N‑kaxi Ianyuux dava ñayiu Israel xa ku kudaʼya‑ia‑i
11
Ni ɨɨn kɨu maxku kani ini‑ro xa n‑dandoo Ianyuux ñayiu Israel,
ñayiu n‑xo ndeka‑ia,
juini n‑ka kuxe ini‑i nuu‑ia.
Ñatu n‑dandoo‑ia‑i chi ñatu n‑dandoo ñaʼa‑ia daña.
Daʼya dana Abraham ka kuu ñayiu Israel,
te daʼya dana‑s kuu‑da tuku.
Kuu‑da daʼya dana Benjamín.
2 Ñatu n‑dandoo Ianyuux ñayiu Israel xaxeʼe xa naʼa n‑kuu n‑kaxi‑ia‑i xa ku kuu‑i daʼya‑ia.
¿Ñatu ka xini‑n nax kuu xa n‑kakuneʼe Elías,
se n‑xo jaʼan xa n‑jaʼan Ianyuux nuu ñayiu na n‑jaʼan‑s nuu‑ia xa n‑ka kida ñayiu Israel kuechi a?
3 Duʼa n‑jaʼan‑s nuu‑ia,
te n‑chidotnuni‑s:
“Taa‑ro Ianyuux,
n‑ka xaʼni ñayiu yaʼa ntdaa se n‑ka xo jaʼan nuu‑i xa n‑jaʼan‑n.
Mee dii nga‑da n‑ndoo,
te ka nduku ñaʼa‑i xa kaʼni ñaʼa‑i tuku.
Dɨuni n‑ka xanu‑i altari‑n”,
kuu‑s,
xiaʼan‑s.
4 ¿Ñatu xnaʼa‑n nax n‑jaʼan Ianyuux nuu‑s a?
N‑jaʼan‑ia nuu‑s:
“N‑dadaʼan‑r xa dandoo ñaʼa uxa mil ñayiu,
te ñayiu ijan ñatu n‑ka xe juiin xiti nuu xa nani Baal xa ndadakaʼnu koio‑i xijan”,
kuu‑ia,
n‑xiaʼan‑ia nuu‑s.
5 Nani n‑kuu xa n‑kaxi Ianyuux dava ñayiu Israel na n‑xo tuu Elías,
daa kuu vitna xa n‑kaxi‑ia dava ñayiu ku kuu daʼya‑ia xaxeʼe xa kundaʼu ini‑ia‑i.
6 N‑kaxi ñaʼa‑ia xa ku kuu‑ro daʼya‑ia,
ko ñadu xaxeʼe xa n‑ka kida‑ro xavaʼa.
N‑kaxi ñaʼa‑ia xaxeʼe xa kundaʼu ini ñaʼa‑ia.
Date nuu n‑xio xaxeʼe xa n‑ka kida‑ro xavaʼa kaxí ñaʼa‑ia xa ku kuu‑ro daʼya‑ia,
ma kuu xa kaxí ñaʼa‑ia xaxeʼe xa kundaʼu ini ñaʼa‑ia n‑kuu.
7 N‑ka kuu ñayiu Israel xa jandixa ndɨʼɨ‑i ley Ianyuux xa maxku kundido kutau ka‑i kuechi n‑ka kida‑i,
ko ña ndaku‑i.
Diko ni ñayiu n‑kaxi Ianyuux xa ku kuu‑i daʼya‑ia ma kundido kutau ka‑i kuechi n‑ka kida‑i.
Dava ka ñayiu,
ka kuxe ini ka‑i nuu‑ia juaʼan.
8 Duʼa yodotnuni:
N‑kida Ianyuux xa n‑ka ndulilu‑i xa maxku kutnuni ini‑i xa jaʼan‑ia.
Juini xndeʼa‑i ɨɨn xa xndeʼa‑i,
ko ñatu ka xini‑i nax kuu.
Juini ka teku‑i ɨɨn xa ka teku‑i,
ko ñayo‑i ka kutnuni ini nax kuu xijan.
Daa ka kuu‑i vaxi.
9 Dɨuni n‑kakuneʼe David ñayiu yaʼa,
te n‑chidotnuni‑s:
Na kada uʼu ñaʼa ndeyu ka xaxi ka xiʼi‑i.
Maxku tnaʼa ñaʼa xa ka xaxi‑i.
Ndaʼu na yaʼa koio‑i.
Xijan kuu taʼu‑i.
10 Na kuaa‑i.
Maxku kundeʼa ka‑i.
Na ndutɨʼɨ yata‑i te maxku ndundaa ka.
Nanitaʼu ñayiu ka kukanu ini Jesucristu ñatu ka kuu ñayiu Israel
11 Ñadu xaxeʼe xa xaku ni ñayiu Israel ka jandixa Ianyuux vitna,
te dani xaku ni‑i jandixa‑ia vaxi,
chi xee kɨu jandixa ntdaa‑i‑ia.
Nax kuu ñaʼa.
Xaxeʼe xa ñatu ka jandixa daʼya dana Israel‑ia,
xijan kuu xa n‑ka kukanu ini ñayiu ñatu ka kuu daʼya dana Israel‑ia.
Ijan te n‑ka kukuedi ini daʼya dana‑s.
12 Nuu xaxeʼe xa n‑ka kida daʼya dana Israel kuechi kida Ianyuux ñayiu ñuñayiu xavaʼa,
naka ñayiu ñuñayiu ma ku kada‑ia‑i xavaʼa na xee kɨu kukanu ini daʼya dana‑s Cristu.
Nuu xaxeʼe xa n‑ka dandoo daʼya dana‑s‑ia kuu ñayiu ñatu kuu daʼya dana‑s xavaʼa,
naka ñayiu ñatu ka kuu daʼya dana‑s ma ku kada‑ia‑i xavaʼa na xee kɨu kukanu ini daʼya dana‑s Cristu.
Vichi vaʼa ku kada‑ia‑i.
13 Kachitnuʼu ñaʼa‑da ndixi,
ñayiu ñatu ka kuu daʼya dana Israel xa n‑tundaʼa ñaʼa Ianyuux xa dakuaʼa ñaʼa‑da.
Xijan kuu tniu n‑taxi‑ia,
tniu ndandɨʼɨ kuu.
14 Dakuaʼa ñaʼa‑da,
ndixi ñayiu ñatu kuu daʼya dana Israel na kuaʼa kukuedi ini ñayiu ñuu‑da xiʼin yatnuʼu‑da na kuaʼa kueʼe‑i na nanitaʼu.
15 Xaxeʼe xa n‑xika yata Ianyuux nuu ñayiu ñuu‑da xiʼin yatnuʼu‑da n‑ndumani‑ia xiʼin kueʼe ñayiu ñuñayiu.
Kuenda kɨu ndɨyɨ ka kuu ñayiu Israel,
ko kɨu na ndumani Ianyuux xiʼin‑i kuenda kɨu nandoto koio‑i.
16 Ná kuu yuxa ka kuu ñayiu Israel.
Nux ii ɨɨn parti yuxa n‑doko ɨɨn ñadɨʼɨ nuu Ianyuux,
dɨuni ii ɨnka parti yuxa jan.
Nux ii yoʼo yutnu,
dɨuni ii ntakaa daʼnda‑tnu.
17 Dɨuni ka kuu ñayiu Israel ná ka kuu daʼnda tnu olivo xetata‑ro,
te ndixi,
ñayiu ñatu ka kuu ñayiu Israel,
ka kuu‑n ná ka kuu daʼnda tnu olivo io yuku.
N‑xaʼnde Ianyuux daʼnda tnu olivo xetata‑ro,
te n‑xaʼnde‑ia ɨɨn daʼnda tnu olivo io yuku,
te n‑kida injertari‑ia daʼnda yutnu ijan tnu olivo xetata‑ro jan.
Ɨɨn nga yoʼo‑tnu neʼe nduu daʼnda‑tnu jan.
Ɨɨn ni ndute yɨʼɨ‑tnu.
18 Mee‑n,
ñayiu Israel,
maxku jaʼan iʼni koio‑n xa ka kuu‑n ná kuu daʼnda tnu olivo xetata‑ro,
chi xa xnaʼa‑n xa ñadu daʼnda‑tnu neʼe‑tnu xa nukoo‑tnu chi yoʼo‑tnu neʼe ñaʼa.
19 Te ndixi,
ñayiu ñatu ka kuu ñayiu Israel,
vaa ku jaʼan koio‑n:
“N‑taʼnde daʼnda tnu olivo xetata‑ro xa na kuaʼa na kada injertari Ianyuux daʼnda tnu olivo io yuku nuu n‑taʼnde tnu jan.”
20 N‑xika yata Ianyuux nuu ñayiu ka kuu daʼya dana Israel xaxeʼe xa ñatu n‑ka kukanu ini‑i‑ia,
te ndixi ka kunduu‑n xiʼin Ianyuux xaxeʼe xa ka kukanu ini‑n‑ia.
Ko maxku ku ku iʼni‑n xaxeʼe xijan;
koo koio‑n cuedado na ñaʼa daa yaʼa koio‑n tuku.
21 Nux n‑xika yata Ianyuux nuu ñayiu ka kuu ná kuu daʼnda tnu olivo xetata‑ro,
naka nuu ndixi ma ku kaka yata‑ia.
22 Xá xnaʼa‑n janda kuu Ianyuux.
Xá xnaʼa‑n xa vichi vaʼa kida‑ia dava ñayiu chi kueʼe xa xiaʼan‑ia‑i,
te xtuu vii xtuu vaʼa‑i.
Dɨuni ka xini‑n xa kida‑ia xa ndaʼu yaʼa dava ñayiu.
Kundaʼu ini ñaʼa‑ia,
ndixi,
te kida‑ia xa ndaʼu ka yaʼa ñayiu n‑ka xika yata nuu‑ia.
Kada naʼi koio‑n xavaʼa na kuaʼa dani na kada ñaʼa‑ia xavaʼa.
Nux ñaʼa,
dani kaka yata‑ia nuu‑n tuku.
23 Kuenda kɨu daʼnda tnu olivo xetata‑ro n‑taʼnde jan ka kuu daʼya dana Israel.
Ndada injertari ntuku Ianyuux daʼnda tnu olivo n‑taʼnde jan nux na ndixeʼe koio daʼya dana Israel xa kukanu ini‑i Ianyuux ɨnka vuelta.
Daa kuu chi kada‑ia xa kɨu tnaʼa koio‑i nuu‑n xa ka kuu‑n ñayiu ka kukanu ini Jesucristu.
24 Nux n‑kida injertari‑ia daʼnda tnu olivo io yuku nuu tnu olivo xetata‑ro,
naka daʼnda tnu olivo xetata‑ro,
ma ndada injertari‑ia mee tnu olivo jan.
Nanitaʼu ntdaa daʼya dana Israel io xa nanitaʼu
25 Na kachitnuʼu ñaʼa‑da nax xani ini Ianyuux xa koo xa na kuaʼa na jini koio‑n nax yaʼa te nax koo,
chi nux ma kachitnuʼu ñaʼa‑da,
vaa ku jaʼan koio‑n xa xá ka xini‑n nax yaʼa,
te ku ku iʼni‑n.
Xaʼa kuu xa kachitnuʼu ñaʼa‑da.
Kueʼe ñayiu Israel ñatu ka juini xa kukanu ini‑i Jesucristu.
Nde kɨu na kukanu ini ndɨʼɨ ñayiu ñatu ka kuu ñayiu Israel io xa kɨu tnaʼa nuu ñayiu kukanu ini‑ia Cristu,
ijan dada ndixeʼe ñayiu Israel xa kukanu ini ntuku‑i Ianyuux.
26 Xee kɨu nanitaʼu ntdaa daʼya dana Israel io xa nanitaʼu chi daa yodotnuni.
Duʼa yodotnuni:
Sión kee Ia dakaku kueʼe ñayiu ka kuu daʼya dana Jacob.
Kada‑ia xa ma kada koio ka ñayiu ka kuu daʼya dana‑s kuechi n‑ka xo kida‑i.
N‑ka xo kida‑i kuechi chi ñatuka n‑ka xo jandixa‑i Ianyuux.
27 N‑jaʼan Ianyuux:
“N‑jaʼan‑r xa kada‑r xa ma kundido kutau ka‑i kuechi n‑ka kida‑i,
te daa kada‑r.”
28 Xaxeʼe xa kueʼe daʼya dana Israel n‑xika yata nuu Ianyuux,
kiti ini‑ia nuu‑i.
Te xaxeʼe xijan vaʼa kida ñaʼa‑ia ndixi,
ñayiu ñatu ka kuu ñayiu Israel.
Juini kueʼe‑i n‑ka xika yata nuu‑ia,
ko dani xemani‑ia ñayiu Israel xaxeʼe uxi uu daʼya yɨɨ Israel chi n‑kaxi‑ia‑i xa kutuu‑i nuu tuu‑ia.
29 Juñaʼa naʼi‑ia xa n‑jaʼan‑ia xa juñaʼa‑ia chi xetnaʼa xa jaʼan‑ia.
Kida‑ia xa teku ñayiu tnuʼu‑ia xa na kuaʼa nanitaʼu‑i ná n‑jaʼan‑ia.
30 N‑ka xo kuxe ini‑n nuu Ianyuux,
te vitna ka kuxe ini daʼya dana Israel nuu‑ia.
Xaxeʼe xa ka kuxe ini‑i nuu‑ia kundau ini ñaʼa‑ia ndixi.
31 Ka kuxe ini ñayiu Israel nuu‑ia vitna,
ko ndundaʼu ini‑ia‑i na xee kɨu.
Xaxeʼe xa kundaʼu ini ñaʼa‑ia ndixi,
ndundaʼu ini‑ia‑i tuku.
32 Nani ka kuxe ini ñayiu Israel nuu Ianyuux dani ka kuxe ini ñayiu ñatu kuu ñayiu Israel nuu‑ia.
N‑xio xa ndaʼu yaʼa ntdaa‑ro na kuú‑ro n‑kuu,
ko xaxeʼe xa kundaʼu ini ñaʼa‑ia,
ma kuu ka xa ndaʼu yaʼa‑ro.
33 Naka kueʼe xa taxi Ianyuux.
Naka vichi kundaʼu ini ñaʼa‑ia.
Naka kueʼe xa kutnuni ini‑ia.
Naka kueʼe xa xini‑ia.
Naka tuʼa‑ia.
Ñayo‑ro xini nakuenda kida‑ia ɨɨn xa kida‑ia,
ni nakuenda daa xani ini‑ia.
Ñayo‑ro xini naxa xani ini‑ia xa kada‑ia.
34 Ná jaʼan‑da ya,
daa yodotnuni:
Ñayo‑ro xini nax xani ini‑ia.
Ñatu xe tnuʼu‑ia nuu ñayiu.
35 Ñayo‑ro xiaʼan nga ɨɨn xa xiaʼan nga‑ro‑ia.
Ña tuu nax kutaʼu‑ia nuu‑ro.
Ña tuu nax n‑xiaʼan nga‑ro‑ia xa kutau‑ia nuu‑ro.
36 Mee‑ia n‑xani ini ntdaa xa io,
te xaxii mee‑ia kuu.
N‑kidavaʼa‑ia ntdaa xa io xa na kuaʼa na najuen tnuʼu ñaʼa xijan.
Io xa ndadakaʼnu‑ro‑ia.
Ndɨkɨu ndɨñuu ndukaʼnu‑ia te ma jɨn ndɨʼɨ.
Amén.