Io xa jueyuʼu juendetu‑ro nuu se ka taxnuni nuu‑ro
13
Jueyuʼu juendetu koio‑n nuu se ka taxnuni nuu‑n.
Ianyuux kuu Ia n‑xani ini xa koo se taxnuni nuu‑ro.
Xnetniu‑s chi mee Ianyuux kida xa ka tetutniu ñaʼa ñuu.
2 Ñayiu ndandita nuu se ka taxnuni,
io kuechi‑i chi ndandita‑i nuu se n‑kida Ianyuux xa n‑tetutniu ñaʼa ñayiu.
Kada uʼu se ka taxnuni ñayiu ka ndandita nuu‑s.
3 Ñayiu ña tuu nax ka kida ñatu ka yuʼu nuu se ka taxnuni chi ña tuu nax ka kida‑i.
Ñayiu ka kida xaloko ka kuu ñayiu ka yuʼu nuu‑s.
Xa maxku ku yuʼu‑ro nuu se ka taxnuni nuu‑ro,
na kada‑ro xavaʼa na kuaʼa na najuen tnuʼu ñaʼa koio‑s.
4 N‑kida Ianyuux xa koo se taxnuni xa na kuaʼa na kutuu vaʼa‑ro.
Nux na kada‑n xaloko yuʼu koio‑n nuu‑s,
chi ka kida uʼu‑s ñayiu loko.
Kiti ini‑s nuu ñayiu ka kida xaloko,
te dayaʼa‑s‑yɨ juxtixia.
Xaxeʼe xa xinokuechi‑s nuu Ianyuux,
daa kida‑s.
5 Jueyuʼu juendetu koio‑n nuu koio‑s,
ko ñadu xa na ñaʼa dayaʼa ñaʼa‑s juxtixia.
Jueyuʼu juendetu koio‑n nuu koio‑s xaxeʼe xa daa io xa kada‑ro.
6 Xaxeʼe xa ka kida‑s tniu ijan ka xiaʼan‑ro tvini ka ndajan‑s.
Ka xinokuechi‑s nuu Ianyuux xa daa ka kida‑s.
7 Juñaʼa koio‑n ntaka tvini ka ndajan se ka taxnuni.
Dɨuni juñaʼa koio‑n tvini ka xijan‑s.
Jaʼan koio‑n,
“Dito” nuu se io xa jaʼan‑ro “Dito.”
Najuen tnuʼu koio‑n se io xa najuen tnuʼu‑ro‑s.
Duʼa kada koio‑n.
8 Io xa najuñaʼa‑n xa tau‑n nuu ñayiu.
Dɨuni io xa juemani tnaʼa‑n.
Nux xemani tnaʼa ñayiu,
jandixa‑i dava ka ley Ianyuux tuku.
9 Yodotnuni:
“Maxku kava‑n xiʼin ñadɨʼɨ ñatu kuu ñadɨʼɨ‑n.
Maxku kaʼni‑n ndɨyɨ.
Maxku duʼu‑n.
Maxku kukajan ini‑n xaxii ñayiu.”
Nux jandixa‑ro ley yaʼa,
ndaku koio‑ro xa jandixa koio‑ro dava ka ley Ianyuux:
“Io xa juemani‑n ñanitnaʼa‑n ná xemani‑n mee‑n.”
10 Nux xandaa xakuita xemani‑n ñanitnaʼa‑n,
ña tuu nax kada‑n‑yɨ.
Kida‑ro xa jaʼan ley Ianyuux nux xemani‑ro ñayiu.
11 Maxku ku kidi‑n chi xa ka xini‑n na tiempo tuu‑ro.
Xa vax kuyatni xa nanitaʼu‑ro.
Naʼa ka n‑kuu xndetu‑ro vaxi dada xa kundetu‑ro.
12 Kuenda kɨu xa n‑tuu yaa te vax kuyatni xa xino ngandii xa vax kuyatni tiempo nanitaʼu‑ro.
Xijan kuu xa maxku kada ka‑ro xaloko ka kida ñayiu loko xakuaa.
Mee nga xavaʼa na ku kada‑ro ná ka kida ñayiu vaʼa nduu.
Na kada‑ro xa juini Ianyuux.
Xavaʼa ka kida ñayiu nduu kuu ná kuu armadura soldado.
13 Na ku kuñukax ini‑ro nuu xikonuu xikondodo‑ro;
na kuikonuu‑ro ná kida ñayiu vaʼa xikonuu nduu.
Maxku ndeʼe kaxi‑ro hora xeʼen‑ro viko,
ni maxku yo ku jɨʼɨn‑ro viko,
ni maxku koʼo‑ro xa nde xini‑ro.
Maxku kada‑ro kuechi xiʼin ñadɨʼɨ ñatu kuu ñadɨʼɨ‑ro,
ni maxku mee ni xa ku kada‑n kuechi ku jun ini‑n.
Maxku jantnaʼa koio‑ro,
ni maxku ku kuu‑ro ñayiu kuedi ini.
14 Maxku daa kada koio‑n.
Jun ini koio‑n xa kada‑n xa juini Jesucristu,
Ia kuu Xtoʼo‑ro.
Maxku ku kuu ka anu‑n xa kada‑n xaloko ka kida ñayiu loko.