5
Ñani‑da kuʼa‑da,
ña ndoñuʼu‑n xa jaʼan koio‑da nada kuia yaʼa‑ro,
antecas xa ndixi Xtoʼo‑ro Jesús.
Ña ndoñuʼu‑n xa jaʼan‑da nax koo,
antecas xa ndixi‑ia.
Duʼa ma kadavaʼa‑da nuu‑n.
2 Vaʼa xnaʼa mee‑n xa danaa xee kɨu ndadandaa Xtoʼo‑ro Jesús ntdaa xa io.
Xnaʼa‑n xa xee kɨu ijan,
ná xee ɨɨn ñaduʼu xakuaa.
3 Hora ka jaʼan ñayiu:
“Xtuu vaʼa‑ro,
ña tuu nax kuu”,
te danaa,
hora ijan ni,
danaa Ianyuux ñayiu jan.
Ná kuu xa danaa ni kixeʼe xa xaxiaʼan hora kaku daʼya ɨɨn ñadɨʼɨ,
da kixeʼe Ianyuux xa danaa‑ia ñayiu jan.
Te mayo‑i kaku.
4 Ko mee‑n,
ñani‑da kuʼa‑da,
ñatu ka xika‑n nuu nee,
xa naʼi xee kɨu ijan,
ná naʼi kɨu ɨɨn ñaduʼu ɨɨn veʼe.
5 Ka kuu mee‑n,
ntdaa‑n,
ñayiu ka jandixa Xtoʼo‑ro Jesús.
Ka xika‑n nuu kanda vaʼa.
Ñatu kuu‑ro ñayiu xakuaa,
ña ka xika‑ro nuu nee.
6 Ná kuu ñayiu ka kidi kuu ñayiu jan.
Xijan kuu xa maxku kidi mee‑ro,
ná ka kidi mee‑i.
Na kundeʼa‑ro xa ndixi‑ia.
7 Ñayiu kidi,
kidi‑i xakuaa,
ñayiu xini,
xini‑i xakuaa.
8 Ñayiu ka xika nduu kuu‑ro.
Io xa koo tuʼa‑ro.
Ná kuu soldado kuu‑ro,
te io xa dadaʼu ñaʼa.
Ná kuu xa dadaʼu soldado pechu‑s,
kuu xa jandixa‑ro Ianyuux te xemani‑ro ñayiu.
Ná kuu xa dadaʼu soldado dɨkɨ‑s,
kuu xa xndetu‑ro xa dakaku ñaʼa Xtoʼo‑ro Jesucristu,
xa kutuu vaʼa‑ro xiʼin‑ia.
9 Chi ña n‑nduku ñaʼa Ianyuux mee‑ro,
xa kada uʼu ñaʼa‑ia.
N‑nduku ñaʼa‑ia,
xa niʼi‑ro xa kutuu vaʼa‑ro xiʼin mee‑ia,
xaxeʼe Xtoʼo‑ro Jesucristu.
10 N‑xiʼí Jesucristu xaxeʼe‑ro,
te juini ndito‑ro o n‑xiʼí‑ro,
ko dani kutuu‑ro xiʼin‑ia.
11 Xijan kuu xa,
juñaʼa tnaʼa‑n tnuʼu kanu ini,
te chindee tnaʼa‑n xa kundee ini koio‑n.
Nani ka kida‑n vitna,
dani kada koio ka‑n.
Ñani‑da kuʼa‑da, io xa duʼa kada koio ka‑n
12 Ñani‑da kuʼa‑da,
ka xijan‑da xa koo koio‑n xañuʼu nuu se ka kidatniu xiʼin‑n.
N‑kaxí Xtoʼo‑ro Jesús mee‑sɨ,
xa taxnuni koio‑s nuu‑n,
te dakuaʼa ñaʼa‑s.
13 Koo koio‑n xañuʼu nuu‑s,
te yo vaʼa juemani koio‑n‑sɨ,
xaxeʼe tniu ka kida‑sɨ.
Te kutuu mani‑n,
ntdaa‑n,
ɨɨn‑n xiʼin ɨka‑n.
14 Ñani‑da kuʼa‑da,
ka xijan‑da nuu‑n,
xa duʼa kada koio‑n.
Kudeen koio‑n nuu ñayiu ña ka juini xa kadatniu‑i.
Juñaʼa koio‑n tnuʼu kanu ini nuu ñayiu ka yuʼu.
Chindee koio‑n ñayiu ña ndaku.
Kundetu kuee koio‑n nuu ntdaa ñayiu.
15 Kundeʼa tnaʼa‑n,
xa ni ɨɨn‑n maxku kada xa uʼu nuu ñayiu ka kida xa uʼu nuu mee‑n.
Kada koio‑n xavaʼa,
nani nuu ntnaʼa mee‑n,
dani nuu ntdaa ñayiu.
16 Ntdaa kɨu kuvete koio‑n.
17 Kɨu xiʼin kɨu,
kajan taʼu koio‑n nuu Ianyuux.
18 Hora kuvete‑n,
hora tnau ini‑n,
davaʼa nga xa yaʼa‑n,
ko juñaʼa koio‑n xa n‑kutaʼu‑n nuu Ianyuux.
Duʼa kunduu naʼi ka‑n xiʼin Cristu Jesús,
te duʼa kada‑n xa juini Ianyuux xaxeʼe‑n.
19 Ná kuu ɨɨn ñuʼu koko kidatniu anu‑n,
da kuu Espíritu Ianyuux.
Juejoon koio‑n,
ɨɨn ɨɨn‑n,
xa kadatniu ka‑ia.
20 Nux kachitnuʼu ɨɨn ñayiu tnuʼu Ianyuux nuu‑n,
te io xa chinuu koio‑n tnuʼu jan.
21 Kototnuni koio‑n ntdaa xa teku‑n,
te kueka vaʼa koio‑n xa kuu xavaʼa.
22 Dandoo koio‑n ntdaa xa kuu xa uʼu.
23 Kida Ianyuux xa kutuu vaʼa‑ro.
Xá n‑jaʼan ñaʼa‑ia mee‑ro xa ku kuu‑ro ñayiu mee‑ia,
xá n‑kida dɨɨn ñaʼa‑ia.
Na kada‑ia xa kada koio mee‑n ntdaa xa juini mee‑ia.
Na kunevaʼa ñaʼa‑ia mee‑n,
anu‑n xiʼin xaxtnuni‑n xiʼin yɨkɨ kuñu‑n,
xa ma kuaʼa xa tekuechi ñaʼa ni ɨɨn,
hora ndixi Xtoʼo‑ro Jesucristu.
24 Jaʼan ñaʼa Ianyuux mee‑n xa kutuu vaʼa koio‑n xiʼin‑ia,
te duʼa koo.
Kuaʼa‑ro xa koo koio‑ro confianza nuu‑ia,
xa duʼa kada‑ia.
Xanyuux nuu‑n
25 Ñani‑da kuʼa‑da,
kajan taʼu koio‑n nuu Ianyuux xaxeʼe mee‑da.
26 Juñaʼa koio‑n xa ndajan tnuʼu‑da ntdaa ñani‑ro kuʼa‑ro xtuu ijan.
27 Xaxeʼe xa taʼu tniu ñaʼa Xtoʼo‑ro Jesucristu mee‑da,
ka taʼu tniu ñaʼa mee‑da mee‑n,
xa kaʼu koio‑n carta yaʼa nuu ntdaa ñani‑ro kuʼa‑ro xtuu ijan.
28 Na taxi Xtoʼo‑ro Jesucristu xamani‑ia nuu‑n.
Duʼa na koo.