Janda io xa kutuu kunukoo ñayiu ka kukanu ini Cristu
3
Kuenda kɨu n‑nadandoto ñaʼa Ianyuux mee‑n xiʼin Cristu.
Xaxeʼe xijan io xa ndukundee‑n xa kada‑n xa juini Ianyuux,
Ia tuu andɨu xiʼin Cristu.
Lado kuaʼa Ianyuux nukoo Cristu xa taxnuni‑ia.
2 Najaʼan koio‑n Ianyuux.
Jun ini‑n xa kada‑n ná ka kida Ia xtuu andɨu;
maxku jun ini koio‑n xa kada koio‑n xa ka kida ñayiu ñuñayiu.
3 Kuenda kɨu n‑ka xiʼí‑n xiʼin Cristu chi ñatuka ka kuu‑n ná n‑ka xo kuu‑n.
Ka kunduu‑n xiʼin‑ia xiʼin Ianyuux,
te mee ni Ianyuux xini janda ka kuu‑n vitna.
Mee ni‑ia xini janda kuu Cristu du.
Ñunuu ñaʼa Ianyuux te ma dandoo ñaʼa‑ia.
4 Na ndixi Cristu,
Ia n‑kida xa n‑ka nduu‑ro ɨnka ñayiu,
kada Ianyuux xa kundeʼa‑ro‑ia,
te dɨuni kada‑ia xa kundeʼa ñaʼa ɨnka ñayiu roo.
Te dɨuni kada‑ia xa diñu‑ro ná diñu Cristu.
5 Xaxeʼe xijan maxku kada ka‑n xaloko ka kida ñayiu ñatu ndeka Ianyuux.
Dandoo koio‑n xijan.
Maxku kava ɨɨn solteru xiʼin ɨɨn soltera chi ta tnundaʼa koio ka‑i.
Maxku kada‑n kuechi xiʼin ñayiu ñatu n‑tnundaʼa xiʼin‑n;
maxku ku kuu anu‑n xa daa kada‑n.
Dɨuni maxku kukajan ini‑n xa xnevaʼa ɨnka ñayiu chi kuenda kɨu xndeñuʼu‑ro ɨɨn xa xndeñuʼu‑ro xa ka kukajan ini‑ro xa xnevaʼa ñayiu.
6 Kiti ini Ianyuux nuu ñayiu daa ka kida.
Ka kuxe ini‑i nuu‑ia,
te kada uʼu‑ia‑i na xeé kɨu.
7 N‑ka xo tuu‑n ná xtuu ñayiu ñatu ndeka ñaʼa Ianyuux.
8 Dɨuni maxku kiti ini nuu tnaʼa ka‑n.
Maxku ndundeʼe ka‑n nuu ñayiu.
Maxku ñaʼa kada koio ka‑n ñayiu.
Ni maxku kuiʼa jaʼan ka‑n ñayiu.
Maxku jan kuiʼa tnaʼa‑n.
Maxku ku jan ne ku jan yichi‑n;
kava nxaʼnu tnuʼu‑n.
Maxku daa ka ku jaʼan koio ka‑n,
ni maxku daa ka ku kada koio‑n.
9 Maxku yoo‑n ku jaʼan vete nuu tnaʼa chi ñatuka ka kuu‑n ná n‑ka xo kuu‑n chi n‑ka dandoo‑n xaloko n‑ka xo kida‑n te n‑ka nduu‑n ɨnka ñayiu.
10 Tuku ñayiu n‑ka nduu‑n vitna.
Ñatuka ka kuu‑n ná n‑ka xo kuu‑n.
Xaxeʼe xa ka kutnuni ini‑n tnuʼu Ianyuux yodotnuni,
ka dama‑n juaʼan.
Kida‑ia xa xee‑ro ku kuu‑ro ná kuu mee‑ia.
11 Ña tuu nax viʼi Ianyuux nu ka kuu‑ro ñayiu griegu a ka kuu‑ro ñayiu Israel,
nu ka kuu‑ro ñayiu n‑taʼnde ndodo ñɨɨ nuu ii a ka kuu‑ro ñayiu ñatu n‑taʼnde ndodo ñɨɨ nuu ii.
Ni ña tuu nax viʼi‑ia nu n‑ka kuu‑ro ñayiu ña tuʼa tutu,
nu n‑ka kuu‑ro ñayiu ndeʼe,
ñayiu loko,
nu ka kuu‑ro ñayiu ka kidatniu duʼa nuu xtoʼo‑ro a ka kuu‑ro ñayiu ñayo na xtoʼo io,
chi ñatu ndandɨʼɨ xijan.
Cristu,
ndandɨʼɨ‑ia,
te ñuʼu ñaʼa‑ia ntdaa‑ro.
12 Xaxeʼe xijan n‑kaxi ñaʼa Ianyuux xa ku kuu‑n daʼya‑ia,
te n‑kida‑ia xa n‑ka nduu‑n ñayiu ii,
te xemani ñaʼa‑ia.
Xaxeʼe xijan io xa duʼa kada koio‑n:
Kundaʼu ini tnaʼa koio‑n.
Ku kuu koio‑n ñayiu vaʼa anu.
Maxku ku kuu koio‑n ñayiu xe ini.
Vivii jaʼan koio‑n nuu ñayiu.
Maxku yachi kiti ini koio‑n.
13 Maxku kiti ini‑n nuu ñayiu kida ɨɨn xa ñatu tna ini‑n,
te taxkanu ini‑n ñayiu kida uʼu ñaʼa.
Taxkanu ini‑n ñayiu chi n‑taxkanu ini ñaʼa Ianyuux mee‑ro.
14 Duʼa kada koio‑n,
te dɨuni juemani tnaʼa‑n chi ndandɨʼɨ ka xijan.
Nux juemani tnaʼa‑n,
ndaku‑n xa kada koio‑n ntdaa xaʼa.
15 Kutuu mani koio‑n chi xa na kutuu mani koio‑n n‑kaxi ñaʼa Ianyuux.
Dɨuni xa na kutuu mani koio‑n n‑kida‑ia xa n‑ka nduu‑n ɨnka ntuku ñayiu.
Ku juñaʼa koio‑n xa n‑kutaʼu‑n nuu Ianyuux.
16 Jaʼan koio‑n tnuʼu yodotnuni libru Salmos hora dakuaʼa tnaʼa‑n xiʼin hora jaʼan doʼo tnaʼa‑n.
Jaʼan koio‑n nuu ñayiu nax kakuneʼe canción Ianyuux.
Dɨuni jaʼan koio‑n nuu‑i nax kakuneʼe alabanza‑ia.
Ku kuu‑n ñayiu kaxí ini.
Xiʼin nde yɨkɨ nde tuchi‑n kata‑n nuu Ianyuux,
te juñaʼa‑n xa n‑kutaʼu‑n nuu‑ia.
Nux kunaʼa‑n xa n‑jaʼan Cristu,
ndaku‑n xa kada koio‑n ntdaa xaʼa.
17 Nux kida‑n ɨɨn tniu a na ka ɨnka xa kida‑n,
kada‑n xaxeʼe Jesús,
Ia kuu Xtoʼo‑ro;
a nux jaʼan‑n ɨɨn xa jaʼan‑n,
jaʼan‑n xaxeʼe‑ia.
Ndɨkɨu ndɨñuu ku juñaʼa koio‑n xa n‑ka kutaʼu‑n nuu Taa‑ro Ianyuux,
chi chinuu Ianyuux xa jaʼan koio‑n nuu‑ia xaxeʼe xa n‑xiʼí Jesús.
Janda io xa kutuu kunukoo ñayiu n‑ka tnundaʼa nukee nuveʼe‑i
18 Ndixi,
ñá xndaxio yɨɨ,
jueyuʼu juendetu‑n nuu yɨɨ‑n chi xijan nandajan Cristu,
Ia kuu Xtoʼo‑ro,
Ia kunduu xiʼin‑ro.
19 Ndixi,
se xndaxio ñadɨʼɨ,
juemani koio‑n‑ña te maxku ku jaʼan deen ku jaʼan xatu‑n nuu‑ña.
Janda io xa kutuu kunukoo daʼya xiʼin tadɨʼɨ‑i
20 Ndoʼo,
sekuechi xiʼin dichi kuechi xiʼin solteru kuechi,
io xa jandixa‑n ntdaa xa ka taʼu tniu tadɨʼɨ‑n chi tna ini Ianyuux,
Ia kuu Xtoʼo‑ro xijan.
21 Ndixi,
se ka kuu taa maxku dakiti ini koio‑n daʼya‑n na kuaʼa na ku kuvaʼa anu‑s hora kada‑s xa taʼu tniu‑n.
Janda io xa kutuu ñayiu ka kidatniu duʼa nuu xtoʼo‑i, te janda kutuu se kuu xtoʼo‑i
22 Ndixi,
ñayiu ka xinokuechi,
jandixa koio‑n xtoʼo‑n.
Kada koio‑n ntdaa xa taʼu tniu‑s nuu‑n.
Maxku hora ni ndeʼa ñaʼa xtoʼo‑n ndeʼe ku kadatniu‑n xa na tna ini ñaʼa‑s.
Koo ndaa koo kuiti anu‑n hora ka kidatniu‑n nuu‑s.
Duʼa kada koio‑n chi ka yuʼu‑n nuu Cristu,
Ia kuu Xtoʼo‑ro.
23 Koo ndaa koo kuiti anu‑n hora na kada‑n tniu xtoʼo‑n.
Kada‑n kuenda xa nuu Ianyuux,
Ia kuu Xtoʼo‑ro ka xinokuechi‑n;
ñadu nuu ñayiu.
24 Xá xnaʼa‑n xa mee‑ia kuu Ia taxi taʼu‑n.
Nuu Cristu,
Ia kuu Xtoʼo‑ro,
ka xinokuechi‑n;
ñadu nuu ñayiu.
25 Kada uʼu Ianyuux davaʼa nga ñayiu ka kida uʼu ɨnka ñayiu.
Juñaʼa‑ia taʼu‑i.
Ña tuu nax viʼi‑ia nu ka kuu‑ro ñayiu ka xinokuechi a ka kuu‑ro se xndaxio ñayiu ka kidatniu nuu‑ro.