Janda io xa junukuechi Timoteo nuu Jesucristo
4
Kaxi n‑jaʼan Espíritu Ianyuux xa na kuyatni xa naa ñuñayiu ma kukanu ini ka dava ñayiu Cristu Jesús.
Jandixa koio dava ñayiu jan xa jaʼan ñayiu ñuʼu ñaʼa xaloko,
te nkuitandijun‑i‑yɨ.
Dandaʼu‑i‑yɨ.
2 Jaʼan ñayiu ijan xa jaʼan ndaa‑i,
ko kuu‑i ñayiu ka kidavaʼa tnuʼu vete,
te ña tuu nax kuu ini‑i.
Yo n‑ka xixa nuu‑i.
3 Dadaʼan ñayiu yaʼa xa tnundaʼa ñayiu,
te ma juejoon‑i xa kaxi ñayiu ijan ntdaa xa n‑kidavaʼa Ianyuux xa kaxi koʼo‑ro.
Vatuka kaxi roo,
ñayiu kukanu ini Cristu Jesús davaʼa nga xa io xa kaxi xa koʼo‑ro chi xnaʼa‑ro xa n‑jaʼan Ianyuux xa io vaʼa xa kaxi koʼo‑ro ntdaa xa n‑xani ini‑ia nux na juñaʼa‑ro nuu‑ia:
“Na kutaʼu‑da,
Taa‑ro.”
4 Na kaxi koʼo‑ro ntdaa xa n‑xani ini Ianyuux xa kaxi‑ro,
te maxku ku jaʼan‑ro xa maxku kaxi koio‑ro,
ko dɨuni na juñaʼa‑ro nuu‑ia:
“Na kutaʼu‑da,
Taa‑ro.”
5 Xaxeʼe xa xijan taʼu‑ro nuu‑ia xa na nduu ii xa kaxi xa koʼo‑ro,
xiʼin xaxeʼe xa n‑jaʼan‑ia xa nduu ii,
xijan kuu xa nduu ii.
6 Nux na jaʼan‑n nuu ñayiu ka kukanu ini Cristu Jesús tnuʼu yaʼa,
kuu‑n se xinokuechi vaʼa nuu‑ia,
te vaʼa ka kutnuni ini‑n xa n‑dakuaʼa‑n.
Xá jandixa‑n xijan vaxi.
7 Maxku chinuu‑n cuentu n‑ka xo xani ini mee xixitna ñayiu dian xa ka najani ñaxaʼnu vitna chi ñadu ɨɨn xandaa kuu xijan.
Ñadu ɨɨn xa xiniñuʼu kuu.
Kada xa juini Ianyuux,
te ñadu xa daa cuentu ijan ku jandixa‑n.
8 Xa ka dadɨkɨ‑ro te ka xikonuu‑ro xa ka dakaa‑ro tuchi,
ɨɨn xavaʼa kuu,
ko ñatu yo kunuu xijan.
Xa yo ndandɨʼɨ kuu xa kida‑ro xa juini Ianyuux chi xaxeʼe xa kida‑ro xa juini‑ia,
vaʼa tuu‑ro ñuñayiu,
te dani vaʼa kutuu‑ro andɨu xaxeʼe xijan.
9-10 Ndetu‑ro xa ndixi Ianyuux ndixa,
Ia dakaku ñayiu ñuñayiu,
Ia dananitaʼu ñaʼa roo,
ñayiu ka kukanu ini‑ia.
Xa na nanitaʼu ñayiu yo ndeʼe ka kidatniu‑ro,
te ndaʼu ka yaʼa‑ro.
Io xa jandixa ntdaa ñayiu xa kakuneʼe‑r ya chi ɨɨn xandaa kuu.
11 Juña tnuʼu ñayiu ntdaa xa jaʼan‑r ya,
te juñaʼa‑n nuu‑i xa na jandixa koio‑i.
12 Nux ñatu tna ini dava ñayiu ka kukanu ini Cristu Jesús xa dakuaʼa‑n‑yɨ xaxeʼe xa luchi‑n,
jandoʼo‑n‑yɨ.
Ku jaʼan nxaʼnu‑n,
te ku kuñukax ini‑n nuu‑i ntdaa‑i.
Dɨuni juemani‑n‑yɨ.
Kukanu ini naʼi Cristu Jesús,
te maxku jɨn tnɨɨ ini‑n.
Maxku kada‑n kuechi.
Kada ntdaa xaʼa na kuaʼa na kundeʼa ñayiu ka kukanu ini‑ia,
te daa na kada koio‑i tuku.
13 Kaʼu ndodo‑n tnuʼu Ianyuux xyodotnuni nuu ñayiu,
jan doʼo‑n‑yɨ,
te dakuaʼa‑n‑yɨ chi kukuee‑r itaʼu xa xee‑r.
14 Na n‑ka xajan ndodo sexaʼnu ka taxnuni nuu ñayiu ka kukanu ini Jesucristu ndaʼa‑s dɨkɨ‑n,
n‑ka jaʼan‑s nuu‑n xa n‑jaʼan Ianyuux nuu‑s xa kada‑n tniu‑ia.
N‑kida Ianyuux xa n‑kuaʼa‑n kida‑n tniu‑ia.
Maxku ndunaa‑n xijan.