Kixee Se kada xa uʼu, Se ma jandixa ni ɨɨn
2
Ñani‑da kuʼa‑da,
vitna juini‑da xa kakuneʼe‑da kɨu na ndixi Xtoʼo‑ro Jesucristu,
kɨu nataka‑ro xiʼin‑ia.
2 Xijan‑da xa maxku kɨ ini koio‑n,
maxku yuʼu koio‑n,
xa kani ini‑n xa xá n‑ndixi‑ia.
Nux jaʼan ɨɨn ñayiu xa kachitnuʼu‑i tnuʼu Ianyuux xa xá n‑ndixi‑ia,
maxku jandixa koio‑n tnuʼu jan.
Nux tekutnuʼu koio‑n xa xá n‑ndixi‑ia,
maxku jandixa koio‑n tnuʼu n‑teku‑n.
Nux jaʼan koio ñayiu xa n‑ka kidavaʼa mee‑da ɨɨn carta jaʼan xa xá n‑ndixi‑ia,
maxku jandixa koio‑n xa jaʼan‑i.
3 Maxku juejoon koio‑n xa dandaʼu ñaʼa ni ɨɨn ñayiu ni ɨɨn tnuʼu jan.
Ditna ka,
kuu xa kuxee ini koio ñayiu ñuñayiu nuu Ianyuux,
te dada xee kɨu ijan,
kɨu na ndixi Xtoʼo‑ro Jesucristu.
Antecas xa xee kɨu ijan,
te kixee Se kida kuechi,
Se ma jandixa ni ɨɨn.
Se andea kuu‑s,
Se nuncas ma kutuu xiʼin Ianyuux kuu‑s.
4 Jantnaʼa‑s xiʼin ntdaa xa danani ñayiu ianyuux.
Jaʼan‑s xa kunxaʼnu ka mee‑s dada davaʼa nga ɨnka xa ndadakaʼnu ñayiu.
Nde xiti veñuʼu Ianyuux,
kunukoo mee‑s,
ná nukoo mee Ianyuux.
Jaʼan‑s xa mee‑s kuu Ianyuux.
5 ¿Ña ka najaʼan‑n xa n‑xo jaʼan‑da xaʼa,
na n‑xo tuu‑da xiʼin‑n a?
6 Te ka xini‑n nax kuu xa kida xa yɨtnɨɨ se ijan,
xa ta kixee ka‑s vitna.
Na xee hora juini Ianyuux,
te kixee se ijan.
7 Io ɨɨn xa kida kuechi vitna,
ko ná kuu ɨɨn xa naʼi kuu.
Te io ɨɨn se kida xa yɨtnɨɨ xa kida kuechi vitna.
Te kada naʼi ka‑s xa kɨtnɨɨ xaʼa,
nde kada Ianyuux xa duʼa ma kada ka‑s.
8 Te dada kixee Se kida kuechi,
Se ma jandixa ni ɨɨn.
Te taxnuni Xtoʼo‑ro Jesús nuu se ijan.
Xiʼin tachi yuʼu‑ia kaʼni‑ia‑s,
xa maxku kada ka‑s ni ɨɨn.
Ná kuu ɨɨn xa diñu xa diñu ku kuu Xtoʼo‑ro Jesús,
na ndixi‑ia kɨu ijan.
9 Kada kuiʼna xa kixee Se kida kuechi,
Se ma jandixa ni ɨɨn.
Taxnuni‑s nuu ñayiu.
Kada‑s milagru.
Ko xa vete kuu ntdaa xa kada‑s.
10 Juetniu‑s ntdaa xa uʼu xa dandaʼu‑s ñayiu ña ka jandixa Jesucristu,
ñayiu jɨʼɨn andea.
Jɨʼɨn koio‑i andea,
xaxeʼe xa ña n‑ka juini‑i xa juemani‑i xa kuu xandaa,
ña n‑ka juini‑i xa dakaku ñaʼa Ianyuux mee‑i,
xa kutuu vaʼa‑i xiʼin mee‑ia.
11 Xijan kuu xa xejoon Ianyuux xa dandaʼu Se kida kuechi ñayiu jan,
xa jandixa koio‑i xa kuu tnuʼu vete.
12 Duʼa ndadandaa Ianyuux ntdaa ñayiu ña n‑ka jandixa xa kuu xandaa,
ñayiu n‑ka tna ini xa kuu xa uʼu.
N‑kaxí ñaʼa Ianyuux mee‑n xa dakaku ñaʼa‑ia
13 Ñani‑da kuʼa‑da,
kɨu xiʼin kɨu,
io xa juñaʼa koio‑da xa n‑kutaʼu‑da nuu Ianyuux xaxeʼe‑n.
Xemani ñaʼa Xtoʼo‑ro Jesús mee‑n.
Nde kiʼna nuu,
n‑kaxí ñaʼa Ianyuux mee‑n,
xa dakaku ñaʼa‑ia,
xa ma kuú koio‑n xiʼin kuechi‑n.
N‑kida‑ia xa kadatniu Espíritu Ii anu‑n,
xa dakuaʼa ñaʼa‑ia,
xa kada koio‑n xa juini Ianyuux,
te n‑kida Ianyuux xa jandixa koio‑n xa kuu xandaa.
14 Na n‑ka kachitnuʼu‑da tnuʼu vaʼa Jesucristu nuu‑n,
te n‑jaʼan ñaʼa Ianyuux mee‑n.
N‑jaʼan ñaʼa‑ia xa taxnuni koio mee‑n xiʼin Xtoʼo‑ro Jesucristu.
15 Ñani‑da kuʼa‑da,
xijan kuu xa kundee ini koio‑n,
xa jandixa koio ka‑n Jesucristu.
Kada koio‑n ntdaa xa n‑ka dakuaʼa ñaʼa‑da,
tnuʼu n‑ka jaʼan‑da xiʼin carta n‑ka kidavaʼa‑da.
16-17 Xemani ñaʼa Taa‑ro Ianyuux mee‑ro.
Xá n‑taxi‑ia tnuʼu kanu ini,
xa kutuu vaʼa‑ro xiʼin mee‑ia kuia ma jɨn ndɨʼɨ.
Xá n‑taxi‑ia xamani‑ia,
xa kundetu‑ro nde ndixi Jesucristu.
Na kada Taa‑ro Ianyuux xiʼin Xtoʼo‑ro Jesucristu,
xa kundee ini koio‑n.
Na chindee ñaʼa‑ia,
xa kada koio‑n xavaʼa.
Na chindee ñaʼa‑ia,
xa jaʼan koio‑n tnuʼu vaʼa.