6
Xá n‑ka tnɨɨ‑n xamani taxi Ianyuux.
Ka kunduu‑n xiʼin Cristu Jesús.
Kidatniu‑da xiʼin Ianyuux,
xa kajan‑da nuu‑n xa kada koio‑n xa kada koio ka‑n xavaʼa.
2 Jaʼan tnuʼu Ianyuux:
Vaʼa tiempo n‑teku‑r tnuʼu‑n.
Kɨu ijan n‑chindee ñaʼa‑r,
xa kutuu vaʼa‑n xiʼin‑r.
Te jaʼan‑da nuu‑n xa vitna kuu tiempo vaʼa,
te vitna kuu kɨu chindee Ianyuux ñayiu,
xa kutuu vaʼa koio‑i xiʼin‑ia.
3 Kida‑da xavaʼa,
xa ni ɨɨn ñayiu ma ndua xaxeʼe ɨɨn xa kida mee‑da.
Kida‑da xavaʼa,
xa ni ɨɨn ñayiu ma kuaʼa xa kuiʼa jaʼan‑i xaxeʼe tniu kida‑da.
4 Ntdaa xa ka kida‑da,
juini‑da xa dandeʼa‑da nuu ñayiu xa Ianyuux kuu Xtoʼo‑da te ka kida‑da xa juini mee‑ia.
Juini kueʼe vida yaʼa‑da,
te kiti ini ñayiu nuu‑da,
te ka xini uʼu ñaʼa‑i,
ko kundee ini‑da.
5 Juini ka janñaʼa‑i,
te ka chindiʼu ñaʼa‑i vekaa,
ko kundee ini‑da.
Te kidatniu‑da nde n‑xiau loko‑da,
ko kundee ini‑da.
Juini ña tuu tiempo xa kidi‑da,
te n‑xo xio‑da doko,
ko kundee ini‑da.
6 Kida‑da xavaʼa.
Juini‑da xa jini ka‑da Ianyuux.
Ndetu kuee‑da nuu ñayiu.
Vaʼa‑da.
Kidatniu Espíritu Ii anu‑da.
Xemani‑da Ianyuux xiʼin ñayiu.
7 Xian tnuʼu‑da xa kuu xandaa.
Xiʼin xa taxnuni Ianyuux,
kida‑da xavaʼa.
Te xiʼin xavaʼa jan,
kuu ná kuu xa jantnaʼa‑da xiʼin ntdaa xa ña kuu xandaa.
Jantnaʼa‑da xiʼin ndaʼa kuaʼa‑da,
xiʼin ndaʼa datni‑da,
xa kundee‑da.
8 Uun tnee xndaxio ñayiu xañuʼu nuu‑da,
te uun tnee kuiʼa ka jaʼan ñaʼa‑i.
Uun tnee tekuechi ñaʼa‑i,
te uun tnee ka jaʼan‑i xa se vaʼa kuu‑da.
Ka jaʼan‑i xa dandaʼu‑da ñayiu,
ko jaʼan naʼi ka‑da tnuʼu Ianyuux,
tnuʼu xandaa.
9 Ka jaʼan ñayiu xa ña ka xini ñaʼa‑i,
ko vaʼa xini ñaʼa Ianyuux.
Io‑da xa kuú‑da,
ko na da tuu naʼi ka.
Ka xini uʼu ñaʼa‑i,
ko ta kaʼni ñaʼa ka‑i.
10 Juini tnau ini‑da,
ko kɨu xiʼin kɨu kida Ianyuux xa kuvete‑da.
Juini kundaʼu‑da,
ko xiaʼan‑da xaxii Ianyuux nuu kueʼe ka xa kueʼe ka ñayiu.
Juini ña tuu nax nevaʼa‑da,
ko xaxii‑da kuu ntdaa xa io.
11 Seyɨɨ,
ñadɨʼɨ ñuu Corinto,
ñani‑da kuʼa‑da,
xá n‑jaʼan kaxi‑da nuu‑n.
Vaʼa xa vaʼa xemani ñaʼa‑da mee‑n.
12 Ñatu ndiʼu anu‑da nuu‑n.
Ko mee‑n,
ndiʼu anu‑n nuu mee‑da.
13 Jaʼan‑da nuu mee‑n ná jaʼan ɨɨn seyɨɨ nuu daʼya kuechi‑s.
Xijan‑da xa juemani ñaʼa koio mee‑n,
ná xemani ñaʼa mee‑da mee‑n.
Ka kuu mee‑ro veñuʼu nuu tuu Ianyuux Ndito
14 Ná kuu uu ngutu ka yuku xa ña xika ɨɨn nuu‑tɨ,
kuu xa tuu‑ro xiʼin ñayiu ña kunduu xiʼin Cristu.
Maxku juejoon koio‑n xa ku kuu ɨɨn nuu‑n xiʼin ñayiu ña jandixa Cristu.
¿Nanda kuaʼa xa kunduu ɨɨn ñayiu xika nuu kanda,
xiʼin ɨɨn ñayiu xika nuu nee?
15 Nani ñatu xani ini ɨɨn nuu Cristu xiʼin kuiʼna,
dani ña kuaʼa xa kani ini ɨɨn nuu ñayiu jandixa Cristu xiʼin ñayiu ñatu jandixa‑ia.
16 Ña kuaʼa xa veñuʼu nuu tuu Ianyuux Ndito,
ku kuu ɨɨn nuu xiʼin santu n‑kidavaʼa ñayiu.
Io xa kutnuni ini koio‑n xa mee‑n kuu nuu tuu Ianyuux Ndito.
Jaʼan tnuʼu Ianyuux:
Kutuu‑r xiʼin ñayiu jan,
kaka mee‑r meʼñu mee‑i.
Ku kuu‑r Ianyuux ka jandixa‑i,
te ku kuu koio mee‑i ñayiu xemani‑r.
17 Dani jaʼan tnuʼu Ianyuux:
Maxku kada koio ka mee‑n,
ná ka kida ñayiu ñatu ka jandixa ñaʼa mee‑r.
Ku kuu koio mee‑n ñayiu dɨɨn nuu mee‑r.
Maxku tnɨɨ koio ka‑n xa kuiʼa kaa.
Te dada kueka vaʼa ñaʼa mee‑r mee‑n.
18 Te ku kuu mee‑r Taa‑n.
Te ku kuu koio mee‑n daʼya yɨɨ‑r xiʼin daʼya dɨʼɨ‑r.
Duʼa jaʼan Ianyuux taxnuni nuu ntdaa xa io.