Mee‑da, Spalu, se n‑tundaʼa Ianyuux kuu‑da
10
Mee‑da,
Spalu,
xijan‑da nuu‑n,
xa maxku daxio koio‑n tnuʼu‑da.
Ná n‑jandixa Cristu Taa‑ia Ianyuux,
da jandixa mee‑da Ianyuux.
Se vaʼa n‑kuu Cristu,
se ñatu n‑kuxee ini nuu Ianyuux.
Te duʼa kuu mee‑da.
Ka jaʼan‑s xa kundaʼu kukee‑da nuu‑n hora tuu‑da xiʼin‑n,
te ka jaʼan‑s xa yo ndundeʼe‑da nuu‑n hora xika tuu‑da.
2 Xijan‑da nuu‑n xa maxku kadajuexa ñaʼa koio‑n,
xa ndundeʼe‑da nuu se ka jaʼan xa kida‑da davaʼa nga xa juini‑da xa niʼi‑da xa juini‑da.
3 Xandaa kuu xa kuu‑da ɨɨn seyɨɨ,
ná kuu davaʼa nga ɨnka seyɨɨ,
ko ña jantnaʼa‑da ná jantnaʼa ɨnka seyɨɨ.
4 Jantnaʼa‑da,
ko ñatu xetniu‑da xa xetniu ñayiu ñatu ka jandixa Cristu.
Jantnaʼa‑da xiʼin xa taxnuni Ianyuux,
xa danaa‑da ntdaa xa kida xa ma jandixa koio ñayiu Ianyuux.
Kuu ná kuu xa danaa‑da ɨɨn cuartel a ɨɨn vekaa kaʼnu.
Dajane‑da xeveʼe,
danaa‑da ntdaa xa io.
5 Dandeʼa ñaʼa‑da xa ña ka xani ini vaʼa se ijan.
Dandeʼa ñaʼa‑da xa se najuen tnuʼu mee‑s ka kuu‑s,
se ñatu juini xa jini koio mee‑n Ianyuux.
Kada‑da xa dandoo koio‑n xaxtnuni mee‑s,
xa kada koio‑n xa juini Cristu.
6 Na kada koio mee‑n ná io ná juaʼan xa jandixa vaʼa koio‑n Cristu,
te io tuʼa mee‑da xa kada uʼu‑da ntdaa se ka kuxee ini.
7 Ka xini‑n nanda kaa xa xndeʼa‑n,
te ka xani ini‑n xa kutnuni ini‑n.
Nux xani ini ɨɨn ñayiu xa kunduu‑i xiʼin Cristu,
io xa najani ini‑i xa nani kunduu‑i xiʼin Cristu,
dani kunduu mee‑da xiʼin Cristu tuku.
8 Jaʼan‑da xa n‑taxi Xtoʼo‑ro xa taxnuni‑ia nuu mee‑da,
te n‑tundaʼa ñaʼa‑ia mee‑da nuu mee‑n.
Te ma kujanuu‑da xa duʼa jaʼan‑da.
Ña n‑taxi‑ia xa taxnuni‑ia xa danaa ñaʼa‑da,
n‑taxi‑ia xa taxnuni‑ia xa chindee ñaʼa‑da.
9 Ña juini‑da xa kani ini koio‑n xa kidavaʼa‑da carta nuu‑n xa dayuʼu ñaʼa‑da.
10 Xini‑da xa ka jaʼan‑s:
“Carta kidavaʼa Spalu kuu xa taxnuni‑s xiʼin xa ndaku‑s,
ko mee mee‑s ña ndaku‑s,
te ñatu xiniñuʼu tnuʼu jaʼan‑s.”
11 Ña kutnuni ini koio‑s xa nani kuu‑da hora tuu xika‑da,
dani ku kuu‑da hora kutuu‑da xiʼin‑n.
Xa kidavaʼa‑da xiʼin xa kada‑da,
ɨɨn nuu kuu.
12 Ña kuaʼa‑da xa dadavatnaʼa‑da xiʼin se jaʼan vaʼa mee‑s.
Ka chikuʼa tnaʼa‑s mee‑s,
ka dadavatnaʼa‑s mee‑s.
Duʼa kuu xa xa lilu ka kida‑s.
13 Na n‑taxi Ianyuux tniu‑da,
n‑tundaʼa ñaʼa‑ia mee‑da nde Corinto.
Nux jaʼan vaʼa‑da,
jaʼan vaʼa‑da xaxeʼe tniu n‑taxi Ianyuux.
14 Kidatniu‑da xiʼin mee‑n,
xaxeʼe xa n‑tundaʼa ñaʼa Ianyuux nuu‑n.
Kiʼna ka mee‑da n‑xee nde ñuu‑n,
xa kachitnuʼu‑da tnuʼu Jesucristu.
15 Ñatu ka najuen tnuʼu‑da mee‑da xaxeʼe tniu n‑ka kida ɨnka ñayiu.
Xndetu‑da,
xa hora jandixa vaʼa koio ka mee‑n,
dani kadatniu koio ka mee‑da meʼñu mee‑n.
16 Te dada juña tnuʼu‑da tnuʼu Jesucristu nuu ñayiu xtuu xika ka dada mee‑n.
Chi ma najuen tnuʼu‑da mee‑da xaxeʼe tniu ka kida ɨnka ñayiu.