Janda io xa kutuu kunukoo daʼya xiʼin tadɨʼɨ‑i
6
Ndoʼo,
sekuechi xiʼin dichi kuechi xiʼin solteru kuechi,
io xa jandixa koio‑n tadɨʼɨ‑n.
Maxku kuxe ini‑n nuu tadɨʼɨ‑n chi ñatu natau chi ñayiu ka kukanu ini Cristu,
Ia kuu Xtoʼo‑ro,
ka kuu‑n.
Ɨɨn xavaʼa kuu xijan.
2-3 Yodotnuni:
“Koo koio‑n xañuʼu nuu tadɨʼɨ‑n.”
N‑jaʼan Ianyuux xa nux jandixa‑ro ley yaʼa,
kueʼe xa kineʼe‑ro.
Xaʼa kuu xijan:
“Kani jɨʼɨn‑ro ñuñayiu te kutuu vii kutuu vaʼa‑ro.”
Vuelta yaʼa kuu vuelta kiʼna nuu n‑jaʼan‑ia xa nux jandixa‑ro ley‑ia,
kueʼe xa kineʼe‑ro.
4 Ndixi,
ñayiu ka kuu taa,
maxku dakiti ini‑n daʼya‑n.
Najani‑n nuu‑i xa n‑jaʼan Ianyuux.
Juña tnuʼu‑n‑yɨ nuu nax taʼu tniu‑ia xa kada‑ro.
Janda io xa kutuu ñayiu ka kidatniu duʼa nuu xtoʼo‑i, te janda io xa kutuu se kuu xtoʼo‑i
5 Ndixi,
ñayiu ka kidatniu duʼa nuu xtoʼo‑n,
koo‑n xañuʼu nuu‑s.
Koo ndaa koo kuiti anu‑n hora kida‑n tniu‑s.
Kada koio‑n kuenda xa nuu Cristu xinokuechi‑n,
ñadu nuu xtoʼo‑n.
6 Maxku hora ni ndeʼa ñaʼa xtoʼo‑n ndeʼe ku kadatniu‑n xa na tna ini ñaʼa‑s.
Io xa ku kundaa ku kuvaʼa anu‑n hora ka kida‑n tniu‑s,
chi xijan ndajan Ianyuux.
Kuenda kɨu nuu Cristu xinokuechi‑n xa xinokuechi‑n nuu xtoʼo‑n.
7 Koo ini koo anu‑n xa kada‑n tniu xtoʼo‑n.
Kada‑n kuenda xa nuu Cristu,
Ia kuu Xtoʼo‑ro,
ka xinokuechi‑n,
ñadu nuu ñayiu.
8 Xá ka xini‑n ntdaa‑n xa nux ka kida‑n xavaʼa,
taxi Ianyuux taʼu‑n;
kuu‑n ñayiu ka kidatniu duʼa nuu xtoʼo‑n a ka kuu‑n ñayiu ña ka kidatniu duʼa nuu xtoʼo‑n.
9 Dani ndixi,
se xndaxio ñayiu ka kidatniu duʼa nuu‑n,
maxku jaʼan‑n nuu‑i xa kada uʼu‑n‑yɨ a xa jani‑n‑yɨ.
Xa xnaʼa‑n xa ɨɨn ni Ia kuu xtoʼo ñayiu ka kidatniu duʼa nuu xtoʼo‑i io xiʼin ñayiu ñayo na xtoʼo io.
Ña tuu nax viʼi‑ia nuu ka kuu‑ro ñayiu ka kidatniu duʼa a ka kuu‑ro se xndaxio ñayiu ka kidatniu duʼa nuu‑ro.
Andɨu kuu nuu tuu‑ia.
Kuenda kɨu soldado xetniu armadura ka kuu ñayiu ka kukanu ini Jesucristu
10 Xaʼa nga na jaʼan‑da nuu‑n.
Na chindee ñaʼa Ianyuux xa dani na kukanu ini‑n Cristu,
te kunduu‑n xiʼin‑ia.
Na kadatniu Ianyuux anu‑n xa daa na kada‑n.
11 Vaʼa xa vaʼa kada tuʼa koio‑n mee‑n xa na kuaʼa maxku dajaʼan ñaʼa Kuiʼna xa kada koio‑n kuechi.
Kada koio‑n kuenda xa soldado ka kuu‑n.
Ndɨu nuu ɨɨn soldado vestidura‑s,
te neʼe‑s armas xa jɨn jantnaʼa‑s.
12 Kuenda kɨu jantnaʼa‑ro xa ndeʼe ka ndukundee‑ro xa maxku kada‑ro kuechi hora ka dajaʼan ñaʼa xaloko xiʼin tachi loko xiʼin mee Kuiʼna taxnuni nuu ntdaa xaʼa.
Kuenda kɨu ka jantnaʼa‑ro,
ko ñadu ñayiu ka jantnaʼa xiʼin‑ro chi xaloko.
Ka xikonuu‑i andɨu xiʼin ñuñayiu,
te ka taxnuni‑i nuu ñayiu loko xtuu ñuñayiu.
Ñatu ka kida‑ro kuechi hora dajaʼan ñaʼa Kuiʼna xa kada‑ro nux xndedi ini‑ro.
13 Xa na kuaʼa maxku ndaku xaloko xa kada koio‑n kuechi,
kada tuʼa koio‑n mee‑n ná io tuʼa ɨɨn soldado jɨn jantnaʼa.
Xa na kuaʼa maxku ndaku Kuiʼna xa dajaʼan ñaʼi‑i xa kada‑n kuechi,
kunaʼa vaʼa‑n nax kuu xa n‑jaʼan Ianyuux xa io xa kada‑n,
te kukanu ini naʼi‑n‑ia.
Ma kaka yata‑n nuu‑ia nux daa na kada‑n.
14 Kuenda kɨu ɨɨn soldado duku dujun kaʼa cinturón nunu xa maxku kɨu ñaʼa ɨɨn xa ñani ñaʼa ku kuu koio‑n xa jaʼan‑n nuu ñayiu xa n‑jaʼan Ianyuux.
Ɨɨn xandaa kuu.
Dɨuni kuenda kɨu ɨɨn soldado ndiʼu pechu ɨɨn xa nani coraza ka kuu‑n xa jandixa‑n Ianyuux.
15 Xa na kuaʼa jɨʼɨn ɨɨn soldado xa jantnaʼa‑s io xa ndɨu‑s ndixa‑s,
te xa na kuaʼa jɨʼɨn‑n xa juña tnuʼu‑n ñayiu nax io xa kada‑i xa na kuaʼa na ku kundaa ku kuvatu anu‑i,
kada tuʼa‑n mee‑n.
16 Xko xadɨ soldado escudo‑s nuu‑s,
xiti‑s xa ndaʼva‑s ndaʼa kuxi koko ka daxee se jantnaʼa xiʼin‑s.
Kuenda kɨu kada‑n ná kida soldado jan xa ndaʼva‑s ndaʼa kuxi koko jan xa ma juejoon‑n xa kadatniu Kuiʼna anu‑n.
Nux kukanu ini‑n Cristu ma juejoon‑n xa kadatniu‑i anu‑n.
17 Kuenda kɨu ɨɨn soldado n‑kaku xa kuú‑s xa n‑ñani dɨkɨ‑s ɨɨn xa n‑ñani xaxeʼe xa ñuʼu‑s lelu kaa ku kuu‑n xa kaku koio‑n nuu Kuiʼna,
te nanitaʼu‑n.
Ná kada‑ro kuenda xa soldado neʼe espada‑s xa dadaʼan niʼno‑s mee‑s ku kuu‑n xa dadaʼan niʼno‑n mee‑n nuu ñayiu hora jaʼan‑n tnuʼu Ianyuux yodotnuni n‑jaʼan Espíritu‑ia.
18 Najaʼan koio‑n Ianyuux hora na kada‑n ntdaa xa jaʼan‑da ya.
Ndɨkɨu ndɨñuu kajan taʼu koio‑n nuu Ianyuux xaxeʼe ntdaa ñayiu n‑kida‑ia xa nduu‑i ñayiu ii.
Chindee ñaʼa Espíritu‑ia hora na kajan taʼu koio‑n nuu‑ia.
Kadayɨka‑n mee‑n te jun ini‑n xa daa kada koio‑n.
19 Kajan taʼu koio‑n nuu Ianyuux xaxeʼe daña tuku.
Kajan taʼu koio‑n nuu‑ia xa na niʼi‑da tnuʼu io xa jaʼan‑da nuu ñayiu.
Dɨuni kajan taʼu koio‑n xa na kuyɨɨ‑da xa jaʼan‑da nuu ñayiu nax io xa kada‑i xa nanitaʼu‑i.
Ñayo‑ro n‑xo xini janda nanitaʼu‑ro,
ko vitna ka xini‑ro.
20 Xaxeʼe xaʼa yɨndiʼu daña se kuu ndaʼa xeʼe Jesucristu.
Kajan taʼu koio‑n nuu Ianyuux xa maxku yuʼu‑da xa jaʼan‑da xa io xa jaʼan‑da.
Ndajan tnuʼu Spalu ñayiu ka kukanu ini Jesucristu xndaxio Éfeso
21 Tíquico kuu se kachitnuʼu ñaʼa nuu janda tuu‑da,
te nax kida‑da do yaʼa kɨu na naxee‑s do dian.
Ñani‑ro kuu‑s chi ka kukanu ini‑ro xiʼin‑s Cristu,
te mani ka juini‑ro‑s.
Xinokuechi kutu‑s nuu Ianyuux te ña dandoo‑s tniu‑ia.
22 Natundaʼa‑da‑s juan naxee na kuaʼa na kachitnuʼu ñaʼa‑s nuu janda xtuu koio‑da xiʼin nax ka yaʼa‑da.
Kutuu‑n xiʼin‑s,
te kukaʼnu anu‑n.
23 Yo kuu anu‑da xa kada Taa‑ro Ianyuux xiʼin Jesucristu,
Ia kuu Xtoʼo‑ro,
xa na kutuu vii kutuu vaʼa koio‑n xa ka kuu‑n ñayiu ka kukanu ini‑ia.
Na kutuu mani koio‑n.
Dɨuni na kada‑ia xa dani na kukanu ini‑n‑ia.
24 Na chindee chituu ñaʼa Ianyuux ntdaa‑n xa ka kuu‑n ñayiu ka xemani Xtoʼo‑ro Jesucristu.
Dɨuni na kada‑ia xa dani ku juemani‑n Jesucristu.