5
Xijan kuu xa kada koio‑n xavaʼa ná kida Taa‑ro Ianyuux chi n‑ndudaʼya ñaʼa‑ia,
te xemani ñaʼa‑ia.
2 Xaxeʼe xa xemani ñaʼa Cristu n‑doko‑ia mee‑ia nuu Ianyuux.
N‑kuu‑ia ná kuu ɨɨn xa vili xeʼen n‑ka xo doko ñayiu Israel nuu altar Ianyuux.
Mudu yaʼa n‑chiyaʼu‑ia kuechi‑ro.
Kada‑n ná n‑kida Cristu.
Juemani‑n ñayiu,
te kada koio‑n xa na kuu‑i xavaʼa.
3 Maxku kava ɨɨn solteru xiʼin ɨɨn soltera chi ta tnundaʼa ka‑i.
Maxku kada‑n kuechi xiʼin ñayiu ñatu n‑tnundaʼa xiʼin‑n;
maxku ku kuu anu‑n xa daa kada‑n.
Dɨuni maxku ku kuu koio‑n ñayiu kajan ini.
Maxku kada koio‑n xijan chi ñatu natau chi n‑kida Ianyuux xa n‑ka nduu‑ro ñayiu ii.
4 Maxku ku jan ne ku jan yichi‑n chi januu.
Maxku ku jan loko ku jan duʼa‑n;
jaʼan nxaʼnu koio‑n.
Maxku ku kine tnuʼu‑n ɨɨn ñadɨʼɨ janda kaa‑ña.
Ni ɨnka tnuʼu loko maxku jaʼan‑n.
Vaʼa ka na jaʼan koio‑n nuu ñayiu:
“Na kutaʼu‑da nuu Ianyuux.”
5 Solteru xkaa xiʼin tɨtnɨ soltera a soltera xkaa xiʼin tɨtnɨ solteru,
xá ka xini‑n xa ma niʼi‑i taʼu‑i nuu taxnuni Cristu xiʼin Ianyuux nux daa ka xko kida‑i.
Ni ñayiu kida xane xayichi ma jɨʼɨn nuu taxnuni‑ia.
Ni ñayiu yo ka kukajan ini xa xnevaʼa ɨnka ñayiu,
mayo‑i niʼi‑i taʼu‑i tuku.
Kuenda kɨu xndeñuʼu‑i ɨɨn xa xndeñuʼu‑i xa ka kukajan ini‑i xa xnevaʼa ɨnka ñayiu.
6 Maxku juejoon‑n xa dandaʼu ñaʼa ñayiu ka jaʼan tnuʼu loko tnuʼu duʼa.
Xaxeʼe xa ka jaʼan‑i xijan,
kiti ini Ianyuux nuu‑i,
te kada uʼu‑ia‑i na xee kɨu chi ka kuxe ini‑i nuu‑ia.
7 Maxku kandeka tnaʼa ka‑n xiʼin ñayiu ijan,
ni maxku kada‑n ná ka kida‑i.
8 N‑ka xo kuu‑n ñayiu ñatu n‑ka xini jundu kuu Ianyuux,
ko vitna ka xini‑n jundu kuu‑ia.
Kuenda kɨu nuu kanda ka xikonuu‑n vitna.
Kuikonuu kuikondodo koio‑n ná ka xikonuu ka xikondodo ñayiu xini jundu kuu Ianyuux.
9 Ñayiu ka xini jundu kuu Ianyuux ndixa,
vaʼa‑i,
te jandixa‑i‑ia.
Ka jaʼan‑i ɨɨn xandaa.
10 Chinuu koio‑n nuu nax juini‑ia xa kada‑ro,
te jun ini koio‑n xa daa kada‑n.
11 Maxku kandeka tnaʼa‑n xiʼin ñayiu ta jini ka jundu kuu Ianyuux,
ni maxku kada‑n xaloko ka kida‑i.
Naa xa kada‑n ná ka kida‑i,
datuu koio‑n nax ka kida‑i.
12 Ɨɨn xa januu kuu xa kakuneʼe‑ro xaloko ka kida‑i nuu ñayo ndeʼa.
13 Ntdaa xaloko n‑ka kida‑i nuu ñayo xndeʼa,
datuu ñayiu ka xini jundu kuu Ianyuux nuu dava ka ñayiu.
14 Hora na datuu ñayiu xini jundu kuu Ianyuux xaloko n‑ka kida‑i,
jini ntdaa ñayiu xa xaloko kuu xa n‑ka kida ñayiu ijan.
Duʼa yodotnuni:
Maxku kidi ka‑n,
nujun ini koio.
Ndoto ndoʼo,
ñayiu ka kuu kuenda kɨu ndɨyɨ.
Te datnuu dayeʼe Cristu nuu kutuu kunukoo‑n.
15 Taʼu tniu‑da nuu‑n xa kani ini vaʼa koio‑n janda kutuu‑n ñuñayiu.
Maxku ku kuu‑n ná kuu ñayiu ña ka xini jundu kuu Ianyuux;
kuikonuu kuikondodo‑n ná ka xikonuu ka xikondodo ñayiu ka kukaxi ini.
16 Kundu ini koio‑n kada‑n tniu Ianyuux;
maxku dakuita‑n tiempo chi yo kueʼe xaloko kuu ñuñayiu.
17 Maxku ku kuu koio‑n ñayiu lilu.
Jun ini koio‑n xa jini‑n nuu nax juini Ianyuux xa kada koio ñayiu.
18 Maxku koʼo koio‑n vinu xa nde xini‑n chi dakuita ñaʼa‑i.
Naa xa juʼun ñaʼa ndɨdɨ́ ka xiʼi‑n,
na juʼun ñaʼa Espíritu Ianyuux
19 na kuaʼa najani koio‑n nuu ñayiu xa yodotnuni nuu libru Salmos.
Dɨuni jaʼan koio‑n nuu‑i nax kakuneʼe canción Ianyuux.
Xiʼin nde yɨkɨ nde tuchi‑n nakuetu koio‑n alabanza nuu‑ia.
Xiʼin nde yɨkɨ nde tuchi‑n kata koio‑n nuu‑ia,
te dɨuni dakande koio‑n.
20 Ndɨkɨu ndɨñuu juñaʼa koio‑n nuu Taa‑ro Ianyuux:
“N‑kutaʼu‑da,
Taa‑ro”,
xaxeʼe xa vaʼa kida ñaʼa‑ia.
Xijan taʼu‑ro nuu‑ia chi nini‑ia xa jaʼan‑ro xaxeʼe xa n‑xiʼí Jesucristu,
Ia kuu Xtoʼo‑ro,
xaxeʼe‑ro.
Janda io xa kutuu kunukoo ñayiu n‑ka tnundaʼa nukee nuveʼe‑i
21 Xaxeʼe xa ndeka ñaʼa‑ia ntdaa‑ro,
io xa jueyuʼu juendetu nuu tnaʼa‑n.
22 Ñadɨʼɨ io yɨɨ,
na jueyuʼu juendetu‑ña nuu‑s.
Na kada‑ña kuenda xa nuu Cristu,
Ia kuu Xtoʼo‑ro,
xeyuʼu xendetu‑ña;
ñadu nuu yɨɨ‑ña.
23 Se io ñadɨʼɨ,
io xa junuu‑s ñadɨʼɨ‑s ná ñunuu Cristu ñayiu ka kukanu ini ñaʼa.
Mee‑ia n‑dakaku ñaʼa roo,
ñayiu ka kuu kuenda kɨu yɨkɨ kuñu‑ia.
Kuenda kɨu dɨkɨ ntdaa‑ro kuu‑ia,
te kuenda kɨu dɨkɨ ɨɨn ñadɨʼɨ kuu yɨɨ‑ña.
24 Ná ka xeyuʼu ka xendetu‑ro ntdaa‑ro nuu Cristu,
daa na jueyuʼu juendetu ñadɨʼɨ nuu yɨɨ‑ña ndɨkɨu ndɨñuu.
25 Se xndaxio ñadɨʼɨ,
na juemani koio‑s‑ña ná xemani ñaʼa Cristu mee‑ro xa ka kuu‑ro ñayiu ka kukanu ini‑ia.
N‑doko‑ia mee‑ia na n‑xiʼí‑ia xaxeʼe‑ro.
26 N‑doko‑ia mee‑ia xa kada‑ia xa nduu koio‑ro ñayiu ii xiʼin xa ndundoo ndunini‑ro.
Dɨuni n‑kida‑ia xa kaʼu koio‑ro tnuʼu‑ia yodotnuni,
te jandixa‑ro‑ia xa na kuaʼa ndundoo ndunini koio‑ro.
Kuenda kɨu n‑xichi ñɨɨ‑ro xa ndundoo ndunini‑ro.
27 Hora na nadayujun nadataka ñaʼa Ianyuux nuu‑ia jini‑ia xa vaʼa roo,
ñayiu ka kukanu ini‑ia.
Dɨuni jini‑ia xa n‑ka nduu‑ro ñayiu ii,
ñayiu ña tuu na kuechi ndido tau,
te najuen tnuʼu ñaʼa‑ia.
28 Io xa juemani se io ñadɨʼɨ ñadɨʼɨ‑s ná xemani ñaʼa Cristu roo.
Io xa juemani‑s‑ña ná xemani‑s mee‑s.
Nux xemani ɨɨn seyɨɨ ñadɨʼɨ‑s,
xemani‑s mee‑s.
29 Ñayo ñayiu xini uʼu mee‑i,
chi duʼa ñunuu‑i mee‑i.
Xaxi xiʼi‑i xa na koo vaʼa‑i,
te xniʼno‑i daʼma‑i.
Ná ñunuu‑ro mee‑ro daa ñunuu ñaʼa Cristu roo,
ñayiu kukanu ini‑ia
30 chi kuenda kɨu yɨkɨ kuñu‑ia ka kuu‑ro.
31 Duʼa yodotnuni tnuʼu Ianyuux:
“Xaxeʼe xijan dandoo seyɨɨ tadɨʼɨ‑s te xeka tnaʼa‑s xiʼin ñadɨʼɨ‑s xa na ku kuu‑s nduu‑s idii nga ñayiu.”
32 Ñayo‑ro kutnuni ini nakuenda duʼa kakuneʼe Ianyuux Cristu xiʼin ñayiu kukanu ini‑ia.
33 Na juemani se io ñadɨʼɨ ñadɨʼɨ‑s ná xemani‑s mee‑s.
Te na koo mee‑ña xañuʼu nuu yɨɨ‑ña.