Idii nga ñayiu n‑ka nduu ntdaa ñayiu ka kukanu ini Jesucristu
4
Xaxeʼe xijan,
jaʼan daña,
se yɨndiʼu xaxeʼe Ia kuu Xtoʼo‑ro,
nax io xa kada koio‑n.
Maxku kada koio‑n ɨɨn xa ñatu natau chi ñayiu n‑kida Ianyuux xa teku‑ro tnuʼu‑ia ka kuu‑ro.
2 Maxku ku kuu koio‑n ñayiu xe ini.
Vivii jaʼan koio‑n nuu ñayiu.
Maxku yachi kiti ini koio‑n.
Juemani tnaʼa‑n na kuaʼa taxkanu ini nuu tnaʼa‑n.
3 Jun ini koio‑n xa ma jantnaʼa tnuʼu‑n na kuaʼa maxku dandoo tnaʼa‑n.
Xaxeʼe xa ñuʼu ñaʼa Espíritu Ianyuux ndixi xiʼin xaxeʼe xa mani xtuu‑n,
ndaku koio‑n xa ma jantnaʼa tnuʼu‑n.
4 Idii nga ñayiu ka kuu‑ro ntdaa‑ro chi kuenda kɨu yɨkɨ kuñu Cristu ka kuu‑ro.
Idii ni Espíritu Ianyuux io,
te ñuʼu ñaʼa‑ia ntdaa‑ro.
Ɨɨn ni Ia xndetu‑ro ntdaa‑ro chi n‑kida Ianyuux xa teku‑ro tnuʼu‑ia xa na kuaʼa na kuvete‑ro xa ndixi Ia xndetu‑ro.
5 Idii ni Ia kuu Xtoʼo‑ro Jesús io.
Ɨɨn ni xa ka jandixa‑ro.
Ɨɨn ni‑ia ka kukanu ini‑ro.
Xaxeʼe xa ka kukanu ini‑ro‑ia,
ka xendute‑ro.
6 Idii ni Ianyuux io,
te kuu‑ia Taa‑ro ntdaa‑ro.
Kunduu‑ro xiʼin‑ia.
Kidatniu‑ia anu‑ro ntdaa‑ro xa na kada‑ro xa juini‑ia.
Kuu‑ia Ia taxnuni nuu‑ro ntdaa‑ro.
7 N‑kida Cristu xa tuku tniu ka kida dava‑ro,
te tuku tniu kada dava ka‑ro.
Io ñayiu vaʼa ka ka kida tniu‑ia,
io ñayiu ñaʼa nga.
Kidatniu‑ia anu‑ro ɨɨn ɨɨn‑ro xa na kada‑ro tniu‑ia.
Naka vaʼa‑ia.
8 Duʼa yodotnuni:
Kɨu juan ndaa‑s andɨu,
ndeka‑s se n‑tnɨɨ‑s juan ndaa.
Kueʼe xa n‑xiaʼan nga‑s ñayiu.
9 N‑xio xa ndaa‑ia andɨu xaxeʼe xa n‑juun‑ia nuu kunu xa kunu ñuñayiu.
10 Ia n‑juun nuu kunu ñuñayiu kuu Ia juan ndaa nde yata andɨu xa na kuaʼa kada‑ia xa ku kuu‑ro ná kuu mee‑ia xiʼin xa na juʼun‑ia ñayiu,
ángel,
ntdaa xa io andɨu xiʼin ñuñayiu du.
11 Mee‑ia n‑kida xa ma ɨɨn ni tniu kada‑ro ntdaa‑ro chi tuku tniu n‑taxi‑ia xa kada dava‑ro,
te tuku tniu n‑xiaʼan‑ia xa kada dava ka ñayiu.
Dava‑i ka jaʼan nuu ñayiu nax io xa kada‑i xa na kuaʼa na nanitaʼu‑i.
Dava‑i n‑tundaʼa‑ia xa dakuaʼa‑i ñayiu ta teku ka tnuʼu‑ia.
Dava‑i ka jaʼan nuu ñayiu xa n‑jaʼan Ianyuux nuu‑i.
Dava‑i xñunuu ñayiu ka kukanu ini Cristu,
te ka dakuaʼa‑i‑yɨ.
12 Ka kida‑i xa na kutnuni vaʼa ka ini koio ñayiu kuu kuenda kɨu yɨkɨ kuñu Jesús xa n‑jaʼan Ianyuux.
N‑kida Ianyuux xa n‑ka nduu‑i ñayiu ii.
13 Juini Ianyuux xa ɨnuu na kukanu ini‑ro Cristu xiʼin xa na jini koio‑ro jundu kuu‑ia xiʼin nax n‑kida‑ia na kuaʼa na xee‑ro ku kuu‑ro ɨɨn ñayiu n‑tnuu ini,
te ku kuu‑ro ñayiu vaʼa na vaʼa mee‑ia.
14 Maxku ku kuu ka‑ro ná kakuu sekuechi xa ka jandixa‑s davaʼa nga xa ka jaʼan ñayiu.
Kuenda kɨu ɨɨn barcu duʼa duʼa ndeka ñaʼa tachi ndeʼe juaʼan ka kuu‑s.
Ka jandixa‑s ñayiu n‑kuaʼa xa dajaʼan‑i ɨnka ñayiu xa na jandixa‑i ɨɨn xa ñatu kuu xandaa.
Vaʼa n‑kuaʼa ñayiu ijan xa dandaʼu‑i ɨnka ñayiu.
15 Xaxeʼe xa mani ka juini tnaʼa‑ro,
io xa juña tnuʼu tnaʼa‑ro ntdaa xa n‑jaʼan Ianyuux xa na xee‑ro ku kuu‑ro ná kuu Cristu.
Ɨɨn xandaa kuu xa n‑jaʼan‑ia.
Kuenda kɨu dɨkɨ roo,
ñayiu ka kukanu ini Cristu kuu‑ia.
16 N‑kida‑ia xa ɨɨn ni ñayiu n‑ka nduu‑ro,
te kuenda kɨu ɨɨn ɨɨn parti yɨkɨ kuñu‑ia ka kuu‑ro.
Xaʼnu ɨɨn ɨɨn parti yɨkɨ kuñu‑ro según janda xnetnaʼa‑i.
Xaxeʼe xa mani ka juini tnaʼa‑ro,
kida‑ro ntdaa‑ro tniu n‑taxi Ianyuux xa na kuaʼa kutnuni vaʼa ka ini dava ka ñayiu tnuʼu‑ia yodotnuni xiʼin xa na kukanu ini vaʼa ka‑i Cristu xiʼin xa na kukueʼe ka ñayiu kukanu ini‑ia.
Dɨuni kuenda kɨu ɨɨn veʼe kuaʼa juaʼan ka kuu‑ro.
Janda io xa kutuu kunukoo ñayiu ka kukanu ini Cristu
17 Xaxeʼe xijan kachitnuʼu ñaʼa‑da xa maxku kutuu kunukoo ka‑n ná xtuu ñayiu ñatu ka xini jundu kuu Ianyuux.
Ka xani ini‑i xa ɨɨn xa ñukax ini ka keʼe‑i,
ko ñadu ɨɨn xa ñukax ini kuu xa ka kida‑i.
Taʼu tniu Cristu xa jaʼan‑da xaʼa nuu‑n.
18 Xaxeʼe xa ñayo‑i ka xini xa tnuʼu Ianyuux kuu ɨɨn xandaa,
ñayo‑i xtuu ná taʼu tniu‑ia.
Hora jaʼan‑ro nuu‑i xa n‑kida‑ia,
ñatu ka juini‑i xa kunini‑i;
unu lilu‑i.
Xaxeʼe xijan kuenda kɨu xtuu nee xtuu duʼa‑i.
19 Xaxeʼe xa ñatuka ka xini‑i xa januu,
mee ni kuechi ka kuu anu‑i xa kada‑i kida‑i;
ka kida‑i xaloko nde ndaa n‑xee.
20 Maxku duʼa ku kada koio‑n chi ñadu xijan n‑ka dakuaʼa ñaʼa ñayiu ka kakuneʼe Cristu.
21 ¿A ñatu n‑ka kachitnuʼu ñaʼa‑i xa n‑kida Jesús xiʼin xa n‑jaʼan‑ia u?
Ɨɨn xa ndaa kuu xa n‑jaʼan‑ia.
22 N‑ka jaʼan‑i xa juini‑ia xa dandoo koio‑n mudu n‑ka xo tuu‑n.
Dɨuni n‑ka jaʼan‑i nuu‑n xa maxku ku kuu koio‑n ná n‑ka xo kuu‑n xiʼin xa io xa dandoo koio‑n xaloko xaduʼa n‑ka xo kida‑n.
N‑ka xo xani ini‑n xa ɨɨn xavaʼa kuu xijan,
te n‑ka xo kuu anu‑n xa kada‑n xijan.
23 N‑ka jaʼan ñayiu ijan nuu‑n xa maxku kani ini ka‑n xa kada‑n xaloko.
24 Dɨuni n‑ka jaʼan‑i xa io xa tuku ñayiu nduu koio‑n.
N‑kida Ianyuux xa n‑ka nduu‑n ñayiu jandixa koio‑ia te kada‑n xa juini‑ia xa kada‑n nudaa.
Kada ndixa‑n xa juini‑ia.
25 Xaxeʼe xa n‑ka nduu‑n ɨnka ñayiu,
maxku ku jaʼan vete koio ka‑n.
Jaʼan ndaa koio nuu tnaʼa‑n chi ɨɨn ni ñayiu n‑ka nduu‑n.
26 Nux kiti ini‑n nuu ñayiu maxku ñaʼa kada‑n‑yɨ na kuaʼa maxku kada‑n kuechi,
xa maxku kiti ini koio‑n nuu‑i nyakanyaa
27 na kuaʼa maxku ndaku Kuiʼna xa kada‑n kuechi.
28 Ñayiu n‑ka kuu ñaduʼu,
maxku duʼu koio ka‑i.
Na kadatniu koio‑i xa na niʼi koio‑i xa ka ndoñuʼu‑i xiʼin xa na niʼi‑i xa juñaʼa nga‑i ñayiu ka kundaʼu.
29 Maxku ku jaʼan koio‑n tnuʼu loko tnuʼu duʼa.
Jaʼan koio‑n nuu ñayiu xa n‑jaʼan Cristu xiʼin xa n‑kida‑ia na kuaʼa vaʼa ka na jini‑i xaʼa.
30 Maxku ñaʼa kada‑n‑yɨ na kuaʼa maxku kukoʼyo ini Espíritu Ianyuux.
Kuenda kɨu sellu xneʼe‑n kuu‑ia xa n‑keé‑ia anu‑n,
xa kunaʼa koio‑n xa dananitaʼu ñaʼa Ianyuux na xee kɨu.
31 Taxkanu ini‑n ñayiu kida uʼu ñaʼa.
Maxku kiti ini nuu tnaʼa ka‑n.
Maxku ndundeʼe ka‑n nuu ñayiu.
Ni maxku kanandodo tnaʼa ka‑n.
Ni maxku kuiʼa jaʼan ka‑n ñayiu.
Maxku jan kuiʼa tnaʼa‑n.
Maxku ñaʼa kada koio ka‑n ñayiu.
32 Kada‑n xa na kuu ñayiu xavaʼa.
Kundaʼu ini nuu tnaʼa‑n.
Taxkanu ini nuu tnaʼa‑n na n‑taxkanu ini ñaʼa Ianyuux xaxeʼe xa n‑xiʼí Jesús.