Maxku ku jan tnuʼu‑ro dava ka ñayiu kukanu ini Jesús tuku ka kida
14
Io xa ku kuu ini vaʼa‑n nuu ñayiu ñatu ka kida ná ka kida‑n nux ka xani ini‑i xa ñatu io vaʼa xa ka kida‑n.
Io xa ku kuu ini vaʼa‑n nuu‑i chi ñayo‑ro ka xini ndaa ka xini kuiti nux vatuka xa kada‑ro xa ka kida‑ro a ñaʼa.
Maxku jan tnuʼu‑n‑yɨ.
2 Io‑n ka xani ini xa io vaʼa xa kaxi‑ro davaʼa nga xa kaxi‑ro,
ko io‑n ka xani ini xa ñatu io vaʼa xa kaxi‑ro kuñu.
3 Ñayiu ka xaxi davaʼa nga xa ka xaxi‑i,
maxku kuiʼa jaʼan‑i ñayiu ka xani ini xa ñatu io vaʼa xa kaxi‑ro davaʼa nga xa kaxi‑ro.
Ñayiu ka xani ini xa ñatu tna ini Ianyuux xa kaxi‑ro davaʼa nga xa io,
maxku jan tnuʼu‑i ñayiu ka xani ini xa io vaʼa xa kaxi‑ro davaʼa nga xa io xa kaxi‑ro,
chi ntdaa‑i ka kuu daʼya Ianyuux.
4 Ñatu io vaʼa xa jan tnuʼu‑ro ñayiu chi ñadu roo io xa chinuu nax ka kida‑i chi ñadu nuu mee‑ro xinokuechi‑i.
Mee Ianyuux taxnuni nuu‑i te xini‑ia nax ka kida‑i.
Kendoo vaʼa xa ka kida‑i chi mee‑ia chindee ñaʼa.
5 Io‑n ka xani ini xa nani kuu ɨɨn kɨu dani kuu ɨnka kɨu.
Te io‑n ka xani ini xa dava kɨu ii,
te io xa kuneʼe ii‑ro.
Ñayiu ka xani ini xa ii dava kɨu,
na kuneʼe ii‑i kɨu ijan.
6 Ñayiu ka xani ini xa ii dava kɨu,
io vaʼa xa xe ii‑i chi xaxeʼe Ianyuux ka xe ii‑i.
Ñayiu ka xaxi davaʼa nga xa io xa kaxi‑ro,
io vaʼa chi ka xani ini‑i xa tna ini Ianyuux xa daa ka kida‑i,
te ka xiaʼan‑i nuu‑ia:
“N‑kutaʼu‑da,
Taa‑ro.”
Ñayiu ñatu ka xaxi davaʼa nga xa io xa kaxi‑ro,
io vaʼa chi dɨuni ka xani ini‑i xa tna ini Ianyuux xa ka kida‑i,
te ka xiaʼan‑i nuu‑ia:
“N‑kutaʼu‑da,
Taa‑ro.”
7 Ñayo‑ro vaxi ñuñayiu xa kada‑ro xa ka ku ini mee‑ro.
Dɨuni ñayo‑ro xantuu kɨu kuú‑ro.
8 Hora xtuu‑ro ñuñayiu kida‑ro xa juini Ianyuux,
te hora n‑xee xa kuu‑ro ndɨyɨ,
yɨndaʼa ñaʼa naʼi‑ia.
Xndito‑ro a n‑ka xiʼí‑ro,
dani ka kuu‑ro daʼya‑ia,
9 chi xaxeʼe xijan n‑xiʼí Cristu te n‑nandoto‑ia.
N‑xiʼí‑ia te n‑nandoto‑ia xa taxnuni‑ia nuu ntdaa‑ro xa ka kuu‑ro daʼya‑ia;
xndito‑ro a n‑ka xiʼí‑ro.
10 ¿Nakuenda ka jan tnuʼu‑n dava ñayiu ka kukanu ini‑ia?
¿Nakuenda ñatu ka xe ini‑n‑yɨ?
Ntdaa‑ro,
io xa ndadandaa Ianyuux kuechi‑ro,
ma yoo‑ro kaku.
11 Duʼa yodotnuni:
Xandaa xakuiti ndito‑r,
te xandaa xakuiti ntdandituʼu ñayiu njuiin xiti nuu‑r.
Te jaʼan koio‑i xa Ianyuux ndixa kuu‑r.
Kuu Ianyuux n‑jaʼan‑ia.
12 Xee kɨu ntdaa‑ro jaʼan nuu Ianyuux nax n‑ka xo kida‑ro xa n‑ka xo tuu‑ro ñuñayiu yaʼa.
Mayo‑ro kaku.
13 Maxku jan tnuʼu tnaʼa koio‑ro.
Na dandoo‑ro xijan.
Maxku kada‑ro ɨɨn xa xani ini ɨnka ñayiu xa ñatu kuu xavaʼa,
na kuaʼa maxku daa kada‑i na kuaʼa maxku kada‑i kuechi.
14 Ka xani ini dava ñayiu xa ñatu vaʼa xa kaxi‑ro davaʼa nga xa io xa kaxi‑ro,
ko xini daña xa ntdaa xa io xa kaxi‑ro,
vaʼa xa kaxi‑ro.
N‑kida Jesucristu xa xini‑da xa ñadu kuechi kuu xa kaxi‑ro davaʼa nga xa io xa kaxi‑ro.
Daa jaʼan daña,
ko nux ndeda‑n ka xani ini xa kuechi kuu xa kaxi koio‑n dava xa ka xaxi ɨnka ñayiu,
maxku kaxi koio‑n nudaa.
15 Nux ɨɨn xa ka xaxi‑n kida xa kida ñanitnaʼa‑n kuechi,
te nux dani na ku kaxi naʼi‑n ña tuu nax viʼi‑n‑yɨ.
Maxku dandoo ɨɨn ñanitnaʼa‑n Cristu xaxeʼe ɨɨn xa ka xaxi‑n chi dɨuni n‑xiʼí‑ia xaxeʼe‑i.
16 Maxku daa kada‑n na ñaʼa jan tnuʼu ñayiu ñatu kukanu ini Cristu Ianyuux.
17 Hora xian tnuʼu‑da ñayiu nax io xa kada‑i xa kɨu tnaʼa‑i nuu roo xa ka kuu‑ro ñayiu jandixa xa taxnuni Ianyuux nuu‑ro,
ñatu kakuneʼe‑da xa kaxi xa koʼo‑ro.
Xa ka kakuneʼe‑da kuu xa io xa jandixa koio‑ro‑ia.
Dɨuni ka kakuneʼe‑da xa n‑ndumani Ianyuux xiʼin‑ro.
Ka kudɨ ini ñayiu n‑kɨu tnaʼa nuu roo xa ka kuu‑ro ñayiu jandixa xa taxnuni‑ia nuu‑ro.
Ka kudɨ ini‑i chi ñuʼu ñaʼa Espíritu‑ia.
18 Ñayiu jandixa‑ia,
ka xinokuechi‑i nuu Cristu,
te tna ini Ianyuux xa daa ka kida‑i.
Xndaxio ñayiu xañuʼu nuu ñayiu daa ka kida.
19 Na nduku‑ro mudu kutuu mani‑ro xiʼin ñayiu.
Na chindee tnaʼa‑ro xa na kuaʼa na kutnuni vaʼa ka ini‑ro nax kuu xa juini Ianyuux.
20 Maxku kuu xa ka xaxi ka xiʼi‑ro kada xa kada ñayiu n‑dakuaʼa‑n ɨɨn xa maxku kada‑i.
Ntdaa xa io xa kaxi xa koʼo‑ro vaʼa,
ko nux ndeda ɨɨn xijan kada xa kada ñayiu kukanu ini Cristu kuechi,
ñatu io vaʼa xa kaxi‑ro ntdaa xijan.
21 Vaʼa ka nuu maxku kaxi‑ro kuñu,
ni maxku koʼo‑ro vinu,
ni maxku kada‑ro ɨnka xa xani ini ɨnka ñayiu kukanu ini Cristu xa kuechi kuu.
Vaʼa ka nuu maxku kada‑ro xijan nux xaxeʼe xijan kada‑i kuechi.
22 Ñayiu xani ini xa xandaa xakuiti io vaʼa ɨɨn xa kida‑i,
mee dii nga‑i xiʼin Ianyuux naʼa.
Naka taʼu ñayiu ña tuu nax kida xa kune ini‑i.
23 Ñayiu kaa uu kaa uni anu hora ka xaxi‑i ɨɨn xa ka xaxi‑i xaxeʼe xa ñatu io ndaa io kuiti anu‑i,
kida‑i kuechi.
Kiʼna nuu io xa kani ini‑ro nux io vaʼa xa kada‑ro ɨɨn xa kada‑ro.
Ñayiu kaa uu kaa uni anu hora ka kida‑i ɨɨn xa ka kida‑i,
ka kida‑i kuechi xaxeʼe xa ñatu io ndaa io kuiti anu‑i.