Se ka jaʼan xa Ianyuux n‑tundaʼa mee‑s, ko ña ndaa
11
¿Ka xani ini‑n xa jaʼan‑da ná jaʼan ɨɨn se lilu a?
Ko io xa kunini naʼi koio ka‑n.
Joon,
kundetu kuee koio‑n.
2 Xá n‑kida Ianyuux xa yo vaʼa xemani ñaʼa‑da.
Ná kida ɨɨn seyɨɨ nuu daʼya dɨʼɨ‑s hora tnundaʼa‑i,
da n‑kida ñaʼa‑da mee‑n.
N‑xiaʼan‑da tnuʼu‑da nuu Cristu,
xa juñaʼa‑da mee‑n nuu mee‑ia.
Te juini‑da xa ku kuu koio‑n ná kuu ɨɨn dichi luchi vaʼa tnundaʼa xiʼin idini seyɨɨ.
3 Ko ndu ini‑da xaxeʼe‑n.
Io seyɨɨ ka juini xa kada maxu ñaʼa‑s.
Dandaʼu ñaʼa‑s mee‑n,
ná n‑dandaʼu kuiʼna Eva.
N‑jaʼan kuiʼna tnuʼu vete,
ko ña n‑kutnuni ini Eva xa tnuʼu vete n‑kuu.
Juini‑da xa vaʼa kutnuni ini koio mee‑n.
Juini‑da xa juemani koio‑n Cristu,
juini‑da xa jandixa koio‑n‑ia xiʼin ntdaa anu‑n.
4 Se ijan,
tuku kachitnuʼu‑s Jesús,
ka dama‑s‑ia.
N‑ka tnɨɨ mee‑n Espíritu Ianyuux.
Se ijan ka kida xa dandoo‑n Espíritu Ianyuux,
xa kada‑n xa juini kuiʼna.
N‑ka tnɨɨ mee‑n tnuʼu Jesucristu.
Ɨnka tnuʼu kachitnuʼu‑s nuu‑n,
te ka xejoon‑n.
Davaʼa nga se vaxi,
te ka xeka vaʼa‑n‑sɨ.
Te ndu ini‑da xa nada ñaʼa kueka vaʼa koio‑n tnuʼu ka jaʼan‑s.
5 Ka jaʼan‑s xa kunduu‑s xiʼin Cristu,
ka jaʼan‑s xa se n‑tundaʼa Ianyuux ka kuu‑s.
Vaʼa xa vaʼa ka najuen tnuʼu‑s mee‑s.
Jaʼan mee‑da xa ñatu kunxaʼnu ka mee‑s dada mee‑da.
6 Juini ña jaʼan vivo‑da,
ko kutnuni ini vaʼa‑da xa jaʼan‑da.
Kɨu xiʼin kɨu,
ntdaa xa kida‑da,
n‑dandeʼa ñaʼa‑da xa kutnuni ini vaʼa‑da tnuʼu vaʼa Jesucristu.
7 Nuncas ña n‑jen yaʼu‑da na n‑kachitnuʼu‑da tnuʼu Ianyuux.
N‑ka niʼi mee‑n xa kutuu vaʼa koio‑n xiʼin Ianyuux,
ko n‑xo kundaʼu n‑xo kukee mee‑da.
¿Ka xani ini‑n xa xaʼa kuu xa n‑kida‑da xa uʼu nuu‑n a?
8 Kuu ná kuu xa n‑duʼu‑da ñani‑ro kuʼa‑ro ɨnka veñuʼu,
xa ma ndoñuʼu xa kajan‑da nuu mee‑n xa kundeka ñaʼa‑n.
9 Na n‑xo tuu‑da xiʼin‑n,
juini n‑ndoñuʼu ka‑da,
ko ni ɨɨn xa ña n‑xijan‑da nuu‑n.
Na n‑ka xee ñani‑ro Macedonia,
n‑ka taxi nga mee‑s ntdaa xa ndoñuʼu‑da.
Kɨu ijan ña n‑xijan‑da ni ɨɨn,
te vitna ma kajan‑da ni ɨɨn.
10 Ná n‑jaʼan Cristu xandaa,
da jaʼan mee‑da xandaa.
Juini‑da xa ni ɨɨn ñayiu distrito Acaya,
maxku jaʼan xa n‑xo ndeka ñaʼa‑i.
11 Te,
¿nakuenda xa duʼa jaʼan‑da?
¿Xaxeʼe xa ñatu xemani ñaʼa‑da mee‑n a?
¡Ñaʼa!
Naʼa Ianyuux xa yo xemani ñaʼa‑da mee‑n.
12 Ko ná kida‑da vitna,
duʼa kada naʼi ka‑da,
xa ma kuaʼa xa jaʼan koio se ijan xa kuu mee‑s ná kuu mee‑da.
13 Ña n‑tundaʼa Cristu mee‑s.
Ka dandaʼu‑s ñayiu.
Ka jaʼan‑s xa ka kuu‑s se n‑tundaʼa Cristu,
ko ña ndaa.
14 Mee kuiʼna kida xa kaa‑i ná kaa ángel,
ia xinokuechi nuu Ianyuux,
ia vaxi xiʼin xadiñu Ianyuux.
15 Te dɨuni,
¿nakuenda ka xani ini‑n xa ma kada koio se ijan ná ka kida‑s?
Se xinokuechi nuu kuiʼna ka kuu‑s,
te ka kida‑s xa kaa‑s ná kaa se kida xavaʼa.
Ko nani ka kida‑s,
dani ndadandaa ñaʼa Ianyuux mee‑s.
Ntdaa vida n‑yaʼa Spalu
16 Ɨnka vuelta jaʼan‑da xa maxku kani ini koio‑n xa n‑nduloko‑da.
Ko nux ka xani ini‑n xa n‑nduloko‑da,
ko kundetu koio‑n,
na jaʼan‑da ná jaʼan ɨɨn se lilu.
Juejoon koio‑n xa na najuen tnuʼu‑da mee‑da itaʼu ni.
17 Vitna,
ñatu jaʼan‑da tnuʼu Xtoʼo‑da.
Diko ni najuen tnuʼu‑da mee‑da,
ná jaʼan ɨɨn se n‑nduloko.
18 Io kueʼe ñayiu ka najuen tnuʼu mee‑i ñuñayiu yaʼa.
Te dani daña,
¿nax kuu xa na najuen tnuʼu‑da mee‑da?
19 Andix ka kuu se kutnuni ini vaʼa,
te kundee ini koio‑n nuu se n‑nduloko.
20 Nux ka kida‑s xa ka kuu‑n se kidatniu duʼa nuu mee‑s,
dani xndetu kuee‑n nuu‑s.
Nux ka xetniu ñaʼa duʼa‑s,
te ña tuu nax ka jaʼan mee‑n.
Nux ka dandaʼu ñaʼa‑s xiʼin tnuʼu‑s,
te kidajuexa ñaʼa‑s xa kada koio‑n xa juini mee‑s,
te ka xejoon‑n.
Nux se taxnuni nuu‑n ka kuu‑s,
ko vatuka.
Nux ka katu‑s nuu‑n,
ko dani ka xeka vaʼa‑n‑sɨ.
21 ¡Kujanuu‑da nuu‑n,
xa ña n‑ndundeʼe mee‑da nuu‑n,
ná n‑ka kida ñaʼa mee‑s!
Jaʼan‑da ná jaʼan ɨɨn se lilu.
Nux ka jaʼan vaʼa mee‑s xaxeʼe mee‑s,
te jaʼan vaʼa mee‑da xaxeʼe mee‑da tuku.
22 ¿Ka jaʼan‑s xa ka kuu‑s se Israel a?
Mee‑da tuku.
¿Ka jaʼan‑s xa ka kuu‑s daʼya taxaʼnu tnetnu‑s Abraham a?
Mee‑da tuku.
23 ¿Ka jaʼan‑s xa ka kuu‑s se xinokuechi nuu Cristu a?
Jaʼan‑da ná jaʼan ɨɨn se n‑nduloko,
ko jaʼan‑da xa kuu‑da ɨɨn se xinokuechi yo vaʼa ka dada mee‑s.
Kueʼe ka n‑kidatniu mee‑da dada mee‑s.
Xaxeʼe Cristu,
n‑yɨndiʼu‑da vekaa kueʼe ka vuelta dada mee‑s.
Kueʼe ka vuelta n‑ka janñaʼa ñayiu mee‑da dada mee‑s.
Kueʼe vuelta xaku nga kuú‑da.
24 Oʼon vuelta n‑ka janñaʼa sexaʼnu Israel cuarta ñɨɨ.
Ɨɨn ɨɨn vuelta n‑ka janñaʼa‑s oko xaun koon vuelta.
25 Uni vuelta n‑ka janñaʼa soldado romano bastón.
Ɨɨn vuelta n‑ka janñaʼa ñayiu yuú,
xa kaʼni ñaʼa‑i.
Uni vuelta nduxi barcu nuu juaʼan‑da ndute mar.
Te oko koon hora n‑kundee ini‑da nuu ndute.
26 Kueʼe vuelta n‑xikonuu‑da ñuu xiʼin ñuu,
te n‑xio kueʼe xa n‑kida xa yuʼu‑da.
N‑yaʼa‑da deʼva naʼnu.
N‑yaʼa‑da nuu io ñaduʼu.
N‑ka xini uʼu ñaʼa ñayiu Israel,
te n‑ka xini uʼu ñaʼa ñayiu ña ka kuu ñayiu Israel.
N‑yaʼa‑da ñuu naʼnu,
n‑yaʼa‑da yuku,
n‑yaʼa‑da nuu ndute mar.
N‑ka xini uʼu ñaʼa se ka dandaʼu ñayiu,
se ka jaʼan xa ka kuu‑s ñani‑ro,
ko ña ndaa.
27 Yo ndeʼe n‑xo kidatniu‑da,
te kueʼe vida n‑xo yaʼa‑da.
Io kɨu ni ña n‑xo kidi‑da.
N‑xo kojon‑da.
N‑xo yichi‑da ndute.
Kueʼe vuelta ña n‑xio tiempo xa kaxi‑da,
xa chindee‑da ɨnka ñayiu.
N‑xo kuvixi‑da,
te ña n‑xio daʼma‑da.
28 Kɨu xiʼin kɨu kueʼe vida yaʼa yɨkɨ kuñu‑da,
ko dɨuni kueʼe vida yaʼa anu‑da,
xaxeʼe xa ndu ini‑da xaxeʼe ñani‑ro xiʼin kuʼa‑ro ntdaa veñuʼu.
29 Nux ɨɨn ñayiu ña kundee ini xa jandixa naʼi ka‑i Xtoʼo‑ro Jesucristu,
te juini‑da xa nujuiin‑da diñi‑i,
xa juñaʼa‑da tnuʼu kanu ini nuu‑i.
Nux ɨɨn ñayiu ndua xa kida‑i xa uʼu,
te kujanuu mee‑da,
te tnau ini mee‑da.
30 Nux io xa jaʼan vaʼa‑da xaxeʼe‑da,
jaʼan‑da xa ña ndaku‑da.
31 Naʼa Ianyuux xa ña jaʼan‑da tnuʼu vete.
Kuu‑ia Taa Xtoʼo‑ro Jesucristu.
Na juñaʼa‑ro xa n‑kutaʼu‑ro nuu‑ia,
kuia ma jɨn ndɨʼɨ.
32 Na n‑xo tuu‑da ñuu nani Damasco,
te n‑nanduku ñaʼa gobernador.
N‑kidatniu‑s nuu se kunxaʼnu ka nani Aretas.
N‑taʼu tniu‑s soldado‑s,
xa kadɨ koio‑s yeʼe ñuu Damasco,
xa tnɨɨ presu ñaʼa‑s mee‑da.
33 Ko ñani‑ro n‑ka dakeé ñaʼa xiti ɨɨn yɨka kaʼnu,
te n‑ka nune ñaʼa‑s ɨɨn ventana xeveʼe kaʼnu ñuu jan,
te duʼa n‑kuu xa n‑kaku‑da.