Kuvete koio‑n, xaxeʼe xa ka kunduu‑n xiʼin Cristu
4
Ñani mani‑da,
kuʼa mani‑da,
kundee ini koio‑n,
kunduu naʼi koio‑n xiʼin Xtoʼo‑ro Jesucristu.
Yo juini‑da xa jini ñaʼa‑da.
Ná kuu premiu‑da ka kuu‑n,
te kuvete‑da xa kuvete‑da xaxeʼe‑n.
Xemani ñaʼa‑da,
ntdaa‑n.
2 Juini‑da xa jaʼan‑da nuu Evodia xiʼin Síntique vitna.
Xini‑da xa ñadɨʼɨ kunduu xiʼin Xtoʼo‑ro Jesucristu ka kuu‑ña.
Xijan‑da xa ɨɨn nuu kani ini‑ña,
nduu‑ña.
3 Te mee‑n,
se kidatniu vaʼa xiʼin‑r,
xijan‑r nuu‑n xa chindee‑n ñadɨʼɨ jan.
Vaʼa n‑ka kidatniu‑ña xiʼin‑da,
hora n‑xian tnuʼu‑da tnuʼu vaʼa Jesucristu nuu ñayiu.
Clemente tuku,
xiʼin dava ka ñayiu n‑ka kidatniu xiʼin‑da.
Naʼa Ianyuux jundu ka kuu‑i,
te xyodotnuni‑i nuu libru mee‑ia,
xa kutuu vaʼa‑i xiʼin‑ia kuia ma jɨn ndɨʼɨ.
4 Ka kunduu‑n xiʼin Xtoʼo‑ro Jesucristu.
Xijan kuvete koio‑n kɨu xiʼin kɨu.
Jaʼan‑da ɨnka vuelta:
Kuvete koio‑n xa kuvete koio‑n.
5 Na jini koio ntdaa ñayiu xa ka kuu‑n ñayiu vaʼa te vii ka kuu anu‑n.
Vax kuyatni xa ndixi Xtoʼo‑ro Jesucristu.
6 Maxku ndu ini‑n,
ni ɨɨn‑n.
Kɨu xiʼin kɨu kajan taʼu‑n nuu Ianyuux.
Juñaʼa‑n xa n‑kutaʼu‑n nuu‑ia,
te kajan‑n davaʼa nga xa ndoñuʼu‑n.
7 Te kada‑ia xa ndetatu anu‑n.
Ña kuaʼa‑ro xa kutnuni ini‑ro janda kida‑ia xa ndetatu anu‑ro,
ko duʼa kuu.
Ndetatu anu‑ro.
Kuu ná kuu xa ñunuu‑ia anu‑ro xiʼin xaxtnuni‑ro,
xaxeʼe xa kunduu‑ro xiʼin Cristu Jesús.
Kani ini koio‑n xa kuu xavaʼa
8 Ñani‑da kuʼa‑da,
duʼa kani ini koio‑n:
ntdaa xa kuu xandaa,
ntdaa xa io xa koo‑ro xañuʼu,
ntdaa xa juini Ianyuux xa kada‑ro,
ntdaa xavaʼa,
ntdaa xa vili kaa,
ntdaa xa ma daketɨu ñaʼa.
Nux io ɨɨn xavaʼa,
te duʼa kani ini koio‑n.
Nux io ɨɨn xa kida xa juñaʼa‑n xa n‑kutaʼu‑n nuu Ianyuux,
duʼa kani ini koio‑n.
9 Duʼa kada koio‑n.
Xá n‑dakuaʼa ñaʼa‑da,
te n‑ka xeka vaʼa‑n tnuʼu‑da.
Xá n‑ka teku‑n tnuʼu n‑jaʼan‑da,
te n‑ka xini‑n xa n‑kida‑da.
Duʼa kada koio‑n.
Te duʼa kunduu Ianyuux xiʼin mee‑n,
te kada‑ia xa ndetatu koio anu‑n.
Ná kuu ɨɨn xa ka doko‑n nuu Ianyuux, kuu xa n‑taxi‑n
10 Dani kunduu‑da xiʼin Xtoʼo‑ro Jesucristu,
te kuvete‑da xa kuvete‑da xaxeʼe mee‑n.
Ɨnka vuelta xá n‑ka xani ini‑n xa chindee ñaʼa koio‑n.
Vaʼa xini‑da xa ñatu n‑ka xande ini ñaʼa‑n,
diko ni ña n‑kuu xa chindee ñaʼa koio‑n.
11 Ñadu xa juini jaʼan‑da xaxeʼe xa ndoñuʼu‑da,
n‑kuaʼa‑da xa kuvete‑da juini nax ni niʼi‑da.
12 Xini‑da janda kuu xa kundaʼu‑ro,
te xini‑da janda kuu xa kutuu vaʼa‑ro.
N‑kuaʼa‑da xa kundee ini‑da,
nu io o ñaʼa,
nani kuu xa chitu xiti‑da a kojon‑da,
io kueʼe o ña tuu ni ɨɨn,
ko ña tuu nax kuu ini‑da.
13 Xiʼin Cristu,
kuaʼa‑da xa kundee ini‑da nuu ntdaa xa io.
Kida‑ia xa ñatu kuita anu‑da.
14 Ko vaʼa n‑ka kida‑n,
xa ka kunduu‑n xiʼin‑da hora kueʼe vida yaʼa‑da.
15 Ñani‑da kuʼa‑da ñuu Filipos,
ka xini‑n nax n‑kuu,
hora n‑kachitnuʼu‑da tnuʼu vaʼa Jesucristu.
Na n‑kee‑da Macedonia,
meni mee‑n n‑ka tundaʼa xa ndoñuʼu‑da.
Te duʼa n‑ka xiaʼan‑n xa n‑kutaʼu‑n nuu Ianyuux,
xaxeʼe xa n‑ka xeka‑n tnuʼu vaʼa Jesucristu.
16 Chi na n‑xo tuu‑da Tesalónica,
uu uni vuelta n‑ka tundaʼa‑n xa ndoñuʼu‑da.
17 Ñadu xa xani ini‑da xa meni xa tnɨɨ mee‑da,
o xa ka taa‑n.
Diko ni juini‑da xa kodo ka niʼi koio mee‑n xa na taxi Ianyuux.
18 Xá n‑tnɨɨ‑da ntdaa xa ndoñuʼu‑da,
te diko kuu sobra.
Ña ndoñuʼu ka‑da ni ɨɨn.
Chi n‑taxi Epafrodito ntdaa xa n‑ka tundaʼa‑n.
Ná kuu ɨɨn xa vili xeʼen kuu,
ná kuu ɨɨn xa ka doko‑n nuu Ianyuux.
Te naʼa‑da xa kueka vaʼa Ianyuux ntdaa xa n‑ka xiaʼan,
te tna ini‑ia.
19 Te naʼa‑da xa taxi Ianyuux ntdaa xa ka ndoñuʼu mee‑n.
Taxnuni‑ia nuu ntdaa xa io,
ntdaa xa io kuu kuenda mee‑ia.
Xaxeʼe xa ka kunduu‑n xiʼin Cristu Jesús,
te taxi Taa‑ia ntdaa xa ndoñuʼu‑n.
20 Taa‑ro Ianyuux kuu‑ia.
Na juñaʼa‑ro xa n‑kutaʼu‑ro nuu‑ia kuia ma jɨn ndɨʼɨ.
Duʼa na koo.
Xanyuux nuu‑n
21 Juñaʼa koio‑n nuu ntdaa ñayiu ijan xa ndajan tnuʼu‑da‑i.
Ñayiu n‑kida dɨɨn Ianyuux ka kuu‑i,
ñayiu ka kunduu xiʼin Cristu Jesús.
Ñani‑ro xtuu xiʼin‑da yaʼa,
ka ndajan tnuñaʼa tuku.
22 Dɨuni ka ndajan tnuñaʼa ntdaa ñayiu ka kunduu xiʼin Cristu Jesús ñuu yaʼa.
Nde ñayiu xtuu veʼe emperador nani César.
23 Na taxi Xtoʼo‑ro Jesucristu xamani‑ia nuu‑n,
ntdaa‑n.
Duʼa na koo.