4
Ndixi,
se xndaxio ñayiu ka kidatniu nuu‑n,
vaʼa chiyaʼu koio‑n‑yɨ,
te maxku juenduʼa‑n‑yɨ.
Xa xnaʼa‑n xa ɨɨn ni Ia kuu xtoʼo ñayiu,
ka xinokuechi nuu xtoʼo‑i io xiʼin ñayiu ñayo na xtoʼo io.
Andɨu kuu nuu tuu‑ia.
2 Io xa kajan taʼu koio‑n nuu Ianyuux ndɨkɨu ndɨñuu.
Kunini vaʼa‑n nax ka jaʼan dava ka ñayiu ka xijan taʼu xiʼin‑n nuu‑ia.
Ɨɨn ni xa jun ini koio‑n.
Jun ini koio‑n xa juñaʼa‑n xa n‑kutaʼu‑n nuu‑ia.
3 Dɨuni kajan taʼu koio‑n xa na kada Ianyuux xa na juejoon ñayiu xa jaʼan koio‑da nuu‑i nax n‑kida Cristu xa na kuaʼa nanitaʼu‑i.
Xaxeʼe xaʼa yɨndiʼu‑da.
Xa daa nga n‑xo naʼa Ianyuux nax kada Cristu.
Mee ni‑ia n‑xo naʼa,
ko n‑datuu‑ia vitna.
4 Kajan taʼu koio‑n nuu Ianyuux xa na ku jaʼan‑da nuu ñayiu xa n‑jaʼan Cristu xiʼin xa n‑kida‑ia.
Ná n‑kuu ná n‑xino io xa ku jaʼan‑da nuu ñayiu ka nataka.
5 Koo‑n cuedado na ñaʼa kada koio‑n xa kada ñayiu ña ka kukanu ini Cristu ɨɨn xaloko xaduʼa.
Kundu ini koio‑n dakuaʼa‑n‑yɨ.
6 Jaʼan vii jaʼan vaʼa koio‑n nuu ñayiu jan xa na tna ini‑i tnuʼu jaʼan‑n.
Kani ini‑n na tnuʼu na ngoneʼe‑n nuu ñayiu kajan tnuʼu ñaʼa ɨɨn xa kajan tnuʼu ñaʼa‑i.
Ka ndajan tnuʼu se xtuu xiʼin Spalu ñayiu ka kukanu ini Jesucristu xndaxio Colosas
7 Tíquico,
se kukanu ini xiʼin‑ro Cristu kuu se kachitnuʼu ñaʼa nuu janda tuu‑da,
te nax kida‑da do yaʼa kɨu na xee‑s do dian.
Mani ka juini‑ro‑s.
Xinokuechi kutu‑s nuu Ianyuux,
te ña dandoo‑s tniu‑ia.
Nduu‑da xiʼin‑s kida tniu‑ia.
8-9 Xa na kachitnuʼu ñaʼa‑s janda xtuu koio‑da yaʼa,
tundaʼa‑da‑s juan xee.
Kutuu‑n xiʼin‑s,
te kukaʼnu anu‑n.
Nduu‑s xiʼin Onésimo,
ɨnka se kukanu ini xiʼin‑ro Cristu,
se ñuteyu mee‑n naxee.
Mani ka juini‑ro‑s tuku.
Dɨuni xinokuechi kutu‑s nuu Ianyuux te ña dandoo‑s tniu‑ia.
Kachitnuʼu ñaʼa koio‑s nax ka yaʼa‑da do yaʼa.
10 Ndajan tnuʼu ñaʼa Aristarco,
ɨɨn se yɨndiʼu kaʼnu xiʼin‑da vekaa.
Dɨuni ndajan tnuʼu ñaʼa Smarku,
se kuu daxi Bernabé.
Nux xee Smarku dian ku kuvaʼa anu‑n nuu‑sɨ.
Xá xnaʼa‑n nax n‑jaʼan‑da xa juñaʼa‑n‑sɨ.
11 Dɨuni ndajan tnuʼu ñaʼa Jesús,
se dɨuni nani Justo.
Se yaʼa ni ka kuu se Israel ka kidatniu xiʼin‑da xa na kuaʼa na kɨu tnaʼa ka ñayiu nuu ñayiu taxnuni Ianyuux nuu‑i.
N‑kukaʼnu anu‑da xaxeʼe xa kunduu‑da xiʼin‑s ɨɨn ɨɨn‑s.
12 Dɨuni ndajan tnuʼu ñaʼa Epafras,
ɨnka ntuku se ñuteyu‑n.
Xinokuechi‑ro xiʼin‑s nuu Cristu.
Xiʼin nde yɨkɨ nde tuchi‑s xko xijan taʼu‑s nuu Ianyuux xa dani na kukanu ini‑n Cristu xiʼin xa ma dandoo‑n‑ia.
Dɨuni xijan taʼu‑s xa kutnuni ka ini‑n tnuʼu Ianyuux yodotnuni xiʼin xa na kada ndɨʼɨ koio‑n ntdaa xa juini Ianyuux.
13 Xini‑da xa yo ndeʼe kidatniu‑s xaxeʼe‑n,
xaxeʼe ñayiu Laodicea,
xaxeʼe ñayiu Hierápolis du.
14 Ndajan tnuʼu ñaʼa Sluka,
se kuu setatna.
Mani ka juini‑da‑s.
Dɨuni ndajan tnuʼu ñaʼa se nani Demas.
15 Juñaʼa‑n nuu ñayiu ka kukanu ini Cristu xndaxio Laodicea xa ndajan tnuʼu‑da‑i.
Dɨuni juñaʼa‑n nuu Ninfas xa ndajan tnuʼu‑da‑ña xiʼin ñayiu ka kukanu ini Jesucristu ka nataka veʼe‑ña.
16 Na yaʼa xa kaʼu ndodo carta yaʼa,
te tundaʼa‑n na jɨʼɨn nuu ñayiu ka kukanu ini Cristu Laodicea na kuaʼa na kaʼu ndodo ijan,
te na yaʼa xa kaʼu ndodo carta n‑tundaʼa‑da juaʼan Laodicea,
na naxee dian na kaʼu ndodo tuku.
17 Duʼa juñaʼa koio‑n nuu Arquipo:
“Jun ini‑n xa kada‑n ntdaa tniu n‑taxi Ianyuux,
Ia kuu Xtoʼo‑ro.
Dani junukuechi naʼi‑n nuu‑ia.”
18 Daña Spalu,
ndajan tnuʼu ñaʼa‑da.
Xiʼin ndaʼa mee‑da n‑kidavaʼa‑da uni koon tnuʼu yaʼa.
Dani yɨndiʼu‑da.
Na chindee chituu ñaʼa Ianyuux ndixi ɨɨn ɨɨn‑n.