Kajan taʼu koio‑n nuu Ianyuux xaxeʼe‑da
3
Ñani‑da kuʼa‑da,
kajan taʼu koio‑n nuu Ianyuux xaxeʼe mee‑da.
Kajan taʼu‑n xa yachi kuaʼa xa juñaʼa koio‑da tnuʼu Xtoʼo‑ro Jesucristu nuu ñayiu ñuu xiʼin ñuu.
Kajan taʼu koio‑n xa kueka vaʼa koio ñayiu jan tnuʼu Jesucristu,
ná n‑ka xeka vaʼa mee‑n tnuʼu‑ia.
2 Kajan taʼu koio‑n xaxeʼe‑da,
xa kaku koio‑da nuu se ka kida kuechi,
se ka kida xa uʼu.
Chi ñatu ntdaa ñayiu ka juini xa jandixa‑i Jesucristu.
3 Ko kuaʼa‑ro xa koo‑ro confianza nuu Ianyuux.
Kada‑ia xa kundee ini koio mee‑n,
xa jandixa naʼi ka‑n Xtoʼo‑ro Jesucristu.
Kunevaʼa ñaʼa‑ia mee‑n,
xa ma dandaʼu ñaʼa kuiʼna.
4 Xndaxio‑da confianza nuu Ianyuux,
xa ka kida‑n vitna te kada koio naʼi ka‑n,
ntdaa xa taʼu tniu ñaʼa‑da.
5 Na kada Ianyuux xa kutnuni ini koio‑n xa xemani ñaʼa‑ia mee‑n,
te kada‑ia xa kundee ini koio mee‑n ná n‑kundee ini Xtoʼo‑ro Jesucristu.
Ɨɨn ñayiu, nux ña juini‑i xa kadatniu‑i, te maxku kaxi‑i
6 Ñani‑da kuʼa‑da,
n‑taʼu tniu ñaʼa Xtoʼo‑ro Jesucristu mee‑da,
xa taʼu tniu ñaʼa‑da mee‑n,
xa maxku kunduu koio‑n xiʼin ñani‑ro kuʼa‑ro ña ka juini xa kadatniu‑i.
Na n‑xo tuu‑da xiʼin‑n,
n‑ka dakuaʼa ñaʼa‑da xa io xa kadatniu koio‑n,
ɨɨn ɨɨn‑n,
xa niʼi‑n xa ndoñuʼu‑n.
Ko duʼa ña ka kida dava ñani‑ro kuʼa‑ro xtuu xiʼin‑n.
7 Ka xini mee‑n xa io xa kada koio‑n,
ná n‑ka kida mee‑da.
Ña n‑ka kukudi mee‑da,
na n‑xo tuu‑da xiʼin‑n.
8 Na n‑ka taxi‑n xa kaa‑da,
te n‑ka xo chiyaʼu‑da.
Nduu,
xakuaa n‑ka xo kidatniu‑da.
N‑ka kidatniu‑da,
nde n‑ka xo xiau‑da,
chi ña n‑ka juini‑da xa kundeka ñaʼa‑n.
9 Se n‑tundaʼa Jesucristu ka kuu‑da,
te vatuka xa kajan koio‑da xa tax koio‑n xa ndoñuʼu‑da.
Ko duʼa ña n‑ka kida‑da,
chi n‑ka juini‑da xa ku kuu mee‑da ɨɨn ichi tnɨɨ koio mee‑n,
xa kada koio mee‑n ná n‑ka kida mee‑da.
10 Na n‑xo tuu‑da xiʼin‑n,
n‑ka taʼu tniu ñaʼa‑da xaʼa:
Ɨɨn ñayiu,
nux ña juini‑i xa kadatniu‑i,
te maxku kaxi‑i.
11 Xá n‑ka tekutnuʼu‑da xa dava mee‑n ña ka juini‑n xa kadatniu‑n.
Ñayiu kudi ka kuu‑n,
ñayiu ndu ini xa kuu ñayiu jan ka kuu‑n.
Te xa ka kuu mee‑n ña ndu ini‑n.
12 Taʼu tniu ñaʼa Xtoʼo‑ro Jesucristu mee‑da,
xa taʼu tniu koio‑da nuu ñayiu jan,
xa na kadatniu‑i nu xaxi‑i,
te maxku kunduu ini‑i xa kuu ñayiu.
13 Ñani‑da kuʼa‑da,
kada naʼi koio ka‑n xavaʼa,
te maxku kuita anu‑n.
14 Nux ña juini ɨɨn ñayiu xa jandixa‑i tnuʼu kidavaʼa‑da,
chinuu koio mee‑n jundu kuu ñayiu jan,
te maxku kunduu koio ka‑n xiʼin‑i,
xa na kujanuu‑i.
15 Ko maxku jini uʼu koio‑n ñayiu jan.
Jan doʼo ni‑n‑yɨ,
ná jan doʼo‑n ñani‑n kuʼa‑n,
chi duʼa kuu‑i.
Na taxi Xtoʼo‑ro Jesucristu xamani‑ia nuu‑n
16 Ia kida xa xtuu mani ñayiu kuu Xtoʼo‑ro Jesús.
Kɨu xiʼin kɨu,
na kada‑ia xa kutuu mani mee‑n xiʼin Ianyuux xiʼin ñayiu.
Davaʼa nga xa io xa ka yaʼa‑n,
ko na kada Ianyuux xa kutuu vaʼa‑n.
Na kunduu mee‑ia xiʼin‑n,
ntdaa‑n.