Jandixa‑da Cristu, te jaʼan Ianyuux xa ña tuu na kuechi‑da io
3
Ñani‑da kuʼa‑da,
kuvete koio‑n xaxeʼe xa ka kunduu‑n xiʼin Xtoʼo‑ro Jesucristu.
Nani n‑jaʼan‑da nuu‑n,
dani kidavaʼa‑da vitna,
chi juini‑da xa kutnuni ini koio‑n.
2 Io seyɨɨ ka juini xa dandaʼu ñaʼa‑s,
se jaʼan tnuʼu vete ka kuu‑s.
Ina ndeʼe ka kuu‑s,
se kida xa uʼu.
Ka jaʼan‑sɨ xa io xa kaʼnde‑s nuu ii‑n,
nux juini‑n xa kunduu‑n xiʼin Jesucristu.
3 Mee‑s n‑ka xaʼnde‑s nuu ii‑sɨ,
xa neʼe ii‑s nuu Ianyuux.
Mee‑ro,
xá n‑nduu‑ro daʼya Ianyuux,
xaxeʼe xa jandixa‑ro Jesucristu.
Xaxeʼe xa kidatniu Espíritu Ianyuux anu‑ro,
te kuu‑ro ñayiu xinokuechi nuu Ianyuux.
Xaxeʼe xa kunduu‑ro xiʼin Cristu Jesús,
te kuvete‑ro xa kuvete‑ro.
Te ñatu io‑ro confianza xa kada‑ro ná ka kida mee‑s.
4 Ko mee‑da tuku,
dɨuni n‑kida‑da ná ka kida mee‑s,
te n‑xio‑da confianza xa n‑kida‑da xavaʼa.
5 Nu una kɨu xa n‑kaku‑da,
te n‑xaʼnde taa‑da nuu ii‑da.
Se Israel kuu‑da.
Taxaʼnu tnetnu‑da n‑ka xo kuu se ñuu Benjamín.
Se jaʼan tnuʼu hebreu kuu‑da,
te dani n‑kuu tadɨʼɨ‑da.
Se tuʼa vaʼa tnuʼu n‑taʼu tniu Moisés n‑kuu‑da,
se fariseu n‑kuu‑da.
6 Xaxeʼe xa n‑jandixa‑da ntdaa ná io ná juaʼan tnuʼu taʼu tniu Moisés,
loko n‑xini uʼu‑da ñayiu ka jandixa Jesucristu.
N‑jandixa‑da tnuʼu n‑taʼu tniu Moisés,
te ni ɨɨn ñayiu ña kuaʼa xa tekuechi ñaʼa‑i.
7 N‑xani ini‑da xa n‑kida‑da ntdaa xa kuu xavaʼa,
ko vitna,
xaxeʼe xa kunduu‑da xiʼin Cristu,
kutnuni ini‑da xa ñatu xiniñuʼu ni ɨɨn xa n‑kida‑da.
8 Kueʼe xa kueʼe yaʼu ka Jesucristu dada davaʼa nga ɨnka xa kuaʼa‑da xa niʼi‑da.
Daxio‑da ntdaa,
xa kunduu‑da xiʼin Xtoʼo‑da Cristu Jesús.
Xaxeʼe Cristu,
n‑dandoo‑da ntdaa xa n‑kuu‑da.
Te ntdaa xa n‑dandoo‑da,
kida‑da kuenda xa miʼi kuu.
Juini‑da xa kunduu‑da xiʼin Cristu.
9 Juini‑da xa kɨndaʼa ñaʼa Cristu.
Chi juini n‑kida‑da ná io ná juaʼan tnuʼu n‑taʼu tniu Moisés,
ko ñatu xiniñuʼu.
Jandixa‑da Cristu,
te jaʼan Ianyuux xa ña tuu na kuechi‑da io.
Chi ɨɨn ñayiu,
nux jandixa‑i Cristu,
te jaʼan Ianyuux xa ña tuu na kuechi‑i io.
10 Juini‑da xa jini vaʼa‑da Cristu.
N‑kida Ianyuux xa n‑nandoto Cristu nuu n‑kuu‑ia ndɨyɨ,
te n‑kida‑ia xa taxnuni‑ia.
Juini‑da xa taxnuni‑ia nuu mee‑da.
Juini kueʼe vida yaʼa‑da,
ko juini‑da xa kunduu naʼi‑da xiʼin Cristu.
Ñatuka kida‑da xa juini mee‑da.
Kuu ná kuu xa xiʼí‑da,
ná n‑xiʼí mee‑ia,
xa kunduu‑da xiʼin‑ia.
11 Juini‑da xa xee‑da nandoto‑da hora na kuú‑da.
Kundee ini‑da, xa xee‑da xa tnɨɨ‑da premiu taxi Ianyuux
12 Ñatu juini‑da xa jaʼan‑da xa xá n‑niʼi‑da ntdaa xaʼa,
ni xa xá n‑kida‑da ntdaa xa io xa kada‑da.
N‑kaxí ñaʼa Cristu Jesús mee‑da,
te kunduu‑da xiʼin‑ia,
xa kada‑da ntdaa xa juini mee‑ia.
13 Ñani‑da kuʼa‑da,
ña juini jaʼan‑da xa xá n‑niʼi‑da xaʼa,
ko idini xa kida‑da kuu.
Xá n‑ndunaa‑da ntdaa xa n‑kuu‑da,
ntdaa xa n‑kida‑da,
te kundee ini‑da xa kunduu naʼi‑da xiʼin Cristu.
14 N‑jaʼan ñaʼa Ianyuux mee‑da,
xa kunduu‑da xiʼin Cristu Jesús,
te kutuu‑da xiʼin‑ia andɨu.
Kundee ini‑da xa xee‑da xa tnɨɨ‑da premiu taxi Ianyuux.
15 Ñayiu jandixa Jesucristu ka kuu‑ro,
ɨɨn nuu na kani ini‑ro,
ntdaa‑ro.
Nux ñatu ɨɨn nuu xani ini‑ro,
te dandeʼa ñaʼa Ianyuux mee‑n xa juini ka‑i.
16 Xá n‑ka xeka‑ro tnuʼu xandaa.
Na kunduu naʼi‑ro xiʼin xa kuu xandaa.
17 Ñani‑da kuʼa‑da,
kada koio‑n ná kida mee‑da,
te kundeʼa koio‑n nanda xtuu ñayiu duʼa ka kida.
Chi ɨɨn ichi kaneʼe katnɨɨ koio mee‑n ka kuu‑da.
18 Kueʼe vuelta xá n‑jaʼan‑da,
te vitna jaʼan‑da xiʼin nte nuu‑da,
xa io kueʼe ñayiu ña ka jandixa Cristu.
Juini n‑xiʼí‑ia nuu curuxi xaxeʼe‑i,
ko ka xini uʼu‑i‑ia.
19 Ma dakaku Ianyuux mee‑i,
jɨʼɨn koio‑i andea.
Ná kuu ɨɨn santu ka jandixa‑i,
da kuu ntdaa xa ka kukajan ini‑i.
Te ñatu ka kujanuu‑i,
chi duʼa ka najuen tnuʼu‑i mee‑i.
Meni xa io ñuñayiu ka juini‑i.
20 Ko mee‑ro,
kuu‑ro ñayiu kutuu andɨu,
te xndetu‑ro xa na ndixi Xtoʼo‑ro Jesucristu nde andɨu.
Ia dakaku ñaʼa kuu‑ia.
21 Nadama‑ia yɨkɨ kuñu‑ro ña xiniñuʼu ka.
Nani n‑tnɨɨ Jesucristu yɨkɨ kuñu xee hora n‑nandoto‑ia,
dani taxi Ianyuux yɨkɨ kuñu xee mee‑ro.
Xaʼa kada‑ia xiʼin xa taxnuni‑ia,
nani taxnuni‑ia nuu ntdaa xa io.