑n ka kuu‑i,
te maxku ku jaʼan loko‑n nuu‑i.
Ku kunxaʼnu‑n nuu‑i.
3 Ñadɨʼɨ n‑ka xiʼí yɨɨ te ñayo na daʼya‑ña io xa kachi‑i xa ndaʼu‑ña,
na juñaʼa ñayiu ka kukanu ini Cristu Jesús xa ka ndoñuʼu‑ña,
4 ko ñadɨʼɨ n‑xiʼí yɨɨ io daʼya a daiñani,
na kachi koio‑i xa ndaʼu‑ña.
Kiʼna ka na kachi‑i xa ndaʼu dɨʼɨ‑i a dɨxaʼnu‑i,
ijan dada na kachi‑i xa ndaʼu ɨnka ñayiu.
Mudu yaʼa nachiyaʼu‑i xa n‑kachi tadɨʼɨ‑i xa ndaʼu‑i na luchi‑i.
Tna ini Ianyuux xaʼa.
5 Dava ñá n‑ka ndoo mee n‑ka ndoo ɨɨn,
n‑ka kukanu ini‑ña xa dakaku ñaʼa Ianyuux,
te ka xijan taʼu‑ña nuu‑ia nduu xakuaa;
6 ko dava ñá ka kuloko ka kuduʼa.
Ñatuka ka kida‑ña xavaʼa,
ka kida‑ña xa kuu ini mee‑ña.
7 Taʼu tniu nuu ñayiu ka kukanu ini Cristu Jesús xa na kada koio‑i xavaʼa yaʼa,
na kuaʼa maxku ku jan tnuʼu ñaʼa dava ka ñayiu.
8 Ñayiu ña kachi xa ndaʼu ntdaa familia‑i,
ñatuka jandixa‑i xa n‑taʼu tniu Ianyuux chi xe ini‑i.
Xe ini ka‑i dada ñayiu ñatu kukanu ini Cristu Jesús.
9 Na nkodotnuni dɨu ñá ka xiʼí yɨɨ nuu yodotnuni dɨu ñadɨʼɨ xa daa nga n‑ka xiʼí yɨɨ nux io‑ña uni diko kuia,
nux ñatu n‑dandaʼu‑ña yɨɨ‑ña,
10 nux najuen tnuʼu ñaʼa ñayiu xaxeʼe xa n‑kida‑ña xavaʼa,
nux n‑xo ndeka vaʼa‑ña daʼya‑ña,
nux xitondee‑ña ñayiu xeʼen veʼe‑ña,
nux najini‑ña xeʼe ñayiu ka kukanu ini Cristu Jesús,
nux n‑chindee‑ña ñayiu ndaʼu ka yaʼa te nux n‑kida‑ña xavaʼa du.
11 Maxku chidotnuni‑n ñadɨʼɨ ka xiʼí yɨɨ ka kuu kuechi nuu xyodotnuni dɨu ñá xá xndaxio uni diko kuia jan chi vaa ni nanduku‑ña yɨɨ‑ña te natnundaʼa‑ña.
Te kunuu ka xijan dada tniu Cristu Jesús,
12 te dakuido datau‑ña anu‑ña chi ma daxinokava‑ña tniu n‑jaʼan‑ña xa kada‑ña.
13 Daxa ka xini kudi‑ña,
te ñadu diko ni ka xini kudi‑ña,
chi dɨuni ka xikonuu‑ña veʼe xiʼin veʼe xa ka kine tnuʼu‑ña ñayiu.
Dɨuni ka najani‑ña cuentu ka teku‑ña.
Cuentu loko cuentu duʼa ni ka jaʼan‑ña.
14 Xijan kuu xa vaʼa ka xa na natnundaʼa ñadɨʼɨ n‑ka xiʼí yɨɨ ka kuu kuechi.
Na kundeka‑ña daʼya‑ña,
te na junuu‑ña nukee nuveʼe‑ña.
Duʼa na kada‑ña na kuaʼa maxku jan tnuʼu ñaʼa ñayiu ña ka kukanu ini Cristu Jesús.
15 Dava‑ña,
xa n‑ka dandoo‑ña ichi Ianyuux te n‑tnɨɨ‑ña ichi loko.
16 Io xa kachi ñá ka kukanu ini Cristu Jesús xa ndaʼu ɨɨn ñá n‑xiʼí yɨɨ tuu nukee nuveʼe‑ña.
Ñadu xa daa dava ka ñayiu ka kukanu ini Cristu Jesús kundeka ñaʼa.
Na kundeka dava ka ñayiu ka kukanu ini Cristu Jesús ñá n‑ka xiʼí yɨɨ tuu mee tuu ɨɨn.
17 Na jenyaʼu se ka taxnuni nuu ñayiu ka kukanu ini Cristu Jesús.
Nux xyɨndaʼa vaʼa‑s ñayiu ka kukanu ini‑ia xiʼin nux kueʼe hora jaʼan‑s tnuʼu Ianyuux nuu ñayiu,
nux kueʼe hora dakuaʼa‑s ñayiu du,
na jenyaʼu‑s uu vuelta chi daa io xa jenyaʼu‑s.
18 Na koo yaʼu‑s chi jaʼan tnuʼu Ianyuux yodotnuni:
“Maxku chiʼi‑n ñunu yuʼu ngutu hora xadi‑n xiʼin‑tɨ trɨu.”
Dɨuni yodotnuni:
“Io vaʼa xa jenyaʼu se kida tniu.”
19 Maxku kadandaa‑n kuechi ɨɨn se taxnuni nuu ñayiu kukanu ini Cristu Jesús nux ñatu io uu a uni testiu.
20 Te se xandaa xakuiti n‑kida ɨɨn kuechi,
jandoʼo‑n‑sɨ nuu xyuku ñayiu ka kukanu ini Cristu Jesús na kuaʼa na yuʼu koio‑i.
21 Kada ntdaa xa n‑kachitnuʼu ñaʼa‑r.
Nini Ianyuux,
xiʼin Cristu Jesús xiʼin ángel n‑kaxí‑ia xa jaʼan‑r nuu‑n.
Xiʼin xandaa kada.
Maxku njuiñi‑n xeʼe se n‑kida ɨɨn kuechi,
ni maxku kanandee‑n ñayiu ña tuu nax n‑kida.
22 Kuekuee nanduku‑n se jantuu tniu‑n na ñaʼa kajan ndodo‑n ndaʼa‑n dɨkɨ ɨɨn se kada kuechi hora netniu‑s,
te ku jaʼan ñayiu xa dɨu‑n n‑kida xa n‑kida‑s kuechi.
Jun ini xa mee ni xavaʼa kada‑n.
23 Maxku koʼo‑n mee ni ndute,
koʼo xaku vinu xa na kutatna xiti‑n chi xko kuʼu‑n.
24 Dava ñayiu n‑ka kida kuechi,
xá ka xini ñayiu ñuu‑i xa n‑ka kida‑i,
ijan dada kundaa kuechi‑i,
ko dava ka‑i kiʼna ka kundaa kuechi‑i,
ijan dada xini ñayiu ñuu nax kuu xa n‑ka kida‑i.
25 Ñayiu ka kida xavaʼa,
ka xini‑ro nax kuu xa ka kida‑i.
Dɨuni ka xini‑ro xa n‑ka kida ɨnka ñayiu ɨɨn kuechi,
juini naʼi n‑ka kida‑i.