Kuenda kɨu doko‑ro mee‑ro nuu Ianyuux xa xinokuechi‑ro nuu‑ia
12
Taʼu tniu‑da nuu‑n ntdaa‑n xa junukuechi koio‑n nuu Ianyuux chi kundaʼu ini ñaʼa‑ia.
Kuenda kɨu doko‑n mee‑n nuu‑ia xa junukuechi koio‑n nuu‑ia chi vichi vaʼa n‑kida ñaʼa‑ia.
Kuvete‑ia xa daa kada‑n.
Ñatuka ka kuu‑ro ná kuu davaʼa nga ñayiu chi xinokuechi‑ro nuu Ianyuux.
Xaxeʼe xa daa kida ñaʼa‑ia,
io xa kada‑ro ntdaa‑ro xijan.
2 Maxku ku kuu ka anu‑n xa kada koio‑n xaloko.
Maxku kada koio‑n ná ka kida ñayiu ñatu ka xini jundu kuu Ianyuux.
Ni maxku kukajan ini‑n mee ni xa io ñuñayiu yaʼa.
Juejoon koio‑n xa na kadatniu ka Ianyuux anu‑n xa maxku ku kuu ka‑n ná n‑ka xo kuu‑n.
Juejoon koio‑n xa na kadatniu ka‑ia anu‑n na kuaʼa na kani ini‑n ná xani ini‑ia te jini koio‑n nax ñu ini‑ia xa kada‑ro.
Xa ñu ini‑ia xa kada‑ro kuu xa kada‑ro xavaʼa xiʼin xa nduu‑ro ñayiu kida mee ni xavaʼa.
Tna ini‑ia xijan.
3 Na jaʼan‑da nuu‑n xa maxku ku ku iʼni‑n xa yo vaʼa ka tuʼa‑n nux ña tuu nga ka tuʼa‑n.
Nux ka xinokuechi‑n nuu Ianyuux,
maxku ku ku iʼni koio‑n xa yo vaʼa xinokuechi‑n nuu‑ia.
Nux vaʼa ka kukanu ini koio‑n‑ia,
maxku ku ku iʼni‑n xa vaʼa ka tuʼa‑n a vaʼa ka xinokuechi‑n.
Xaxeʼe xa n‑tetutniu ñaʼa‑ia xa duʼa jaʼan‑da nuu‑n,
duʼa jaʼan‑da.
4 Na jaʼan‑da tnuʼu kandee yaʼa nuu‑n.
Io ndaʼa‑ro.
Io nuu‑ro.
Io xiti‑ro.
Io dɨkɨ‑ro,
io xeʼe‑ro du,
te nudɨɨn nudɨɨn xetniu‑ro ntdaa,
ko ɨɨn ni xa ka kuu.
5 Ná ka kuu xijan ka kuu ñayiu ka kukanu ini Cristu chi idii nga ñayiu ka kuu‑i.
Ná ndoñuʼu‑ro ndaʼa‑ro,
xeʼe‑ro,
dɨkɨ‑ro,
daa ndoñuʼu tnaʼa ñayiu ka kukanu ini Cristu.
6 Ntdaa‑ro tuʼa kada‑ro tniu Ianyuux.
N‑xani ini‑ia xa nudɨɨn tniu kada‑ro.
Naka vaʼa‑ia xa daa n‑kidavaʼa ñaʼa‑ia.
Ndeda‑ro vaxi xa jaʼan‑ro nuu ñayiu xa n‑jaʼan Ianyuux,
na jaʼan‑ro xijan.
Nux vaʼa ka kukanu ini‑ro Cristu,
ndaku‑ro xa vaʼa jaʼan‑ro nuu ñayiu xa n‑jaʼan‑ia.
7 Te ndeda‑ro vaxi xa junukuechi‑ro nuu ñayiu ka kukanu ini Cristu,
daa na kada‑ro.
Ndeda‑ro vaxi xa dakuaʼa‑ro ñayiu,
na dakuaʼa‑ro‑i.
8 Ndeda‑ro vaxi xa jan doʼo‑ro ñayiu,
daa na kada‑ro.
Ndeda‑ro vaxi xa juñaʼa nga‑ro ñayiu ka kundaʼu dava xa xnevaʼa‑ro,
kueʼe na juñaʼa nga‑ro‑i.
Ndeda‑ro vaxi xa taxnuni‑ro,
vaʼa na taxnuni‑ro.
Nux vaxi‑ro xa chindee‑ro ñayiu xaxeʼe xa ndaʼu ini‑ro,
na chindee‑ro‑i,
te maxku kava uu kava uni anu‑ro.
Io xa juemani tnaʼa ñayiu ka kukanu ini Jesucristu
9 Xandaa xakuiti juemani tnaʼa‑n;
maxku kada nga‑n.
Jun ini koio‑n xa kada‑n xavaʼa.
Dandoo koio‑n xaloko xaduʼa.
10 Juemani tnaʼa‑n xiʼin dava ka ñayiu ka kukanu ini Cristu chi kuenda kɨu ñani‑n ka kutnaʼa.
Najuen tnuʼu tnaʼa koio‑n.
11 Maxku kava uu kava uni anu‑n hora kida‑n tniu‑ia.
Na ku kuvaʼa anu‑n nuu tniu Cristu.
Xiʼin nde yɨkɨ nde tuchi‑n junukuechi‑n nuu‑ia.
12 Io xa ku kuvete koio‑n chi n‑ka kukanu ini‑n xa dananitaʼu ñaʼa Ianyuux.
Hora na kada uʼu ñaʼa ñayiu,
kada nde ini koio‑n.
Ku kajan taʼu kutu koio‑n nuu‑ia,
te maxku kande ini‑n.
13 Chindee‑n ñayiu ka kundaʼu n‑kida Ianyuux xa n‑ka nduu‑i ñayiu ii.
Kotondee koio‑n‑yɨ,
te juñaʼa koio‑n‑yɨ veʼe‑n na ndoo‑i nux ña vada ndoo‑i.
14 Kajan taʼu koio‑n nuu Ianyuux xa na kuu ñayiu ka kida uʼu ñaʼa xavaʼa,
te maxku kuiʼa jaʼan‑n‑yɨ.
15 Hora na kudɨ ini ñayiu,
kudɨ ini koio‑n;
hora na ndaʼi ñayiu,
ndaʼi koio‑n.
16 Kutuu mani koio‑n xiʼin dava ka ñayiu.
Maxku ku kuxe ini koio‑n.
Tuʼa tnaʼa koio‑n xiʼin ñayiu ka kundaʼu ka kukee.
Maxku ku jaʼan koio‑n xa ntdandituʼu xa kuaʼa‑n kada‑n.
17 Nux n‑janñaʼa ɨɨn ñayiu a nax n‑kida ñaʼa‑i maxku ñaʼa dandenaa‑n.
Kada‑n ntdaa xa ka xani ini ñayiu xa kuu xavaʼa.
18 Maxku ku jantnaʼa‑n xiʼin ñayiu nuu ka xikonuu ka xikondodo‑n.
Ntdaa‑i kutuu mani‑n xiʼin‑i,
jun ini‑n xa maxku jantnaʼa‑n xiʼin‑i.
19 Maxku daa mee ka‑n ku kada uʼu ñayiu ka kida uʼu ñaʼa.
Ianyuux io xa kada uʼu ñayiu ijan,
ñadu mee‑n chi duʼa yodotnuni:
“Mee‑r io xa kada uʼu‑r ñayiu.
Mee‑r juñaʼa taʼu‑i.”
20 Dɨuni yodotnuni:
“Nux kojon ñayiu xini uʼu ñaʼa,
juñaʼa‑n xa kaxi‑i.
Nux ka yichi‑i ndute,
juñaʼa‑n ndute na koʼo‑i.
Juñaʼa koio‑n xa kaxi xa koʼo‑i na kuaʼa na kujanuu‑i.”
21 Naa xa kada uʼu‑n ñayiu n‑ka kida uʼu ñaʼa,
juñaʼa‑n xa ka ndoñuʼu‑i.
Naa xa dandenaa‑n xa n‑kida ñaʼa ɨɨn ñayiu,
kada‑n‑yɨ xavaʼa.