5
Ná kuu ɨɨn veʼe todo ñuñayiu yaʼa,
kuu yɨkɨ kuñu‑ro.
Xini‑ro xa nux danaa koio‑s veʼe jan,
te nataxi Ianyuux ɨɨn veʼe xee andɨu.
Ɨɨn veʼe ña n‑kidavaʼa ndaʼa ñayiu,
ɨɨn veʼe nuu kutuu‑ro kuia ma jɨn ndɨʼɨ.
2 Nɨni tuu‑ro veʼe ñuñayiu yaʼa,
xenu ini‑ro,
chi kukajan ini‑ro xa tnɨɨ‑ro veʼe xee andɨu.
3 Kuu ná kuu xa ndunuu‑ro daʼma xee,
xa nuncas koo vichi‑ro.
4 Vitna tuu‑ro veʼe yaʼa xa kuu yɨkɨ kuñu‑ro,
xenu ini‑ro te kueʼe vida yaʼa‑ro.
Ñadu xa juini‑ro xa dandoo‑ro veʼe tuʼu,
chi juini‑ro xa tnɨɨ‑ro veʼe xee.
Xini‑ro xa ɨɨn kɨu kuú‑ro.
Ko hora tnɨɨ‑ro yɨkɨ kuñu xee,
dada nuncas ma kuú ka‑ro.
Kutuu vaʼa‑ro xiʼin Ianyuux andɨu kuia ma jɨn ndɨʼɨ.
5 N‑kida tuʼa ñaʼa Ianyuux mee‑ro xa duʼa kuu.
Te xá n‑taxi‑ia Espíritu Ii,
xa kutnuni ini‑ro xa duʼa kuu.
6 Xijan kuu xa ñatu kuita anu‑da.
Xa tuu naʼi ka‑da ñuñayiu yaʼa,
kuu xa ta xee ka‑da veʼe xee.
Na xee‑da nde ijan,
kutuu vaʼa‑da xiʼin Xtoʼo‑da.
7 Ñuñayiu yaʼa,
jandixa‑da‑ia,
ko ijan,
jini‑da‑ia nuu xiʼin nuu.
8 Xijan kuu xa ñatu kuita anu‑da.
Vaʼa ka xa jɨʼɨn‑da xa kutuu‑da xiʼin Xtoʼo‑da,
dada xa kutuu ka‑da yaʼa.
9 Xijan kuu xa kida‑da xa tna ini Xtoʼo‑da.
Nux kutuu ka‑da yaʼa,
a kutuu‑da xiʼin‑ia ijan,
ko juini‑da xa kada‑da xa tna ini mee‑ia.
10 Chi io xa kunujuiin‑ro,
ntdaa‑ro,
nuu Cristu.
Ndadandaa ñaʼa‑ia,
na dandeʼa ñaʼa‑ia ntdaa xa n‑kida‑ro na n‑xo tuu‑ro ñuñayiu yaʼa.
Nani n‑kida‑ro,
dani tnɨɨ‑ro.
Kada‑ia cuenta nuu ɨɨn ɨɨn‑ro,
nux n‑kida‑ro xavaʼa,
a n‑kida‑ro xa ñatu xiniñuʼu.
Maxku jantnaʼa koio ka‑n xiʼin Ianyuux
11 Xijan kuu xa,
xaxeʼe xa xini‑da xa io xa yuʼu koio ntdaa ñayiu nuu Ianyuux,
kidatniu‑da xa naxino ini ñayiu xa jandixa‑i Cristu.
Xini vaʼa Ianyuux nax kida‑da,
te xini‑da xa mee‑n tuku,
vaʼa ka xini‑n nax kida‑da.
12 Ñadu xa ɨnka vuelta jaʼan vaʼa‑da xaxeʼe mee‑da.
Xa juini‑da,
kuu xa kuaʼa koio mee‑n xa jaʼan vaʼa‑n xaxeʼe‑da nuu se kuiʼa jaʼan.
Xndeʼa‑s nanda kaa‑da,
ko ña ka xini‑s nax kuu anu‑da.
13 Nux n‑nduloko‑da,
nduloko‑da xaxeʼe Ianyuux.
Nux vaʼa xani ini‑da,
vaʼa xani ini‑da xaxeʼe mee‑n.
14 Xaxeʼe xa xemani ñaʼa Cristu mee‑da,
kida‑da ntdaa xa kida‑da.
Xini‑da xa n‑xiʼí mee‑ia xaxeʼe ntdaa ñayiu,
te xijan kuu xa kuu ná kuu xa ntdaa ñayiu n‑ka xiʼí.
15 N‑xiʼí‑ia xaxeʼe ntdaa ñayiu,
xa ñayiu ka jandixa mee‑ia,
mayo ka‑i kutuu koio xaxeʼe mee‑i,
ko kutuu koio‑i xaxeʼe mee‑ia.
16 Ñatuka jaʼan‑da nanda kaa ɨɨn ñayiu.
Nde Cristu,
juini tuku n‑xani ini‑da xaxeʼe‑ia,
ko vitna vaʼa xini‑da jundu kuu‑ia.
17 Ɨɨn ñayiu,
nux kunduu‑i xiʼin Cristu,
xá n‑ndada xee‑ia‑i.
Ntdaa xa n‑xo kuu‑i xá n‑yaʼa.
Xa kuu‑i vitna,
xa xee kuu.
18 Ntdaa xaʼa n‑kida Ianyuux.
Xa ka kida ñayiu kuechi,
kuu ná kuu xa ka jantnaʼa‑i xiʼin Ianyuux.
N‑tundaʼa Ianyuux Cristu,
xa kada‑ia xa kutuu mani koio ñayiu xiʼin Ianyuux.
N‑kida Cristu xa tuu mani mee‑da xiʼin Ianyuux,
te n‑tundaʼa ñaʼa‑ia xa juña tnuʼu‑da tnuʼu Jesucristu nuu ntdaa ñayiu,
xa mee‑i tuku kutuu mani koio‑i xiʼin Ianyuux.
19 Xa jaʼan‑da kuu xaʼa.
Na n‑xiʼí Cristu,
n‑kida Ianyuux xa kutuu mani Ianyuux xiʼin ñayiu ñuñayiu.
Nux jandixa ɨɨn ñayiu Cristu,
te matuka kada kuenda Ianyuux kuechi‑i.
N‑taxi Ianyuux tnuʼu Jesucristu nuu mee‑da,
xa juña tnuʼu‑da nuu ntdaa ñayiu,
xa kutuu mani koio ñayiu xiʼin Ianyuux.
20 Xijan kuu xa kuu‑da bajadori n‑tundaʼa Ianyuux xaxeʼe Cristu.
Hora xian tnuʼu‑da tnuʼu Jesucristu nuu ñayiu,
kuu ná kuu xa mee Ianyuux jaʼan nuu‑i.
Xaxeʼe Cristu xijan‑da:
“Maxku jantnaʼa koio ka‑n xiʼin Ianyuux.”
21 Cristu,
nuncas ña n‑kida‑ia ni ɨɨn kuechi.
N‑kida uʼu Ianyuux Cristu,
xa ma kuú mee‑ro xiʼin kuechi‑ro.
Xaxeʼe xa kunduu‑ro xiʼin Cristu,
te jaʼan Ianyuux xa ña tuu na kuechi‑ro io.