Na jandixa naʼi koio ka‑n Xtoʼo‑ro Jesucristu
13
Xee‑da ñuu‑n vuelta kuu uni vitna.
Nux tekuechi ɨɨn ñayiu xa n‑dakuaʼa ñaʼa‑da,
te io xa jaʼan ndaa uu uni ñayiu xa duʼa kuu.
2 Na n‑xo tuu‑da xiʼin‑n vuelta kuu uu,
n‑jaʼan‑da xa nux naxee‑da ñuu‑n ɨnka vuelta,
te maxku taxkanu ini ka‑da ñayiu n‑ka kida xa uʼu.
Vitna,
antecas xa xee‑da,
jaʼan‑da nuu mee‑i xiʼin ntdaa mee‑n,
xa ma kaku‑n,
ni ɨɨn‑n.
3 Ka juini‑n xa kototnuni ñaʼa‑n,
nux jaʼan‑da xiʼin xa taxnuni Cristu,
a ñaʼa.
Ma ku kuu‑ia Ia ña ndaku nuu‑n.
Dandeʼa ñaʼa‑ia meʼñu mee‑n xa yo ndaku‑ia,
te dandeʼa ñaʼa‑ia xa jaʼan mee‑da tnuʼu n‑taxi mee‑ia.
4 Na n‑ka xatakaa‑s Cristu,
ña ndaku‑ia,
ña n‑dandeʼa‑ia ñayiu xa taxnuni‑ia.
Ko tuu‑ia vitna,
xiʼin xa taxnuni Ianyuux.
Mee‑da tuku.
Juini kunduu‑da xiʼin Cristu,
ko ña ndaku‑da,
ñatu dandeʼa ñaʼa‑da xa taxnuni‑da.
Ko xiʼin xa taxnuni Ianyuux kutuu‑da,
xa ku kuu‑da se xinokuechi nuu‑n.
5 Io xa kototnuni koio‑n mee‑n,
nux jandixa‑n Cristu,
a ñaʼa.
Kototnuni naʼi koio ka‑n mee‑n.
¿Ña ka kutnuni ini‑n xa tuu Jesucristu anu‑n a?
Nux ña yoo‑ia anu‑n,
duʼa naʼa‑n xa ña jandixa‑n‑ia.
6 Io‑da confianza xa kutnuni ini koio‑n xa jaʼan‑da xiʼin xa taxnuni Cristu.
7 Xijan taʼu‑da nuu Ianyuux xa maxku kada koio‑n xa uʼu.
Ñadu xa juini‑da xa jini koio ñayiu xa kida mee‑da xavaʼa.
Nux koo xa kani ini koio ñayiu xa ña kuaʼa‑da xa taxnuni‑da nuu‑n,
ko vatuka.
Diko ni juini‑da xa kada koio mee‑n xavaʼa.
8 Nux xandaa kuu xa ka kida‑n xavaʼa,
te ma ndoñuʼu xa taxnuni‑da nuu‑n.
Chi diko ni taxnuni‑da nuu‑n xa kada koio‑n xavaʼa.
9 Kuvete‑da hora unu ndaku mee‑n.
Kuvete‑da hora ka kida‑n xavaʼa.
Te kuvete‑da,
xa duʼa ña ndaku mee‑da.
Kuvete‑da,
xa ña ndoñuʼu xa taxnuni‑da nuu‑n.
10 Xijan kuu xa kidavaʼa‑da nuu‑n,
nɨni ña yoo‑da xiʼin‑n,
xa hora na kutuu‑da xiʼin‑n,
te ma ndoñuʼu xa ndundeʼe‑da nuu‑n xiʼin xa taxnuni n‑taxi Xtoʼo‑ro Jesucristu.
N‑taxi‑ia xa taxnuni‑ia,
xa chindee ñaʼa‑da,
ñadu xa danaa ñaʼa‑da.
11 Ñani‑da kuʼa‑da,
na kuvete koio‑n.
Juejoon koio‑n xa kadatniu Espíritu Ianyuux anu‑n,
xa ku kuu koio‑n ñayiu ka kida xavaʼa.
Juña tnaʼa‑n tnuʼu kanu ini.
Kani ini koio ɨɨn nuu‑n,
te kutuu mani koio‑n,
ɨɨn‑n xiʼin ɨnka‑n.
Te juemani ñaʼa Ianyuux mee‑n,
te kada‑ia xa kutuu vaʼa koio‑n.
12 Tnɨtnandaʼa‑n,
ntdaa mee‑n,
xa dandeʼa tnaʼa‑n xa xemani tnaʼa‑n.
13 Ntdaa ñani‑ro kuʼa‑ro ka jandixa Jesucristu ka tundaʼa xanyuux nuu‑n.
14 Na taxi xtoʼo‑ro Jesús xamani‑ia nuu‑n.
Na juemani ñaʼa Taa‑ro Ianyuux.
Na kunduu naʼi Espíritu Ii xiʼin‑n ntdaa‑n.
Duʼa na koo.