Ɨɨn tratu xee
3
Hora jaʼan‑da xaʼa te,
¿ka xani ini‑n xa kixeʼe‑da xa najuen tnuʼu‑da mee‑da ɨnka vuelta?
¿Io xa dandeʼa ñaʼa‑da ɨɨn tutu jaʼan xa ñayiu vaʼa kuu‑da u?
¿O io xa kajan‑da xa kadavaʼa koio mee‑n tutu jan xaxeʼe‑da u?
Chi duʼa ka kida dava ñayiu.
2 Mee‑n ka kuu tutu jaʼan vaʼa xaxeʼe‑da nuu ñayiu.
Xá n‑kida Ianyuux xa vaʼa xemani ñaʼa‑da.
Te ntdaa ñayiu xini xaʼa,
te kaʼu‑i tutu jan.
3 Mee‑n ka kuu tutu n‑kidavaʼa Cristu.
Mee‑da,
diko ni n‑ka kachitnuʼu‑da tnuʼu vaʼa‑ia.
N‑kidavaʼa Cristu tnuʼu‑ia anu‑n.
Xiʼin tinta ña n‑kidavaʼa‑ia,
n‑kidavaʼa‑ia xiʼin Espíritu Ii.
Te Espíritu Ii kuu Espíritu Ianyuux Ndito.
Ña n‑kidavaʼa‑ia nuu yuú,
n‑kidavaʼa‑ia xiti anu ñayiu.
4 Xaxeʼe xa jandixa‑da Cristu,
io‑da confianza nuu Ianyuux xa duʼa kuu.
5 Meni mee‑da,
ña kuaʼa‑da xa kada‑da ni ɨɨn.
Ntdaa xa kida‑da,
kida‑da xaxeʼe xamani Ianyuux.
6 N‑kida Ianyuux ɨɨn tratu xee,
te dada n‑kida‑ia xa juñaʼa mee‑da tnuʼu vaʼa jan nuu ñayiu.
Ñadu xa io xa jandixa‑ro tnuʼu taʼu tniu Moisés,
kuu xa kada‑ro xa juini Espíritu Ianyuux.
Chi tnuʼu taʼu tniu Moisés kida xa kuú‑ro xiʼin kuechi‑ro,
ko kida Espíritu Ianyuux xa kutuu vaʼa‑ro xiʼin Ianyuux kuia ma jɨn ndɨʼɨ.
7 Na n‑tnɨɨ Moisés tnuʼu taʼu tniu,
tnuʼu n‑kidavaʼa Ianyuux nuu uu yuú ijan,
te ndii xa ndii nuu Moisés.
Ndii nuu‑s xaxeʼe xa n‑nanitnaʼa‑s xiʼin Ianyuux.
Te xaxeʼe xadiñu jan,
ña n‑kuaʼa ñayiu Israel xa kundeʼa koio‑i nuu‑s.
Ko dada,
kuee ni kuee ni n‑xe ndɨʼɨ xadiñu jan.
Na n‑tnɨɨ Moisés tnuʼu taʼu tniu,
n‑xiaʼan‑sɨ xa n‑kutaʼu‑s nuu Ianyuux.
Te tnuʼu taʼu tniu kida xa kuú koio ñayiu xiʼin kuechi‑i.
8 Mee‑ro,
xá n‑ka tnɨɨ‑ro tnuʼu taxi Espíritu Ii.
Te yo vaʼa ka xa vaʼa ka tnuʼu taxi Espíritu Ii dada tnuʼu taʼu tniu n‑tnɨɨ Moisés.
Xijan kuu xa xiaʼan‑ro xa n‑kutaʼu‑ro nuu Ianyuux.
9 Vaʼa xa vaʼa tnuʼu taʼu tniu,
ko kida tnuʼu taʼu tniu xa kuú koio‑ro xiʼin kuechi‑ro.
Vaʼa ka xa vaʼa ka xa jaʼan Ianyuux xa ña tuu na kuechi‑ro io,
xaxeʼe xa jandixa‑ro tnuʼu vaʼa Jesucristu.
10 Yo vaʼa tnuʼu taʼu tniu,
ko ná kuu xa ñatu xiniñuʼu ka,
nux dadavatnaʼa‑ro xiʼin tnuʼu vaʼa Jesucristu.
11 Chi nux vaʼa xa vax ndɨʼɨ,
yo vaʼa ka xa nuncas ma jɨn ndɨʼɨ.
12 Xaxeʼe xa ka xini‑da xa duʼa kuu,
xijan kuu xa ñatu ka kujanuu‑da xa jaʼan kaxi‑da.
13 Ñatu ka kida mee‑da ná n‑xo kida Moisés,
xa n‑xo dadaʼu‑s nuu‑s ɨɨn daʼma,
xa maxku jini koio ñayiu Israel xa vax ndɨʼɨ xadiñu nuu‑s.
14 Ko ñayiu jan,
ñatu duʼa n‑ka kutnuni ini‑i.
Te nde vitna,
hora ka kaʼu ñayiu Israel tnuʼu taʼu tniu,
te kuu ná kuu xa dani daʼu nuu‑i daʼma jan,
xa ma kutnuni ini koio‑i.
Chi io xa jandixa ɨɨn ñayiu Cristu,
te dada dita Cristu daʼma jan.
15 Nde vitna,
ñatu ka kutnuni ini‑i.
Ka kaʼu‑i tnuʼu taʼu tniu n‑xiaʼan Ianyuux nuu Moisés,
ko ñatu ka kutnuni ini‑i nax jaʼan.
16 Ko nux jandixa ɨɨn ñayiu Xtoʼo‑ro Jesucristu,
te xikojuiin daʼma jan nuu‑i.
17 Te ɨɨn nuu kuu Xtoʼo‑ro Jesucristu xiʼin Espíritu Ii.
Ɨɨn ñayiu,
nux kidatniu Espíritu Xtoʼo‑ro Jesucristu anu‑i,
te duʼa tuu vaʼa‑i xiʼin Ianyuux.
18 Xijan kuu xa ntdaa mee‑ro,
ñatuka daʼu nuu‑ro daʼma jan.
Kuu‑ro ná kuu ɨɨn spejo nuu kixee dɨnduʼa Ianyuux te xeyeʼe nuu ɨnka ñayiu.
Te dɨuni,
dama ñaʼa‑ia mee‑ro.
Tnɨɨ‑ro xa tnɨɨ‑ro xadiñu‑ia,
te duʼa dama ñaʼa‑ia mee‑ro,
xa ku kuu‑ro ná kuu Cristu.
Xaʼa kuu xa kida Espíritu Xtoʼo‑ro Jesucristu.