7
Ñani mani‑da,
kuʼa mani‑da,
xá n‑tnɨɨ‑ro tnuʼu n‑taxi Ianyuux.
Xijan kuu xa na dandoo‑ro ntdantuʼu xa jaʼan Ianyuux xa kuiʼa kaa.
Na ku yuʼu‑ro nuu Taa‑ro Ianyuux te kada‑ro xa juini mee‑ia,
xa ndundoo yɨkɨ kuñu‑ro xiʼin xaxtnuni‑ro.
N‑ka natu ini ñayiu Corinto kuechi‑i
2 Kueka vaʼa ñaʼa‑n xiʼin ntdaa anu‑n.
Ña n‑kida‑da xa uʼu nuu‑n,
ni ɨɨn‑n.
Ña n‑kida‑da xa na kada ɨɨn‑n xa uʼu,
ña n‑dandaʼu ñaʼa‑da,
ni ɨɨn‑n.
3 Ñatu jaʼan‑da xaʼa xa tekuechi ñaʼa‑da.
Xá n‑jaʼan‑da xa xtuu‑n anu‑da.
Io tuʼa‑da xa kuú‑da xiʼin‑n a kutuu‑da xiʼin‑n.
4 Io‑da kueʼe confianza nuu‑n.
Najuen tnuʼu ñaʼa‑da nuu ntdaa ñayiu.
Juini kueʼe vida yaʼa‑da,
ko kukaʼnu anu‑da te yo kuvete‑da xaxeʼe‑n.
5 Na n‑kixee‑da Macedonia,
ña n‑kuaʼa‑da xa ndetatu‑da.
Kueʼe vida n‑yaʼa‑da.
Kɨu xiʼin kɨu ñayiu ña ka jandixa Cristu,
n‑ka jantnaʼa tnuʼu‑i xiʼin‑da.
Te n‑yuʼu anu‑da xaxeʼe mee‑n,
xa nada ñaʼa ma jandixa koio ka‑n.
6 Ko xiaʼan Ianyuux tnuʼu kanu ini nuu ñayiu kuita anu.
N‑taxi‑ia tnuʼu kanu ini nuu mee‑da,
na n‑kida‑ia xa n‑kixee Tito.
7 Kukaʼnu anu‑da,
xaxeʼe xa n‑kixee Tito,
ko dani kukaʼnu anu‑da,
xaxeʼe xa kukaʼnu anu mee‑s xaxeʼe mee‑n.
N‑jaʼan‑s xa ka kukajan ini‑n xa jini ñaʼa‑n.
N‑najani‑s xa ka tnau ini‑n.
N‑jaʼan‑s xa ka juini‑n xa jandixa koio‑n tnuʼu‑da.
Te xijan kuu xa n‑kuvete‑da xa n‑kuvete‑da.
8 Juini n‑kida‑da xa n‑ka tnau ini‑n,
xaxeʼe carta n‑kidavaʼa‑da,
ko n‑ndoñuʼu xa da kada‑da.
Juini n‑tnau ini‑da xaxeʼe carta jan,
ko ñatuka tnau ini‑da vitna.
Xini‑da xa n‑ka tnau ini‑n,
ko xaku ni kɨu.
9 Vitna kuvete‑da.
Ñatu kuvete‑da xaxeʼe xa n‑kida‑da xa n‑ka tnau ini‑n.
Kuvete‑da xa hora n‑ka tnau ini‑n,
n‑ka natu ini‑n kuechi‑n nuu Ianyuux.
N‑juini Ianyuux xa tnau ini koio‑n xaxeʼe kuechi‑n.
Nux ña n‑kidavaʼa‑da n‑kuu,
te dani kutuu‑n xiʼin kuechi‑n.
10 Xaxeʼe xa n‑ka tnau ini‑n xaxeʼe kuechi‑n ná n‑juini Ianyuux,
n‑ka natu ini‑n kuechi‑n nuu‑ia,
te n‑dakaku ñaʼa‑ia.
Te duʼa ñatuka ka tnau ini‑n.
Ñayiu ñatu jandixa Ianyuux,
juini tnau ini‑i,
ko ñatu xiniñuʼu,
te dani kuú koio‑i xiʼin kuechi‑i.
11 Kundeʼa koio‑n nax n‑yaʼa.
Xaxeʼe xa n‑ka tnau ini‑n ná n‑juini Ianyuux,
n‑ka kidatniu‑n xa kada koio‑n xavaʼa.
N‑ka jaʼan ndaa‑n xaxeʼe‑n.
N‑ka kiti ini‑n,
te n‑ka yuʼu‑n.
N‑ka kukajan ini‑n xa jini ñaʼa‑n mee‑da ɨnka vuelta,
te n‑ka xio anu‑n xa kada uʼu‑n se n‑kida xa uʼu.
Xiʼin ntdaa xa n‑ka kida‑n,
xá n‑ka dandeʼa ñaʼa‑n xa ka juini‑n xa kada koio‑n xavaʼa.
12 N‑kidavaʼa‑da nuu mee‑n,
xa dandeʼa tnaʼa mee‑n xa xandaa kuu xa kada koio‑n ná n‑jaʼan‑da.
Te ndeʼa Ianyuux xa da kada koio‑n.
13 Xijan kuu xa kukaʼnu anu‑da.
Kukaʼnu anu‑da,
ko dani yo kueʼe kuvete‑da,
xaxeʼe xa kuvete Tito.
N‑ka chindee‑n‑sɨ xa ñatuka yɨ ini‑s,
n‑ka kida‑n,
ntdaa‑n,
xa ndetatu anu‑s.
14 N‑jaʼan vaʼa‑da xaxeʼe mee‑n,
te n‑ka kida‑n xa ñatu kujanuu‑da.
Nani n‑jaʼan‑da meni xandaa nuu mee‑n,
dani n‑dandeʼa ñaʼa‑n mee‑da xa meni xandaa n‑jaʼan‑da nuu Tito,
hora n‑jaʼan vaʼa‑da xaxeʼe mee‑n.
15 Yo vaʼa xemani ñaʼa Tito mee‑n,
xaxeʼe xa najaʼan‑s nanda n‑ka jandixa‑n tnuʼu‑s.
Jaʼan‑s xa ña n‑ka kuxee ini‑n,
jaʼan‑s xa yo kueʼe n‑ka kukajan ini‑n xa kada koio‑n xavaʼa.
16 Kuvete‑da.
Io‑da ntdaa confianza nuu‑n.