Xa tna ini Ianyuux
4
Ñani‑da kuʼa‑da,
vitna,
xaxeʼe xa ka kunduu mee‑da xiʼin Xtoʼo‑ro Jesús,
ka xijan‑da nuu mee‑n xa kada koio‑n xa juini Ianyuux.
Xá n‑ka dakuaʼa ñaʼa‑da nax kada koio‑n xa kada‑n xa tna ini Ianyuux,
te duʼa ka kida‑n.
Ka xijan‑da nuu‑n xa duʼa kada koio ka‑n.
2 Vaʼa ka xini‑n tnuʼu taʼu tniu n‑ka taxi‑da.
Te ka xini‑n xa n‑taʼu tniu Xtoʼo‑ro Jesús mee‑da,
xa duʼa dakuaʼa ñaʼa koio‑da mee‑n.
3 N‑kida dɨɨn ñaʼa Ianyuux mee‑ro,
xa ku kuu‑ro ñayiu mee‑ia.
Juini‑ia xa kada koio‑n xa juini mee‑ia,
juini‑ia xa maxku kada koio ka‑n xa uʼu.
Juini‑ia xa maxku kidi‑n xiʼin ñayiu ñatu n‑tnundaʼa xiʼin‑n.
4 Ñani‑da,
juini‑ia xa tnundaʼa‑n xiʼin ñadɨʼɨ n‑taxi‑ia,
te koo‑n xañuʼu nuu‑ña,
te juemani‑n‑ña.
Kuʼa‑da,
juini‑ia xa tnundaʼa‑n xiʼinseyɨɨ n‑taxi‑ia,
te koo‑n xañuʼu nuu‑s,
te juemani‑n‑sɨ.
5 Seyɨɨ,
juini‑ia xa maxku juejoon‑n nuu yɨkɨ kuñu‑n xa kukajan ini‑n kueʼe ñadɨʼɨ,
ná ka kida ñayiu ña ka xini Ianyuux.
Ñadɨʼɨ,
juini‑ia xa maxku juejoon‑n nuu yɨkɨ kuñu‑n xa kukajan ini‑n kueʼe seyɨɨ,
ná ka kida ñayiu ña kaxini Ianyuux.
6 Ñani‑da,
maxku dandaʼu‑n ɨnka seyɨɨ,
xa kidi‑n xiʼin ñadɨʼɨ‑s.
Kuʼa‑da,
maxku dandaʼu‑n ɨnka ñadɨʼɨ,
xa kidi‑n xiʼin yɨɨ‑ña.
Na n‑xo tuu‑da xiʼin‑n,
n‑ka jaʼan‑da xa kada uʼu ñaʼa Ianyuux mee‑n,
nux duʼa ka kida‑n.
7 Ña n‑jaʼan ñaʼa‑ia xa ku kuu‑ro ñayiu ka kida xa juini mee‑ro,
n‑jaʼan ñaʼa‑ia xa ku kuu‑ro ñayiu ka kida xa juini mee‑ia.
8 Xijan kuu xa,
ɨɨn ñayiu,
nux ña xe ini‑i xa n‑ka dakuaʼa‑da,
duʼa kuu xa ña xe ini‑i xa n‑jaʼan Ianyuux.
Ña kuu xa ñatu jandixa‑i ɨɨn ñayiu,
kuu xa ñatu jandixa‑i Ianyuux n‑taxi Espíritu Ii.
9 Ña ndoñuʼu xa kadavaʼa‑da nuu‑n xa io xa juemani tnaʼa‑n,
chi xa n‑dakuaʼa ñaʼa Ianyuux xa juemani tnaʼa‑n,
ɨɨn‑n nuu ɨnka‑n.
10 Ndaa xa ka xemani‑n ntdaa ñani‑ro kuʼa‑ro nituʼu distrito Macedonia.
Ko ñani‑da kuʼa‑da,
ka xijan‑da xa juemani‑n xa juemani ka‑n‑yɨ.
11 Ka xijan‑da xa kutuu mani koio‑n xiʼin ntdaa ñayiu.
Kada‑n,
ɨɨn ɨɨn‑n,
tniu mee‑n.
Xiʼin ndaʼa‑n kadatniu koio‑n.
Duʼa xá n‑ka taʼu tniu‑da,
na n‑ka xo tuu‑da xiʼin‑n.
12 Nux duʼa kada‑n,
ɨɨn ɨɨn‑n,
nde ñayiu ña ka jandixa Xtoʼo‑ro Jesús koo koio xañuʼu nuu‑n.
Te ma ndoñuʼu xa kundeka ñaʼa ni ɨɨn ñayiu.
Ndixi Xtoʼo‑ro Jesucristu
13 Ñani‑da kuʼa‑da,
ka juini‑da xa kutnuni ini koio‑n nanda kutuu ñani‑ro kuʼa‑ro n‑ka xiʼí.
Ña ndoñuʼu xa tnau ini koio mee‑n,
ná tnau ini ɨnka ñayiu.
Chi mee‑i,
ña tuu na confianza io‑i nuu Ianyuux.
14 Ko mee‑ro,
jandixa‑ro xa n‑xiʼí Jesús te n‑nandoto‑ia.
Dɨuni jandixa‑ro xa nadandoto Ianyuux ntdaa ñayiu n‑ka jandixa Jesús antecas xa kuú‑i,
te ndixi uun ka‑i xiʼin Jesús hora na ndixi‑ia.
15 Tnuʼu Xtoʼo‑ro Jesús ka jaʼan‑da nuu‑n.
Juini dani xndito‑ro te xtuu naʼi‑ro ñuñayiu hora na ndixi Jesús,
ko ma juiin ndodo nuu mee‑ro nuu ñani‑ro kuʼa‑ro xá n‑ka xiʼí.
16 Hora ijan kundeʼa‑ro Xtoʼo‑ro Jesús vax nuu‑ia nde andɨu.
Kana xee‑ia tnuʼu taʼu tniu‑ia.
Te kana ángel kunxaʼnu ka,
ia xinokuechi nuu Ianyuux.
Te ndaʼi trompeta Ianyuux.
Te kiʼna nuu nandoto koio ñani‑ro kuʼa‑ro n‑ka jandixa Jesús antecas xa kuú‑i.
17 Te dada mee‑ro,
ñayiu xtuu naʼi ka ñuñayiu.
Tnɨɨ ñaʼa Ianyuux,
te kandeka ñaʼa‑ia ntdaa‑ro jɨʼɨn nuu vikó,
xa nanitnaʼa‑ro xiʼin Xtoʼo‑ro Jesús nuu dujun ka.
Te duʼa kutuu vaʼa‑ro,
ntdaa‑ro,
xiʼin Xtoʼo‑ro Jesús kuia ma jɨn ndɨʼɨ.
18 Xijan kuu xa,
xiʼin tnuʼu yaʼa,
juñaʼa tnaʼa‑n tnuʼu kanu ini,
ɨɨn‑n nuu ɨnka‑n.