N‑xeʼen Spalu nuu tuu Ianyuux
12
Ña tuu nax niʼi‑da,
xa jaʼan vaʼa‑da xaxeʼe‑da.
Jaʼan‑da nax n‑kida Xtoʼo‑ro Jesucristu.
N‑datu ini ñaʼa‑ia,
n‑dandeʼa ñaʼa‑ia mee‑ia xiʼin xa taxnuni‑ia.
2 Xini‑da ɨɨn seyɨɨ kunduu xiʼin Cristu.
Xá n‑kuu uxi koon kuia n‑tnɨɨ Ianyuux mee‑s,
xa n‑xeʼen‑s xiʼin‑ia nde andɨu nuu tuu‑ia.
Ña xini‑da nux n‑xeʼen yɨkɨ kuñu‑s,
o meni anu‑s.
Ko Ianyuux naʼa nax n‑kuu.
3-4 Xini‑da xa ndeka Ianyuux se ijan n‑xeʼen nde andɨu,
nuu nani paraíso.
Ña xini‑da nux n‑xeʼen yɨkɨ kuñu‑s,
o meni anu‑s.
Naʼa Ianyuux nax n‑kuu,
ko ña xini mee‑da.
Te ijan n‑teku‑s tnuʼu ña kuaʼa xa jaʼan‑s,
chi ña n‑xejoon Ianyuux xa jaʼan‑s tnuʼu jan.
5 Jaʼan vaʼa‑da,
xaxeʼe ɨɨn seyɨɨ kuu ná kuu se ijan,
ko xaxeʼe mee‑da,
ma jaʼan vaʼa‑da.
Xaxeʼe mee‑da,
jaʼan ni‑da xa ña ndaku‑da xa kada‑da tniu n‑taxi Ianyuux.
6 Nux n‑juini‑da xa najuen tnuʼu‑da mee‑da n‑kuu,
kuaʼa‑da,
ko dani ma ku kuu‑da se lilu,
chi xandaa jaʼan‑da.
Ko duʼa ñatu kida‑da,
nada kani ini vaʼa ka ɨɨn ñayiu xaxeʼe‑da.
Vaʼa ka xa kototnuni ñaʼa mee‑i,
mee‑da xiʼin tnuʼu‑da.
7 Vaʼa xa vaʼa xa n‑dandeʼa ñaʼa Ianyuux.
Xaxeʼe xa n‑xini‑da ɨɨn xavaʼa xa ña kuaʼa ñayiu xa jini‑i,
te n‑kida Ianyuux xa ña ndaku‑da.
N‑xejoon‑ia xa janñaʼa kuiʼna mee‑da.
Kuu ná kuu xa tuu ñaʼa ka‑i,
xiʼin ɨɨn iñu deen.
Duʼa n‑kida Ianyuux,
xa ña kuaʼa‑da xa najuen tnuʼu‑da mee‑da.
8 Uni vuelta n‑xijan‑da nuu Xtoʼo‑ro Jesucristu xa kineʼe‑ia iñu jan.
9 Ko n‑jaʼan‑ia:
“Xemani ñaʼa‑r mee‑n,
te xijan kuu xa ña tuu nax ndoñuʼu‑n.
Hora ña ndaku mee‑n,
te jini koio ñayiu xa chindee ñaʼa‑r xiʼin xa taxnuni mee‑r.”
Xijan kuu xa kuvete‑da hora jaʼan‑da xa ña ndaku‑da,
chi hora ña ndaku mee‑da,
tnɨɨ‑da xa tnɨɨ ka‑da xandaku Cristu.
10 Xijan kuu xa juini ña ndaku‑da,
ko kuvete‑da.
Juini kuiʼa ka jaʼan ñayiu nuu‑da,
ko kuvete‑da.
Juini kueʼe vida yaʼa‑da,
ko kuvete‑da.
Juini ka xini uʼu ñaʼa ñayiu,
ko kuvete‑da.
Juini ña kuaʼa‑da xa kada‑da xa juini‑da,
ko kuvete‑da.
Kuvete‑da xaxeʼe Cristu.
Xaxeʼe mee‑ia,
nahora ña ndaku‑da,
hora ijan,
taxi‑ia xandaku mee‑ia.
Yo ndu ini Spalu
11 Xá n‑kuu‑da ɨɨn se lilu.
Xá n‑jaʼan vaʼa‑da xaxeʼe‑da,
ko mee‑n n‑ka kidajuexa ñaʼa.
N‑xio xa jaʼan vaʼa koio mee‑n xaxeʼe‑da,
ko ña n‑ka kida‑n.
Se ka jaʼan xa n‑tundaʼa Ianyuux mee‑s,
ña ka kunxaʼnu ka‑s dada mee‑da.
Juini ña yaʼu‑da ni ɨɨn,
ko ña kunxaʼnu ka mee‑s dada mee‑da.
12 Na n‑xo tuu‑da xiʼin‑n,
n‑dandeʼa ñaʼa Ianyuux xa kuu‑da ɨɨn se n‑tundaʼa‑ia.
N‑kida‑ia milagru xiʼin tniu kaʼnu ka,
xa ni ɨɨn ñayiu ma kuaʼa xa kada‑i.
N‑kida‑ia xa n‑ka yuʼu‑n te n‑ka kuvete‑n.
N‑kundee ini‑da,
nde n‑kida‑da tniu n‑taxi‑ia meʼñu‑n.
13 ¿Nakuenda ka xani ini‑n xa vaʼa ka ñani‑ro kuʼa‑ro ɨnka veñuʼu dada mee‑n?
¿Ka xani ini‑n xa n‑kida‑da xa uʼu nuu‑n,
hora ña n‑xejoon‑da xa kundeka ñaʼa koio‑n a?
Nux ka xani ini‑n xa n‑kida‑da xa uʼu nuu‑n,
¡io xa taxkanu ini ñaʼa koio‑n!
14 Io tuʼa‑da xa xee‑da ñuu‑n vuelta kuu uni,
ko ma juejoon‑da xa kundeka ñaʼa koio‑n.
Ña juini‑da xa niʼi‑da xaxii‑n.
Juini‑da xa niʼi ñaʼa‑da mee‑n.
Chi ña ndoñuʼu xa kunevaʼa sekuechi xaxii‑s xa kundeka‑s tadɨʼɨ‑s,
ndoñuʼu xa kunevaʼa sexaʼnu xaxii‑s xa kundeka‑s daʼya‑s.
15 Kuvete‑da xa kuvete‑da xa taxi‑da ntdaa xaxii‑da,
xiʼin ntdaa xa kuu‑da,
xaxeʼe‑n.
Ko kuu ná kuu xa ntnaʼa xemani ñaʼa ka‑da mee‑n,
da xini uʼu ñaʼa ka‑n mee‑da.
16 Ka xini‑n xa ña n‑xijan ñaʼa‑da ni ɨɨn.
¿Ka xani ini‑n xa se dandaʼu ñaʼa kuu‑da u?
¿Ka jaʼan‑s xa xijan‑da tvini xaxeʼe ñayiu kundaʼu te xetniu mee‑da tvini jan u?
17 ¿Ka xani ini‑n xa n‑tundaʼa‑da ñani‑ro,
xa na dandaʼu ñaʼa‑s mee‑n a?
18 N‑xijan‑da nuu Tito,
xa jɨʼɨn‑s ñuu‑n,
te n‑tundaʼa‑da ɨnka ñani‑ro xiʼin‑s.
¿N‑dandaʼu ñaʼa Tito mee‑n a?
N‑ka xini‑n xa n‑xani ini Tito ná n‑xani ini mee‑da,
te n‑kida mee‑s ná n‑kida mee‑da.
19 Ka xani ini‑n xa mee‑da dadaʼan‑da xa duʼa jaʼan‑da,
ko ña ndaa.
Kunduu‑da xiʼin Cristu,
te jaʼan‑da xandaa nuu Ianyuux.
Ñani mani‑da,
kuʼa mani‑da,
ntdaa xa kida‑da,
kida‑da xa kunduu naʼi koio ka mee‑n xiʼin Cristu.
20 Yuʼu‑da,
nux xee‑da Corinto te naniʼi ñaʼa‑da ka kida‑n xa ña juini‑da.
Yuʼu‑da xa naniʼi ñaʼa mee‑n xa kuu‑da xa ña ka juini‑n.
Yuʼu‑da,
xa ka jantnaʼa‑n,
ɨɨn‑n xiʼin ɨnka‑n,
te kukuedi ini nuu tnaʼa‑n.
Yuʼu‑da,
xa ka kiti ini‑n,
te ka kida‑n,
ɨɨn ɨɨn‑n,
xa ka juini mee‑n.
Yuʼu‑da,
xa ka jan loko ka jan duʼa‑n,
te ka jan tnuʼu tnaʼa‑n.
Yuʼu‑da,
xa kuxee ini‑n,
te nuu dɨɨn ka kuu‑n.
21 Yuʼu‑da,
xa hora xee‑da ñuu‑n,
te kada Ianyuux xa kujanuu‑da xaxeʼe‑n ɨnka vuelta.
Yuʼu‑da,
xa tnau ini‑da xaxeʼe ñayiu xtuu meʼñu mee‑n,
ñayiu n‑ka kida kuechi te nuncas ña n‑ka natu ini‑i kuechi‑i.
Xá n‑ka kida‑i xa ñatu kuu xavaʼa,
xá n‑ka kidi‑i xiʼin ñayiu ña n‑tnundaʼa xiʼin‑i,
xá n‑ka kida‑i ntdaa xa uʼu n‑ka kukajan ini‑i.