Ndajan tnuʼu Spalu ñayiu ka kukanu ini Jesucristu xndaxio Roma
16
Juini‑da xa ku ku ini vaʼa koio‑n nuu Febe,
ɨɨn ña kukanu ini Jesucristu hora na xee‑ña dian.
Ñuu Cencrea netniu‑ña xa xinokuechi‑ña nuu ñayiu ka kukanu ini Jesucristu.
2 Juini‑da xa ku ku ini vaʼa koio‑n nuu‑ña ná ka ku ini vaʼa‑ro nuu ntdaa ñayiu n‑kida Ianyuux xa n‑ka nduu‑i ñayiu ii.
Juñaʼa koio‑n xa na ndoñuʼu‑ña,
chi yo kueʼe ñayiu n‑kuu chindee‑ña vaxi;
nde daña xko chindee‑ña.
3 Yo ndajan tnuʼu‑da Priscila xiʼin Áquila,
ñayiu ka kida xiʼin‑da tniu Cristu Jesús.
4 Diko nga xa kuú koio‑ña xaxeʼe‑da.
Na kutaʼu‑da.
Ñadu mee ni‑da kuu ñayiu jaʼan xa n‑kutaʼu‑da xa n‑ka kida ñaʼa‑ña xavaʼa chi dɨuni ka jaʼan ñayiu ka kukanu ini Jesucristu ñatu ka kuu daʼya dana Israel xa n‑kutaʼu‑i xa daa n‑ka kida‑ña‑i.
5 Dɨuni ndajan tnuʼu‑da ñayiu ka kukanu ini Cristu Jesús ka nataka veʼe‑ña xa ndadakaʼnu‑i‑ia.
Dɨuni ndajan tnuʼu‑da Epeneto,
se mani xiʼin‑da.
Dɨu‑s kuu se Asia n‑kukanu ini Cristu Jesús kiʼna nuu.
6 Dɨuni ndajan tnuʼu‑da María.
Yo vichi n‑kidatniu‑ña xaxeʼe‑n.
7 Ndajan tnuʼu‑da Andrónico xiʼin Junias.
Ñayiu ñuu‑da ka kuu‑s nduu‑s.
N‑ka yɨndiʼu‑s kɨu n‑yɨndiʼu‑da.
Ndandɨʼɨ‑s nduu‑s nuu se n‑tundaʼa Cristu Jesús xa dakuaʼa koio‑s ñayiu.
Kiʼna ka se yaʼa n‑ka kixeʼe xa kukanu ini‑s Cristu dada daña.
8 Ndajan tnuʼu‑da Ampliato,
se mani xiʼin‑da xaxeʼe Cristu tuku.
9 Ndajan tnuʼu‑da Urbano.
N‑ka kida‑da tniu Cristu xiʼin‑s.
Ndajan tnuʼu‑da Estaquis,
se mani xiʼin‑da tuku.
10 Ndajan tnuʼu‑da Apeles.
Ndaʼu n‑yaʼa‑s xaxeʼe Cristu,
ko kukanu ini naʼi‑s‑ia.
Ndajan tnuʼu‑da ñayiu xtuu kaʼnu xiʼin Aristóbulo.
11 Ndajan tnuʼu‑da Herodión,
tnaʼa‑da kuu‑s.
Ndajan tnuʼu‑da ñayiu kuu familia Narciso ka kukanu ini Cristu,
Ia kuu Xtoʼo‑ro.
12 Ndajan tnuʼu‑da Trifena xiʼin Trifosa.
Yo vichi n‑ka kidatniu‑ña xaxeʼe Cristu,
Ia kuu Xtoʼo‑ro.
Ndajan tnuʼu‑da Pérsida.
Dɨuni mani‑da xiʼin‑ña.
Dani mee‑ña,
yo vichi n‑kidatniu‑ña xaxeʼe Cristu,
Ia kuu Xtoʼo‑ro.
13 Ndajan tnuʼu‑da Rufo,
se n‑kaxi ñaʼa Cristu,
Ia kuu Xtoʼo‑ro,
xa ku kuu‑s daʼya‑ia tuku.
Dɨuni ndajan tnuʼu‑da dɨʼɨ‑s.
Kuenda kɨu dɨʼɨ‑da kuu‑ña.
14 Ndajan tnuʼu‑da Asíncrito,
Flegonte,
Hermes,
Patrobas,
Hermas xiʼin familia‑s ɨɨn ɨɨn‑s xa ka kuu‑i ñayiu ka kukanu ini Cristu.
15 Ndajan tnuʼu‑da Filólogo,
Julia,
Nereo xiʼin kuʼa‑s xiʼin Olimpas xiʼin familia‑s ɨɨn ɨɨn‑s xa ka kuu‑i ñayiu ka kukanu ini Cristu.
N‑kida Ianyuux xa n‑ka nduu‑i ñayiu ii.
16 Juñaʼa tnaʼa‑n xanyuux,
te teyuʼu tnaʼa‑n ná ka kida dava ka ñayiu ka kukanu ini Cristu.
Ndajan tnuʼu ñaʼa dava ka ñayiu ka kukanu ini Cristu xtuu yaʼa.
17 Taʼu tniu‑da nuu‑n xa koo koio‑n cuedado nuu ñayiu ka kida xa ma ɨnuu ka kani ini koio‑n.
Daka niʼno ñaʼa‑i xa maxku jandixa ka‑n ntaka xa n‑jaʼan Cristu.
Xa ka xini‑n xa xandaa kuu xa n‑jaʼan‑ia.
Maxku kandeka tnaʼa ka‑n xiʼin ñayiu ijan.
18 Hora dakuaʼa‑i ñayiu,
ñadu nuu Cristu,
Ia kuu Xtoʼo‑ro ka xinokuechi‑i chi xa kuu ini mee‑i ka kida‑i.
Ka jaʼan‑i xa ka kukajan ini mee‑i xa kada‑i.
Ka dandaʼu‑i ñayiu lilu chi yo vii jaʼan‑i,
te ka xani ini ñayiu jan xa vaʼa ka tuʼa‑i.
19 Kueʼe ñayiu kueʼe ñuu n‑ka teku xa vaʼa jandixa‑n Cristu.
Xaxeʼe xijan kudɨ ini‑da.
Jun ini‑n xa kaan‑n xa kada‑n mee ni xavaʼa,
ñadu xa daa xaloko ka ku kada koio‑n.
20 Na kada Ianyuux,
Ia kida xa xtuu mani ñayiu xa na ndaku‑n nuu Kuiʼna nuu xaku tiempo.
Na chindee chituu ñaʼa Jesús,
Ia kuu Xtoʼo‑ro.
21 Ndajan tnuʼu ñaʼa Timoteo,
se kida xiʼin‑da tniu Cristu.
Dɨuni ka ndajan tnuʼu ñaʼa se nani Lucio xiʼin se nani Jasón xiʼin se nani Sosípater.
Dɨuni tnaʼa‑da ka kuu‑s.
22 Daña Tercio,
se chidotnuni tnuʼu Spalu,
dɨuni ndajan tnuʼu ñaʼa‑da chi ntdaa‑ro ka kukanu ini Cristu,
Ia taxnuni nuu‑ro.
23-24 Dɨuni ndajan tnuʼu ñaʼa se nani Gayo xiʼin dava ka ñayiu ka kukanu ini Cristu.
N‑xeka ñaʼa Gayo daña nukee nuveʼe‑s.
Ndajan tnuʼu ñaʼa se nani Erasto,
se yɨndaʼa tvini ñuu yaʼa.
Dɨuni ndajan tnuʼu ñaʼa se nani Cuarto.
25 Kida Ianyuux xa kutnuni ka ini‑n juaʼan xa n‑xe kodotnuni ya.
Yodotnuni xa io xa kukanu ini ñayiu Jesucristu na kuaʼa nanitaʼu‑i.
Xaʼa kuu xa ka jaʼan‑da nuu‑n xiʼin dava ka ñayiu.
Kachitnuʼu ñaʼa‑da xa n‑datuu Ianyuux vitna.
Nde na ta nkavatuu ka ñuñayiu,
xa daa nga naʼa‑ia xijan.
26 Ñayo ñayiu n‑ka xini xijan xakiʼna.
N‑taʼu tniu Ianyuux xa n‑ka chidotnuni se n‑ka jaʼan nuu ñayiu xa n‑jaʼan‑ia xa xijan yaʼa xa na kuaʼa na jini‑n ntdaa‑n xijan vitna na kuaʼa kukanu ini‑n Cristu,
te jandixa‑n Ianyuux.
Xaʼa kuu xa n‑kachitnuʼu ñaʼa Ianyuux.
27 Na najuen tnuʼu‑ro Ianyuux.
Mee dii‑ia tuʼa ka.
Ñayo xee‑ia.
Na chindee ñaʼa Jesucristu xa na ku ndadakaʼnu‑ro Ianyuux nɨkava nɨkuita.
¡Amén!