Juñaʼa koio‑n jundu ndoñuʼu ka
8
Ñani‑da kuʼa‑da,
juini‑da xa jini koio mee‑n xamani n‑xiaʼan Ianyuux ñani‑ro kuʼa‑ro xtuu do Macedonia.
2 Juini kueʼe xa kueʼe vida ka yaʼa‑i,
ko dani kuvete‑i xa kuvete‑i.
Juini yo ndeʼe kundaʼu‑i,
ko n‑ka xiaʼan‑i xa n‑ka xiaʼan‑i nuu ñani‑ro xiʼin kuʼa‑ro xtuu ñuu Jerusalén.
3 Jaʼan ndaa‑da xa n‑ka xiaʼan‑i ntdaa xa n‑kuaʼa‑i,
te kueʼe ka.
4 Ñatu n‑xijan‑da xa juñaʼa‑i.
Mee‑i,
yo n‑ka xijan‑i xa kada‑da xamani xa juejoon‑da xa mee‑i tuku kunduu koio xiʼin‑da,
xa chindee‑i ñani‑ro kuʼa‑ro ndoñuʼu ka.
5 N‑xani ini‑da xa itaʼu ni xa juñaʼa‑i,
chi yo kundaʼu‑i.
Ko ñaʼa.
N‑ka kukajan ini‑i xa kada‑i ntdaa xa juini Ianyuux.
Ditna ka n‑xiaʼan‑i mee‑i nuu Ianyuux,
te dada n‑ka xio anu‑i xa kada‑i davaʼa nga xa kajan mee‑da.
6 Xijan kuu xa n‑xijan‑da nuu Tito xa chindee ñaʼa‑s mee‑n,
xa daxinokava koio‑n tniu n‑ka kixeʼe‑n,
na n‑xo tuu‑s xiʼin‑n.
7 Yo vaʼa ka kida‑n ntdaa xa ka kida‑n.
Ka jandixa‑n Cristu Jesús.
Ka xian tnuʼu‑n tnuʼu Jesucristu nuu ñayiu.
Ka kutnuni ini‑n tnuʼu‑ia,
te ka kida‑n xavaʼa.
Ka xemani ñaʼa‑n mee‑da.
Io xa tnɨɨ koio‑n xa tnɨɨ koio ka‑n xamani yaʼa tuku,
xa chindee koio‑n ñani‑ro kuʼa‑ro ka ndoñuʼu ka.
8 Ñatu taʼu tniu‑da nax juñaʼa‑n nuu ñani‑ro kuʼa‑ro Jerusalén.
Diko ni juini‑da xa jini koio‑n nax n‑ka kida ñani‑ro kuʼa‑ro Macedonia.
Nux xandaa kuu xa xemani‑n ñani‑ro kuʼa‑ro,
io xa dandeʼan‑yɨ xa xemani‑n‑yɨ.
9 Xá n‑ka xini‑n xamani Xtoʼo‑ro Jesucristu.
Ka xini‑n xa juini n‑xo tuu kuika‑ia andɨu,
ko na n‑kixee‑ia ñuñayiu yaʼa,
te n‑kundaʼu‑ia.
N‑kundaʼu‑ia xaxeʼe mee‑n,
xa kutuu kuika koio mee‑n andɨu.
10 Xaxeʼe mee‑n,
duʼa kachitnuʼu‑da.
Kuia n‑yaʼa‑ro,
vaʼa n‑ka kixeʼe‑n xa nakueka koio‑n xa juñaʼa‑n.
N‑ka juini‑n xa kada koio‑n xaʼa.
11 Vitna daxinokava koio‑n xa n‑ka kixeʼe‑n.
Nani n‑ka xio tuʼa‑n xa kada‑n,
dani kada koio‑n ná io ná juaʼan.
Kada koio‑n ntdaa xa kuaʼa‑n.
12 Nux juini ɨɨn ñayiu xa juñaʼa‑i,
te kueka vaʼa Ianyuux davaʼa nga xa io.
Ñatu xijan Ianyuux xa juñaʼa‑i xa ña tuu nax io.
13 Ñadu xa juini‑da xa juñaʼa mee‑n xa kutuu vaʼa koio ɨnka ñayiu,
te duʼa kueʼe vida yaʼa koio mee‑n.
14 Juini‑da xa kuaʼa xa kutuu vaʼa koio mee‑i,
ná xtuu vaʼa mee‑n.
Vitna xtuu vaʼa mee‑n,
te ndoñuʼu ka mee‑i.
Mee‑n ka kuaʼa xa chindee‑n‑yɨ vitna,
te ɨnka kɨu,
na chindee ñaʼa mee‑i mee‑n.
Dani kutuu vaʼa koio mee‑i,
te kutuu vaʼa koio mee‑n.
15 Kuu ná jaʼan tnuʼu Ianyuux:
“Se n‑xo nachii kueʼe maná ña tuu nax ndoo ka,
te se n‑xo nachii itaʼu ni,
ña ndoñuʼu ka‑s.”
Tito xiʼin se ka kidatniu xiʼin‑s
16 Na kutaʼu‑da Ianyuux xa n‑kida‑ia xa nani ndu ini mee‑da xaxeʼe‑n,
dani ndu ini Tito xaxeʼe‑n.
17 Na n‑xijan‑da xa jɨʼɨn‑s nuu‑n,
te n‑xejoon‑s.
Ña n‑kidajuexa‑da‑s,
ni itaʼu ni.
Jɨʼɨn‑sɨ xaxeʼe xa ndu ini‑s xaxeʼe mee‑n,
te juini‑s xa jɨʼɨn‑s.
18 Tundaʼa‑da ɨnka ñani‑ro xiʼin Tito.
Xian tnuʼu‑s tnuʼu Jesucristu nuu ñayiu,
te ntdaa ñayiu jandixa Cristu ka jaʼan vaʼa xaxeʼe‑s.
19 Ñani‑ro xiʼin kuʼa‑ro ntdaa veñuʼu Macedonia,
nduku‑s‑sɨ xa kunduu‑s xiʼin‑da,
hora kada‑da xamani yaʼa.
Te xamani yaʼa,
kida‑da xa jini koio ntdaa ñayiu xa Ia kunxaʼnu ka kuu Ianyuux jandixa‑ro.
Dɨuni juini‑da xa dandeʼa‑da ntdaa ñayiu xa ka kida mee‑n xavaʼa.
20 Duʼa ka kida‑da,
xa ma tekuechi ñaʼa ni ɨɨn ñayiu xa kida‑da xa uʼu,
chi kueʼe xa n‑ka doko‑i io.
21 Juini‑da xa jini Ianyuux xiʼin ntdaa ñayiu xa ka kida‑da meni xavaʼa.
22 Te tundaʼa‑da ɨnka ñani‑ro tuku.
Kueʼe vuelta xá n‑xini‑da xa juini‑s xa kada‑s xa juini Ianyuux.
Vaʼa kida‑s ntdaa xa kida‑s.
Io‑s kueʼe confianza nuu mee‑n,
te naʼa‑da xa vaʼa kadatniu‑s xiʼin‑n.
23 Tito,
kuu‑s se kunduu xiʼin mee‑da,
kidatniu‑da,
nduu‑da,
xaxeʼe mee‑n.
Uu ka ñani‑ro,
kuu‑s se tundaʼa ñaʼa ñani‑ro veñuʼu yaʼa.
Ka kidatniu‑s xa koo koio ntdaa ñayiu xañuʼu nuu Cristu.
24 Xijan kuu xa kueka vaʼa koio‑n‑sɨ.
Dandeʼa koio‑n ñani‑ro kuʼa‑ro,
xa ndaa xa xemani vaʼa‑n ñayiu xiʼin Ianyuux.
Duʼa kutnuni ini koio‑s nakuenda jaʼan vaʼa‑da xaxeʼe‑n.