Na kada‑ro xa tna ini ñayiu ka kuu ñanitnaʼa‑ro
15
Roo,
ñayiu ka xani ini xa xandaa xakuiti io vaʼa xa kida‑ro ɨɨn xa ka xko kida‑ro,
nux ka xani ini ɨnka ñayiu xa kuechi kuu xijan,
maxku kada ka‑ro xijan na kuaʼa maxku daa kada ɨnka ñayiu,
te kune ini‑i xa daa kada‑i,
chi ka xani ini‑i xa kuechi kuu xijan.
Maxku kada‑ro xa tna ini ni mee‑ro.
2 Na jun ini‑ro xa kada‑ro xa tna ini ñayiu ka kuu ñanitnaʼa‑ro xa kada‑ro na kuaʼa na nduu koio‑i ñayiu vaʼa ka.
Na kada‑ro xa na kutnuni vaʼa ka ini‑i nax kuu xa n‑jaʼan Ianyuux.
3 Daa na kada‑ro chi Cristu,
naa xa kada‑ia xa n‑ku ini mee‑ia n‑xejoon‑ia xa yaʼa‑ia na n‑jaʼan ɨɨn se n‑chidotnuni xa n‑jaʼan Ianyuux.
Duʼa n‑jaʼan‑s nuu Ianyuux:
“Nayiu n‑ka jan kuiʼa ñaʼa ndixi n‑ka jan kuiʼa ñaʼa daña.
Ñayiu kuiʼa n‑ka jaʼan ñaʼa mee‑n kuiʼa n‑ka jaʼan ñaʼa daña.”
4 Davaʼa nga tnuʼu Ianyuux yodotnuni xa daa nga n‑xe kodotnuni xa na kaʼu ñayiu,
te kutuʼa vaʼa‑i xa yodotnuni.
Xaxeʼe xa ka tuʼa vaʼa‑ro xa yodotnuni jan ndɨkɨu ndɨñuu xñu ini‑ro xa nanitaʼu‑ro,
te ña tuu nax ku ini‑ro hora ndaʼu yaʼa‑ro.
Tnuʼu yodotnuni jan kida xa kukaʼnu anu‑ro.
5 Kida Ianyuux xa dani ñu ini‑ro xa ndixi Cristu Jesús,
te xndetu kanu ini‑ro.
Dɨuni kida‑ia xa kukaʼnu anu‑ro.
Mee‑ia na kada xa ɨnuu na kani ini koio‑n na xani ini Cristu Jesús
6 na kuaʼa ɨnuu kani ini koio‑n hora najuen tnuʼu koio‑n Taa‑ro Ianyuux.
Kuu‑ia Taa Jesucristu,
Ia kuu Xtoʼo‑ro.
7 Nani kuvaʼa anu Cristu nuu koio‑n,
dani io xa ku kuvaʼa anu‑n nuu dava ka ñayiu kukanu ini‑ia xee veʼe‑n.
Ndukaʼnu Ianyuux hora na kada koio‑n xijan.
Tna ini‑ia xijan.
8 Daa io xa kada koio‑n chi n‑xinokuechi Cristu nuu ñayiu Israel xa na jɨn tnaʼa xa n‑jaʼan Ianyuux nuu uxi uu daʼya yɨɨ Israel,
chi xa daa nga n‑jaʼan Ianyuux xa kada‑ia ɨɨn xa kada‑ia daʼya dana‑s.
9 N‑xetnaʼa xa n‑jaʼan‑ia xa kada‑ia xa na kuaʼa ndadakaʼnu ñayiu ñatu ka kuu ñayiu Israel‑ia.
Ka ndadakaʼnu‑i‑ia xaxeʼe xa kundaʼu ini‑ia‑i.
Duʼa yodotnuni xa n‑jaʼan ɨɨn se n‑jaʼan nuu Ianyuux:
Juñaʼa‑da nuu ñayiu ñatu kuu ñayiu Israel xa kuu‑n Ianyuux.
Nakuetu‑da nuu‑n.
Kata‑da Salmos.
10 Dɨuni yodotnuni xa n‑jaʼan ɨnka se n‑jaʼan:
Ndixi,
ñayiu ñatu ka kuu ñayiu Israel,
io xa kuvete koio‑n xiʼin ñayiu ka kuu daʼya Ianyuux.
11 Duʼa yodotnuni ɨnka ntuku nuu yodotnuni:
Io xa najuen tnuʼu ndixi,
xa ka kuu‑n ñayiu ñatu ka kuu ñayiu Israel Ianyuux.
Na nakuetu ntdaa ñuu ñuñayiu nuu‑ia.
12 Te dɨuni n‑chidotnuni se n‑xo nani Isaías:
Ɨɨn se kuu daʼya dana Isaí taxnuni,
chi n‑taxnuni xixitna‑s.
Taxnuni‑s nuu ñayiu ñatu ka kuu ñayiu Israel.
Kukanu ini ñaʼa ñayiu xa kada‑s xa n‑jaʼan Ianyuux xa kada‑s.
13 Ianyuux,
kuu‑ia Ia kida xa ñatu xe tnɨɨ ini‑ro xa yaʼa xa xñu ini‑ro xa yaʼa.
Na kada‑ia xa kuvete koio‑n xaxeʼe xa kukanu ini‑n‑ia,
te dɨuni na kada‑ia xa maxku kune ini ka‑n xaxeʼe kuechi n‑ka kida‑n chi ndumani‑ia xiʼin‑n xaxeʼe xa kukanu ini‑n‑ia.
Nux daa na xee kuu,
kada Espíritu‑ia xa ma natu ini‑n xa kukanu ini‑n‑ia,
ni ma jɨn tnɨɨ anu‑n xa kukanu ini ka‑n‑ia.
14 Xini‑da xa ka kaʼu‑n tnuʼu Ianyuux yodotnuni,
te vaʼa ka tuʼa‑n.
Dɨuni xini‑da xa vaʼa ka dakuaʼa tnaʼa‑n.
Xaxeʼe xijan xini‑da xa xandaa xakuiti yo unu vaʼa‑n.
15 Xa nadajaʼan ñaʼa ntuku‑da xa kada‑n xa n‑jaʼan‑da ya,
n‑chidotnuni‑da ntdaa tnuʼu yaʼa.
N‑kuyɨɨ‑da xa n‑chidotnuni‑da xaʼa.
Nadajaʼan ñaʼa‑da xijan xaxeʼe xa n‑tetutniu ñaʼa Ianyuux
16 xa dakuaʼa‑da ñayiu ñatu kuu daʼya dana Israel.
Mudu yaʼa xinokuechi‑da nuu Cristu Jesús.
Jaʼan‑da nuu ñayiu nax io xa kada‑i xa nanitaʼu‑i.
Kuenda kɨu dutu kuu‑da,
te kuenda kɨu ɨɨn xa n‑ka doko dutu nuu altar te nakueka Ianyuux ka kuu ñayiu dakuaʼa‑da.
Ɨɨn xa tna ini Ianyuux ka nduu‑i chi n‑kida Espíritu‑ia xa n‑ka nduu‑i ñayiu ii.
17 Xaxeʼe xa kunduu‑da xiʼin Cristu Jesús,
najuen tnuʼu‑da mee‑da hora kakuneʼe‑da ñayiu ndeka Ianyuux.
Ndeka‑ia‑i xaxeʼe xa dakuaʼa‑da‑i.
18-19 Ñadu mee ni‑da n‑kida xa n‑kida‑da chi Cristu n‑kida xa n‑ndaku‑da xa n‑kida‑da xijan.
N‑kida‑ia xa ndaku‑da xa jaʼan‑da xa n‑jaʼan Ianyuux nuu ñayiu.
Dɨuni n‑chindee ñaʼa‑ia xa n‑kida‑da xavaʼa,
te n‑ka xo ndeʼa ñayiu.
N‑kida Espíritu Ianyuux xa tɨtnɨ vuelta n‑kida‑da milagru.
Xaxeʼe ntdaa xijan jandixa ñayiu ñatu ka kuu daʼya dana Israel Ianyuux.
N‑jaʼan‑da nuu ñayiu Jerusalén xiʼin ntaka ñuu n‑ka nadukunduu Jerusalén xa na kukanu ini‑i Cristu na kuaʼa nanitaʼu‑i.
Nde Jerusalén xiʼin nde nuu nani Iliria n‑jaʼan‑da xijan.
N‑kida‑da ntdaa tniu n‑taxi Ianyuux.
20 N‑xeʼen‑da nuu ñayo n‑xo xini jundu kuu Cristu.
Xijan ñu ini‑da xa kada‑da chi ñatu n‑kuu anu‑da xa jɨʼɨn‑da nuu xá n‑ka kixeʼe ɨnka ñayiu xa jaʼan‑i xijan.
21 Nakaxtnaʼa xaʼa xiʼin xa yodotnuni.
Duʼa yodotnuni:
Ñayiu ta jini ka xa n‑kida‑s,
jini‑i xijan vitna.
Ñayiu ta teku ka xa n‑kida‑s,
teku‑i xijan.
Te jini koio‑i nax kuu xijan.
Ku ini Spalu xa kajantaʼu ñayiu Roma xaxeʼe‑s
22 Xaxeʼe xaʼa ña kuu xa xe kotoniʼni ñaʼa‑da,
23 ko vitna ñatuka tniu n‑taxi Ianyuux io yaʼa xa kada‑da.
Xá n‑kuu kuia daa nga kuu anu‑da xa xe kotoniʼni ñaʼa‑da.
24 Jɨʼɨn‑da España,
te ichi dian kotoniʼni ñaʼa‑da.
Hora na xee‑da xa kutuu‑ro,
yo kudɨ ini‑da.
Jun ini‑da xa janu ichi ñaʼa koio‑n xa jɨʼɨn‑da España.
25 Kiʼna ka jɨʼɨn ntuku‑da Jerusalén xa dakexio‑da xa ndoñuʼu ñayiu n‑kida Ianyuux xa n‑ka nduu ii‑i xtuu ijan.
Ijan dada xee‑da dian
26 chi xndaxio anu dava ñayiu Macedonia xiʼin Acaya xa juñaʼa nga‑i xa ka ndoñuʼu ñayiu Jerusalén n‑kida‑ia xa n‑ka nduu‑i ñayiu ii.
27 Io anu ñayiu Macedonia xiʼin ñayiu Acaya xa daa kada‑i.
Io xa daa kada‑i ñayiu Jerusalén xaxeʼe xa ñayiu Israel ka kukanu ini Jesucristu n‑kida xa n‑ka teku ñayiu Acaya tnuʼu‑ia.
Kidayɨka‑i xa juñaʼa koio nga‑i tvini xa chindee‑i ñayiu Jerusalén.
28 Na yaʼa xa dakexio ndɨʼɨ‑da tvini n‑ka taxi ñayiu Acaya xiʼin Macedonia yɨndaʼa‑da,
te ngondita‑da xa xee‑da dian.
Ijan dada yaʼa‑da xa jɨʼɨn‑da España.
29 Xa naʼa‑da xa xandaa xakuiti juini Cristu xa xee‑da dian.
30 Xijan taʼu‑da nuu‑n xa na kajan taʼu koio‑n xiʼin nde yɨkɨ nde tuchi‑n nuu Ianyuux xa na chindee ñaʼa‑ia daña.
Nani xko xijan taʼu‑da nuu‑i,
dani xijan taʼu koio‑n nuu‑ia.
N‑kida Jesucristu,
Ia kuu Xtoʼo‑ro,
xa taʼu tniu‑da nuu‑n xa kajan taʼu‑n nuu Ianyuux xa na chindee ñaʼa‑ia.
Xaxeʼe xa n‑kida Espíritu Ianyuux xa xemani ñaʼa‑n,
kajan taʼu‑n nuu‑ia xa na chindee ñaʼa‑ia.
31 Kajan taʼu koio‑n xa na kaku‑da nuu ñayiu ña ka kukanu ini Jesucristu xndaxio Judea.
Dɨuni kajan taʼu koio‑n xa na xe ini koio ñayiu n‑kida Ianyuux xa n‑ka nduu‑i ñayiu ii xndaxio Jerusalén xa juñaʼa‑da.
32 Dɨuni kajan taʼu koio‑n xa na kudɨ ini‑ro hora na xee‑da dian te ndetatu‑da nux na kachi Ianyuux.
33 Na kunduu koio‑n xiʼin Ianyuux.
N‑ndumani‑ia xiʼin‑ro.
Amén.