4
Xaxeʼe xa n‑kundau ini ñaʼa Ianyuux mee‑da,
n‑taʼu tniu‑ia xa daña juña tnuʼu tnuʼu Jesucristu nuu ñayiu,
te xijan kuu xa ña kuita anu‑da.
2 Daxio‑da ntdaa xa yɨdaʼu,
xiʼin ntdaa xa kada xa kujanuu‑da nuu ñayiu xiʼin nuu Ianyuux.
Ña dandaʼu‑da ñayiu,
ñatu dama‑da tnuʼu Ianyuux.
Ka xini ntdaa ñayiu xa jaʼan‑da xandaa,
te jaʼan ndaa anu‑i xa kuu‑da se jaʼan xandaa.
Te naʼa Ianyuux nax kida‑da,
te teku‑ia nax jaʼan‑da.
3 Xian tnuʼu‑da tnuʼu Jesucristu nuu ñayiu.
Nux ñatu ka kutnuni ini ñayiu tnuʼu jan,
kuu xaxeʼe xa ña ka juini‑i xa jandixa‑i Cristu.
4 Xaxeʼe xa ña ka juini‑i,
te xadɨ kuiʼna anu‑i,
xa maxku kutnuni ini koio‑i tnuʼu Jesucristu.
Taxnuni kuiʼna nuu ñuñayiu vitna,
te kida‑i xa ñatu ka xini ñayiu xa n‑kida Cristu xaxeʼe‑ro.
Ia kunxaʼnu ka kuu Cristu,
te ná kuu ɨɨn xa diñu xa diñu kuu tnuʼu vaʼa‑ia.
Ko ñatu ka xini ñayiu xa n‑tundaʼa Ianyuux Cristu,
xa taxnuni‑ia nuu ntdaa xa io,
ñatu ka xini‑i xa nani kuu Ianyuux dani kuu Cristu tuku.
5 Ñatu kachitnuʼu‑da tnuʼu Jesucristu,
xa kunduu koio‑n xiʼin mee‑da,
kachitnuʼu‑da tnuʼu Jesucristu,
xa kunduu koio‑n xiʼin mee‑ia.
Jesucristu kuu Xtoʼo‑ro,
te mee‑da ka kuu se xinokuechi nuu mee‑n,
xaxeʼe xa xemani‑da Jesús.
6 Ná n‑taʼu tniu Ianyuux xa ndii ngandii nuu nee,
xa kuaʼa‑ro xa kundeʼa‑ro xa io ñuñayiu yaʼa,
da n‑tundaʼa Ianyuux Cristu ñuñayiu,
xa kuaʼa‑ro xa jini‑ro Ianyuux.
Hora xini‑ro nuu Jesucristu,
xini‑ro xadiñu Ianyuux,
xini‑ro xa Ia kunxaʼnu ka kuu‑ia,
Ia taxnuni nuu ntdaa xa io.
Ñayiu ka jandixa Cristu kuu‑ro
7 Xa n‑xini‑da xadiñu Ianyuux te xian tnuʼu‑da tnuʼu Jesucristu nuu ñayiu,
kuu ɨɨn xa vaʼa xa vaʼa xa ni ɨɨn ñayiu ña nevaʼa.
Ná kuu kɨdɨ ñuʼu ka kuu‑da.
Ña tuu na xadiñu mee‑da.
Meni xadiñu Ianyuux io.
Na juña tnuʼu‑da tnuʼu Jesucristu nuu ñayiu,
ma jini koio ñaʼa‑i mee‑da,
jini koio‑i xa taxnuni Ianyuux kunxaʼnu ka.
8 Juini kueʼe vida yaʼa‑da,
ko chindee ñaʼa Ianyuux xa kundee ini naʼi‑da.
Juini kueʼe xa da ndu ini ñaʼa,
ko ñatu kuita anu‑da.
9 Juini ka xini uʼu ñaʼa‑s,
ko ñatu dandoo ñaʼa Ianyuux.
Juini ka jantnaʼa‑s xiʼin‑da,
ko ma kaʼni ñaʼa‑s.
10 Kɨu xiʼin kɨu davaʼa nga ñuu nuu tuu‑da,
kuu ná kuu xa xiʼí mee‑da ná n‑xiʼí Jesús.
Ko n‑nandoto Jesús,
te kida‑ia xa dani tuu ka mee‑da.
11 Xaxeʼe xa kunduu‑da xiʼin Cristu Jesús,
te kɨu xiʼin kɨu ka juini ñayiu xa kaʼni ñaʼa‑i.
Hora xini ñaʼa ñayiu mee‑da,
xini‑i xa kida Jesús xa tuu naʼi ka mee‑da ná tuu naʼi ka mee‑ia.
12 Xijan kuu xa xiʼí mee‑da,
xa kutuu vaʼa koio mee‑n xiʼin Ianyuux.
13 Jaʼan tnuʼu Ianyuux:
“N‑jandixa‑r.
Xijan kuu xa n‑jaʼan‑r.”
Mee‑da tuku.
Io‑da confianza nuu Ianyuux.
Jandixa‑da tnuʼu vaʼa,
tnuʼu Jesucristu.
Xijan kuu xa xian tnuʼu‑da tnuʼu jan nuu ñayiu.
14 Xini‑da xa ná n‑nadandoto Ianyuux Xtoʼo‑ro Jesús,
dani nadandoto ñaʼa‑ia mee‑da tuku.
Ndoneʼe ñaʼa‑ia mee‑da xiʼin mee‑n,
xa kutuu‑ro,
nduu‑ro,
xiʼin Jesús nuu tuu Ianyuux kuia ma jɨn ndɨʼɨ.
15 Kundee ini‑da xaxeʼe mee‑n.
Kundee ini ka‑da,
xa kueʼe xa kueʼe ka ñayiu tnɨɨ koio xamani Ianyuux.
Te dada juñaʼa‑i xa juñaʼa‑i xa n‑kutaʼu‑i nuu Ianyuux,
xa ndadakaʼnu‑i xa ndadakaʼnu ka‑i mee‑ia.
16 Xijan kuu xa ña kuita anu‑da.
Juini kueʼe vida yaʼa‑da,
te ñatuka kundee vaʼa yɨkɨ kuñu‑da,
ko ña kuita anu‑da.
Kɨu xiʼin kɨu kida Ianyuux xa tuu vaʼa xa tuu vaʼa ka anu‑da.
17 Juini kueʼe vida yaʼa‑da vitna,
ko ña kuu ná kuu ɨɨn xa vee,
chi kida xa kutuu vaʼa‑ro mee‑n xiʼin mee‑da xiʼin Cristu kuia ma jɨn ndɨʼɨ.
Vax ndɨʼɨ xa yaʼa‑da kueʼe vida,
ko nuncas ma jɨn ndɨʼɨ xa kutuu vaʼa‑da xiʼin Cristu.
Ná kuu ɨɨn xa kutaʼu nga‑da kuu,
te ña tuu xa kaʼnu ka.
18 Xijan kuu xa ñatuka xini‑da nax io ñuñayiu.
Xini‑da nax io nuu tuu Cristu Jesús.
Vax ndɨʼɨ ntdaa xa io ñuñayiu,
ko nuncas ma jɨn ndɨʼɨ xa io nuu tuu Cristu Jesús.